Editouriau dóu mes d'abriéu 2013

Escolo en refoundacioun
Pas de lengo regiounalo à l’Educacioun Naciounalo

Deo gracias, es pas un papo abile, noste Francés Hollande, en bon capitàni de pedalò saup leissa toumba li bèllis erso proumetouso de sa candidaturo, navigo countènt à contro courrènt. Pedala parieramen en arrié, acò se poudié pas faire sus lou veloucipède dóu Tresor dóu Felibrige, adounc sian espanta, tourna-mai, d'aquelo veloucita que laisso darrié l'autre Francés, lou Mitterand, lou finocho de l'article 2, qu'encalè d'un soulet cop de pedalié tóuti lis esperanço de sauvo-gardo di lengo regiounalo de Franço.
Es toujour parié e aquest an coume dis lou prouvèrbi:
Lou mes de Mars
Es esta amar

Mars a bèn marseja en poulitico.
Se fau ramenta que l'annado 2013 avié bèn coumença emé lou proujèt de lèi d'óurientacioun sus l'escolo, uno refoundacioun qu'escafavo pèr oumissioun li lengo regiounalo de Franço de l'ensignamen dins nòstis escolo laïco de la Republico.
Tant lèu tóuti lis assouciacioun de defènso de la lengo d'oc partiguèron en batèsto, apiela pèr mant un elegit qu'arresounèron de bouco vo pèr escrit lou menistre de l'Educacioun naciounalo, Vincèns Peillon, pèr ié faire escorno d'aquel óublit. Fuguèron noumbrous en Prouvènço, deputat o senatour, de se soucita d'acò, coume Patrick Mennucci, Vincent Burroni, Jean-Claude Bouchet,François-Michel Lambert, Claude Domeizel, Christophe Castaner, Sergi Andreoni e mai…
Li presidènt di gràndis assouciacioun, Jaque Mouttet pèr lou Felibrige e Pèire Brechet pèr l'Istitut d'Estùdi Óucitan fuguèron pas en rèsto pèr faire part de sa vergouno davans un tèste parié.
Lis assousiacioun d'ensignamen fuguèron, éli, en proumiero ligno pèr critica aquéu proujèt catastroufi que ramenarié au vièi tèms de la lèi Deixonne.
Fin finalo, es l'article 27 dóu proujèt de lèi qu'encagnè lou mai lis ensignaire, titra “ L'enseignement des langues vivantes étrangères ”, leissavo bèn segur li lengo regiounalo morto.

Lis amendamen au tèste an plougu, emé bèn segur un article 27 bis favourable i lengo regiounalo, mai de-bado!

Urousamen dins un autre doumaine, l'avans-proujèt de la Lèi de descentralisacioun e de reformo de l'acioun publico sufis d'uno pichoto candèlo pèr legi uno grando e bello voulounta favourablo: “ Lou Counsèu regiounau pòu adouta un plan desvouloupamen di lengo e culturo regiounalo ”, coume s'èro pas poussible à l'ouro d'aro…

Basto! S'acò pauso un proublèmo, eh! bèn! lou Gouvèr nous vai pourgi uno coumessioun pèr travaia sus aquéu sujèt. Se ié dis lou reloge à gagna de tèms. Din-dan, din-don, digue, digue, don… e sian countènt coume de dindoun sus d'amouro.

Nous an crea un “ Coumitat counsultatiéu pèr la proumoucioun di lengo regiounalo e la pluralita lenguistico esterno ” à l'aflat de la Menistro de la culturo, Aurelìo Filippetti.
Es lou deputat autounoumisto bretoun, Pau Molac, membre de Regioun e Pople soulidàri, que n'a pres la tèsto.
Dès persouno fan partido d'aquéu Coumitat counsultatiéu qu'es carga de remetre un raport pèr ameioura lou sort di lengo regiounalo dins lou territòri de la Republico franceso, acò avans l'estiéu.
David Grosclaude, lou Counseié regiounau d'Aquitàni, que sièjo dins aquéu Coumitat n'en sara, de-segur, lou meiour porto-paraulo pèr nosto lengo d'oc.
Mai nous dison que lou Coumitat comto tambèn que de persounalita qualificado… Avèn fisanço.
Subre-tout qu'es un coumitat rèn que counsultatiéu que laisso la decisioun finalo au Gouvèr!

Ninoi, se poudié pensa qu'aquéu group d'especialisto anavo prepara la ratificacioun de la Charto éuroupenco di lengo regiounalo… auran pas aquéu soucit, l'engajamen n° 56 de la campagno eleitouralo de mounsegne Francés Hollande que lou proumetié, es jita à l'aigo.

Lou deputat bretoun, Pau Molac, a pamens pas manca de dire soun franc valentin:
“ La teinoustruturo de l'Estat, Counsèu d'Estat e Counsèu coustituciounau en tèsto, n'a agu de cesso de s'escoundre darrié de caviharié juridico pèr s'óupousa à tóuti recouneissènço de la diversita lenguistico e culturalo. La Coustitucioun ié sèr de bàrri pèr impausa uno vesioun unitàri dóu païs, noun soulamen en poulitico, mai egalamen au nivèu culturau e lenguisti.”
Pamens perd pas espèr: “ D'avançado soun efeitivamen poussiblo sènso ratifica la Charto, mai aquéli prougrès saran forço limita e poudran èstre tant facilamen remés en causo pèr li court soubeirano. L'insegureta en ço que councerno li lengo regiounalo a encaro de bèu jour davans elo ”.

Adounc aro, coume toujour, se pòu plus rèn espera d'un Gouvèr, se mountan pas sus nosto figuiero pèr crida plus fort. Pèr acò lis assouciacioun, poulitico e culturalo, de defènso di lengo regiounalo se van tant lèu moubilisa pèr mena d'acioun revendicativo d'en pertout.

Bernard Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com