Editouriau
dóu mes de desèmbre 2014
Reformo territourialo…
Aqueste cop, li regioun an troubali
bon countour
Après encaro sièis ouro de debat dins la niue dóu 19 au 20 de nouvèmbre, li deputa an counfierma soun vote dóu 23 de juliet pèr redurre lou noumbre de regioun de 22 à 13 en l’an 2016, contro l’avis di senatour qu’éli voulien 15 regioun en acetant de dessepara l’Alsaço e de counserva lou Lengadò-Roussihoun e Miejour-Pirenèu.
Dins quento soucieta se pòu marida li gènt contro soun grat ? diguè pamens un deputa alsacian, mai de-bado…
Parié pèr li deputa dóu sud que voulien se marida à l’Aquitàni pulèu qu’à Miejour-Pirenèu, mai diguèron sebo.
Fin finalo, tres regioun se n’en sorton li braio neto, la Bretagno, la Corso e la Prouvènço. Segur la Bretagno aurié pouscu reprene la Lèiro-Atlantico e la Prouvènço rousiga la Droumo emai lou Gard, mai acò se poudra faire plus tard, que s’es di, en assouplissènt lou “ dre d’oupcioun ” previst pèr permetre à-n-un despartamen de chanja de regioun quouro la nouvello carto sara en plaço en 2016.
En esperant, nosto lengo s’espandis dins quatre regioun que van devé chanja de noum… Sara l’escasènço pèr la PACA de redeveni Regioun Prouvènço. L’Aquitàni e lou Lengadò, an soun noum tout trouba, tant soulamen l’uno a lou païs basque e l’autro lou païs catalan que se podon pas escafa. Pèr la quatrenco regioun la volon bateja La Liouneso coume dóu tèms de la Gaulo roumano, sènso se soucita de l’Auvergno perdudo.
Li querèlo d’apelacioun van coumença… quau vai chausi, quau vai decida ?
Acò segur fara debat pèr lis eleicioun regiounalo de l’an que vèn. E poudren apoundre noste avejaire dins la tiero di revendicacioun en manifestant pèr la sauvo-gardo de nosto lengo, coume es previst, pèr se faire ausi di candidat is eleicioun regiounalo en 2015.
Dins tout, ço que demandan à nòsti quatre nouvèlli regioun es l’aparamen de la lengo d’oc, la lengo istourico de soun terraire.
Un Óufice publi pèr nosto lengo es adeja adouta pèr dos regioun, lis dos autro déuran segui e lou futur candidat à la Regioun Prouvènço aura de s’engaja a crea aquel Óufice, estènt qu’enjusqu’aro lou baile fai l’anguielo…
Aquel Óufice, que David Grosclaude (Aquitàni), Guihen Latrubesse (Miejour-Pirenèu) e Marcèu Matèu (Lengadò-Roussihoun) soun ana presenta lou 13 de nouvèmbre au Menistèri de l’Educacioun e au Menistèri de la Culturo à Paris, definira li principàli ligno d’uno poulitico en favour de la lengo, couóurdounara lis acioun entre li quatre regioun, subre-tout pèr l’ensignamen.
“ Pulèu que d’agué plusiours interloucutour ( un pèr regioun ), l’Estat n’aura dounc un soulet pèr elaboura uno poulitico lenguistico ” manquè pas de dire David Grosclaude, lou Counseié regiounau d’Aquitàni, en esperant de counèisse lou nivèu de participacioun de l’Estat.
Aquelo meno d’óufice eisisto deja en Bretagno e en Païs Basque souto la formo de Groupamen d’Interès Public.
De tout biais, au coustat de l’Óufice publi pèr la lengo d’oc i’aura un coumitat counsultatiéu coumpausa di principàlis assouciacioun de defènso de la lengo.
Adounc quatre regioun en liogo de cinq chanjara pas grand causo pèr l’ourganisacioun de l’Óufice emai fauguèsse encaro butassa la Regioun Prouvènço.
Bernat Giély
|
