Editouriau dóu mes de Desèmbre

Pèr nòsti lengo

AU PAÏS DE GALO soun afouga pèr sa lengo e an deja fa grand camin. Aro s’avison que fau un prougramo de TV sus Internet se volon pivela lou mounde e subre-tout li jouvènt. Sara fa en abriéu.

Lou Pr Crystal afourtis que sièr de rèn tout ativisme raport i lengo se pivelan pas li jouvènt (teenagers, que dis) que saran li parènt di pichot de la generacioun d’après. E d’apoundre : que i’a que pivèle mai li jouvènt à l’ouro d’aro ? Se capitas de faire passa uno lengo sus Internet alor li jouine soun lèst à dire "es cool !". La bono draio es dounc de cerca lou biais, li mejan e la metodo pèr capita.

OGMIOS es la revisto de la Foundation for Endangered Languages. Dins un autre de sis article esplico coume li cercaire en lenguistico devon èstre aceta pèr li poupulacioun e li loucutour di lengo que volon apara e estudia. D’efèt, tant se pòu que li loucutour ié fagon targo, e lis acusèsson d’èstre contro-proudutiéu en estènt que sa lengo es pas aquelo de l’ecounoumìo ni dóu poudé.

Soun role es dounc pas di simple. Se dèvon asata e trouba lou biais. Pèr acò uno counferènço internaciouanlo se devié teni en óutobre à l’Universita de Malaia en Malesìo.

UNO REMARCO: aquelo revisto, forço bèn facho e qu’aparo li lengo en dangié, es touto escricho en... anglés, la lengo que fai creba lis autro! Mai coume faire?

QUAUQUI CITACIOUN pescado dins lou darrié numerò : Perdre de lengo vòu dire perdre de sabé : "Quand perdèn uno lengo, perdèn de siècle de pensado e de refleissioun umano sus lou tèms, li sesoun, li creaturo de la mar, li flour, li matematico, li mite, la musico, la vido vidanto, etc." (K. David harrisson).

"La clau pèr reviéuda un lengage es de capita uno nouvello generacioun de jóuini loucutour" (Gregory D.S. Anderson).

Ma lengo

Dins la tiero di lengo regiounalo que se podon ensigna dins lis escolo an óublida l’alemand-alsacian e lou creole. Lou menistre de l’Educacioun Naciounalo s’es gaire esmougu d’aquel óublit. Pèr apasima li renaire a mounta uno coumessioun d’enquisto. D’espert se van recampa pèr saupre s’aquéli lengo soun vertadieramen de lengo nostro… Quau vous a pas dis qu’erian en plen delire lenguisti.

Unioun de la Mediterragno, li pople ribeiren

Nostis elegit n'an plen la bouco, "l'espàci mediterran".

Dequ'es aco ? Bèn segur i'a la mar, la Mediterragno. Tradiciounau caire-fourc culturau, que nous dison d'un las, pièi de l'autre "lis flus uman sufison pas pèr armounisa li coundicioun de vido dins lis Estat mediterran". Adounc lou camin à tira sarié encaro long, se i'avié pas la PACA. Se-vous-plais, "pèr soun pousiciounamen geougrafi la Prouvènço-Aup-Costo d'Azur asseguro uno founcioun estrategico d'ourganisacioun dis escàmbi entre l'Éuropo dóu Nord e lou bacin mediterran".
Sian bèn countènt de lou saupre, estènt que nous faudra revèire lou passat dóu païs. T'afourtisson sènso vergougno:
"Istouricamen, la Regioun desvouloupo d'acioun de cououperacioun Éuro-Mediterragno", coume au bon tèms dóu rèi Carle-Magne, que!
Lou nouvèu rèi de Prouvènço-Aup-Costo d'Azur, vuei, vòu revista l'Istòri pèr espandi soun poudé, acò manjo pas de pan…
Bèn segur, mai la resoun tourniero n’es que dins l’Éuropo, s’es tira uno ligno de demarcacioun entre li païs dóu nord, riche e fort de sa puissanço ecounoumico e li païs dóu sud, devitalisa, deseirita, mai ensouleia, riche de si camping, pargue naciounau e reservo de touto meno.
Ço que se dis elegantamen “un risque impourtant de desequilibre”.
Adounc la Regioun nostro es estado chausido coume “Autourita unico de gestioun” pèr li nòu Estat mèmbre d’aquéu prougramo de recampamen bateja MED.
Chipre, Eslouvenìo, Espagno, Franço, Grèço, Itàli, Malte, Pourtugau, e Reiaume-Uni pèr Gibraltar. Acò pòu sembla un vièi pantai de Frederi Mistral e di Felibre, l’Empèri dóu soulèu, emé tóuti li païs de lengo latino.
Tant soulamen aro se garçon de la Culturo que siegue d’óurigino grèco vo latino. Encaro mai di lengo, es tout vist que lou lengage de MED, l’anaran querre à Gibraltar.

Unioun de la Mediterragno Basto !

La Mare nostrum es vengudo de modo, passiouno nòsti gouvernaire, pas proun d’un baile de prouvinço, es aro lou presidènt de la Republico Franceso que vòu founda l’Unioun de la Mediterragno, aqueste cop emé li païs maugrabin de la man d’eila de mar. À la tèsto d’aquéu nouvel espàci beilejarié un Counsèu de la Mediterragno, parié coume lou Counsèu de l’Éuropo.
Un acamp di cap de gouvernamen di païs de l’entour de la Mediterragno se devrié teni à Paris au mes de jun de 2008 pèr bandi aquelo “Unioun poulitico, ecounoumico e culturalo foundado sus lou principe d’egalita entre li nacioun”. Saupre se dins la “culturo” boutaran lou lengage di pople mediterran ?
Uno Charto Mediterragno di lengo e di cuturo regiounalo farié de-segur mestié, mai, pecaire, la Franço, que vòu pas aplica la Charto Éuroupenco di lengo regiounalo, vai pas leissa parla degun sus aquel item.
À la coumpleissita de dialogue emé lou mounde arabe nous van dire que fau pas apoundre lou lengage di minourita.
Pamens la Prouvènço se vòu encaro aqui en proumiero ligno, dos vilo se garrouion adeja pèr èstre la capitalo d’aquelo Unioun de la Mediterragno. Niço se pousiciouno coume capitalo ecounoumico de la Mieterragno entre que Marsiho crido sa precedènci dins de proujèt d’Éurò-Mediterragno. Tout acò se boulego, lou Maire marsihés, apiela pèr lou maiun “Medcoop”, faguè lou mes passa sa “Semano ecounoumico de la Mediterragno” emé touto meno de manifestacioun à bóudre.
Se saup pamens que de tóuti li bord, de l’Alemagno à l’Egito, mancon d’estrambord pèr aquel afaire. La questioun que se pauso lou secretàri generau de la Ligo arabo, Amr Moussa, resumis tout: “Es uno bono idèio, mai dequé i’a dedins ?”. L’Éurafrico I’a pas de marrit sang à se faire, acò sara qu’uno estapo, coume lou dis aquéu que li brulo, lou Sarkozy, “Apelle tóuti aquéli que lou podon à s’engaja dins l’Unioun Mediterragno pèr ço que sara lou pivèu de l’Éurafrico, aquéu grand raive d’auboura lou mounde”.
Vaqui auren pas mai d’espèr de davera uno Charto Éurafricano di lengo regiounalo, lou futur mèstre dóu mounde amo pas li lengage minouritàri.
Lou falié ausi dire:
“S’agis pas d’óublida. S’agis pas de faire la poulitico de la taulo raso. S’agis pas de faire coume se i’avié pas agu d’istòri”.
E de counclure: “Pople de la Mediterragno, moustren à tóuti lis ome ço que pòu acoumpli encaro un grand raive de civilisacioun e nòstis enfant saran fièr de nous”.
Aquéu bèu civilisaire di ribo de la Mediterragno escracho la lengo d’oc, sènso soulamen s’avisa qu’aquéu parla es dins lou brès dóu terraire mediterran que vòu auboura. Moussu lou presidènt nòstis enfant saran pas fièr de nous se vous fasèn pas lou contre pèr sauva sa lengo. Voste raive nivelaire vai s’enfanga sus li plajo prouvençalo de la Mediterragno.