Li gènt de l'isclo

Es pas eisa de chapla la poupulacioun en lesco. Subre-tout que sèmblo uno mousaïco etnico, d'ùni soun óuriginàri de l'Isclo vo de la Franço metroupoulitano se ié dis lis Z'oreil, d'àutri soun vengu d'Africo se sounon lis Cafre, lis Indian Tamoul porton lou noum de Malabar entre que lis Indian musulman soun li Zarabe. À-n-aquéli fau apoundre li Chinés emai de sang-mescla de touto meno. Se dis que li proumié vengu èron d'aventurié francés acoumpagna d'ome e de femo Malgache mai o mens voulountàri.

La pouplado de l'isclo

L'Isclo fuguè descuberto pèr li Pourtugués à la debuto dóu siècle XVIen. Mai sa pousicioun interessara lou mounde qu'au siècle XVIIen, estènt que se capito sus la routo dis Indo pèr li Coumpagnié franceso que parton à la counquisto de l'Asìo. Ansin lou rèi de Franço n'en fai sa poussessioun en 1642, e la batejo dóu noum d'Isclo de Bourbon. À la fin dóu siècle XVIIen, la Coumpagnié dis Indo vòu n'en faire uno coulounìo de pouplamen pèr metre en esplecho li terro de l'Isclo. D'aqui entre aqui, l'esclavage fai flòri. Li batèu negrié desbarcon, sus li costo de Bourbon, de milierat d'ome e de femo croumpa pèr li traficaire di ribo de Madagascar e d'Africo. À flour e à mesuro, la poupulacioun negro s'endevèn majouritàri, emai patiguèsse souto si cadeno, fai la prousperita de l'Isclo. L'aboulicioun de l'esclavage sara decretado definitivamen en 1848, ço que fourçara li couloun de faire veni de man-d'obro d'un pau pertout. Es aquelo annado que l'isclo càmbio de noum pèr deveni Reünioun, es de mai l'isclo à sucre. La culturo sucriero n'en fara sa prousperita. Malurousamen en 1860 sara la criso, la bledo-rabo à sucre es cultivado à bóudre en metroupòli, ço que fai que lou sucre de cano se vènd pas. Partènt d'aqui es la fin de la grando inmigracioun. Au fiéu dóu tèms li maridage miste saran pamens toujour que mai noumbrous, ço que baiara lou biais tipa di Reüniounés d'aro, à la caro de la e d'ebeno. La poulitico d'assimilacioun coulounialo s'es acabado despièi proun en despartamentalisacioun. Aquelo istòri bourroulado a pas empacha lis estajan dóu païs de farga sa lengo, lou creole, lengo vernaculàri eiretado dóu vièi francés e saupicado de mot d'óurigino malgacho vo tamoulo.

L'epidèmi de Chikungunia

Basto li Reüniounés se dèvon countenta coume li Prouvençau, d'un CAPES-creole qu'a permés pamens d'istala de proufessour pèr ensigna lou creole dins l'ensignamen segoundàri, e lou presenta en chausido, au bacheleirat. Mai es de bon vèire que li Reüniounés tènon toujour sa lengo en bouco, e se garçon pas mau de saupre se parlon un creole pur e perfèt. De mai, la grafìo es pas caiado e la vivacita dóu creole fai que s'embugo eisadamen di mot d'àutri lengo. Bèl eisèmple pèr li puristo de noste lengage e de nòsti grafìo apetega à foussilisa la vièio lengo d'oc, en liogo de vira li pajo dóu passat farien pas miés de resta à la pajo dóu mounde d'aro…. Mai es de figo d'un autre panié.

Lou paradis perdu

Se la lengo creolo countùnio, riboun-ribagno, de se parla, li Reüniounés an d'àutri soucit. Lou nivèu de soun ecounoumìo repauso encaro sus lis espourtacioun di proudu de la cano à sucre e de l'agro-alimentàri, deficitàri en raport dis impourtacioun de proudu de touto meno de la metroupolo. Lou tourisme emé cinq cènt milo visitaire pèr an aporto urousamen un pau d'ajudo à l'ecounoumìo. Lou païs, de-verai, es bèu. La Reünioun es perdudo en pleno zono troupicalo. L'Isclo es escoubado pèr lis Alizat, de vènt que boufon dóu sud-est e tempèron li variacioun climatico. I'a eila rèn que dos sesoun, l'estiéu caud e umide dóu mes de nouvèmbre au mes d'abriéu, e l'ivèr fres e se. Es en estiéu que se capito de risque de revoulunado. Plòu à verso, 1500 milimètre d'aigo podon toumba dins la journado. La ribiero dóu Mat pòu passa d'un debit mejan de 7,8 à 2600 mètre-cube pèr segoundo. Pamens fau pas crèire que fai caud pertout sus lou Piton des Neiges la temperaduro davalo à mens 10 degrad e li jalado matiniero mancon pas. Li forto variacioun climatico aduson segound l'autitudo de meno de micrò-climat. Ansin se passo tant lèu de la fourèst troupicalo coume à l'Anse des Cascades, i pendis rascla dóu Piton de la Fournaise. Sus la costo batudo pèr de vènt fòu, la vegetacioun es enrascassido. La fourèst es darrié caudo e seco emé d'ebenié, de latanié e de benjoun. Li féuse e lis ourquidèio s'acrocon un pau d'en pertout. En mountant, devers li 800 mètre, lis aubre se torson e i'a que mai de féusiero, emai de moufo e de flour-de-serp. Lou sòu es coufle d'aigo. L'umideta es pesanto. Touto la fourèst es bagnado pèr la nèblo. Mai luen subre aquelo mar de nivo, es lou relarg di brusc. Malurousamen d'en pertout li fourèst soun sagatado pèr faire de plantacioun. Li zono naturalo à-cha-pau s'apichounisson. Lou paradis naturau es de-bon amenaça. Em' acò lou bestiàri e l'auceliho s'esvalisson. Lou papagai mascarin a despareigu, la parrouqueto verdo es en dangié. Lis aucèu Tuit-tuit soun plus gaire. La rato-penado rousseto vai desparèisse. Pas proun d'acò l'Eden perdu de Mascareigno es manja pèr la moussalino. Es uno envasioun de mouissau grouadis que s'esquihon d'en pertout dins l'isclo despièi l'an passa.