Editouriau
dóu mes de febrié 2014
2014, e zóu …
La Un debat pèr ratifica la Charto à l'Assemblado
Moudificacioun de la Coustitucioun
L'eisamen de la proupousicioun de lèi pèr arriba à-n-uno moudificacioun de la Coustitucioun que permetrié de ratifica la Charto éuroupenco di lengo regiounalo e minouritàri s'es fa lou dijòu 22 de janvié à l'Assemblado Naciounalo.
Èron pas espés nòsti valènt deputa sus li banc de l'emicicle. Fau dire, pecaire, que venien, en debuto de sesiho de debatre sus lou cumul de mandat e de sauva encaro un cop soun privilègi reiau souto lou mandat dóu presidènt en eisercice… li cumulard soun aqui pèr la voulounta dóu pople enjusquo 2017.
I'avié pas li mémi figo dans la banasto à l'acamp que seguissié, se prepausavo rèn que d'espepidouna un article unique, en clar dins lou tèste : “ La Republico pòu ratifica la Charto éuroupenco di lengo regiounalo e minouritàri ”, aquelo Charto que fuguè soulamen signado en 1999 e que pas jamai se pousquè ratifica estènt que respetavo pas l'article 2 de la Coustitucioun, la lengo de la Republico es lou francés.
De-bon verai, pèr lou proumié cop despièi quinge an se presentavo un vertadié debat sus l'aparamen di lengo regiounalo à l'Assemblado Naciounalo.
Lou tresor di lengo de Franço anavo esbrihauda dins tóuti li charradisso.
Lou rapourtaire de la coumessioun cargado de redegi aquelo proupousicioun de lèi, Jan-Jaque Urvoas, n'i'anè tout d'uno de sis esplico pèr moustra lou judice de la redacioun d'aquel article unique emé si declaracioun interpretativo.
La Menistro de l'Educacioun naciounalo, Aurelìo Filippetti, fuguè pièi pas en rèsto pèr tourna pourta acò en paumo de man e batre tant lèu lou rampèu pèr davera lou vote di cinq part tres di deputa en favour d'aquelo proupousicioun de lèi.
La voutacioun pèr aquel article unique que duerbié bouniassamen la poussibleta de ratifica la Charto pareissié simple, pèr pas dire simplet.
Se poudié pas crèire que lis ussard negre de la Republico anavon mounta mai à la recargo, e pamens, bèu proumié, un Prouvençau, fièr de servi un Estat centralisaire, Enri Guaino, venguè pèr restanca tout acò dins l'encastre d'uno moucioun prealablo, e de pica tantost sus l'arescle, tantost sus lou tambour. La Charto éuroupenco es un dangié pèr la Republico, nous vai mena plan-planet à-n-uno meno d'apoucalùssi coumunitaristo, un retour à l'Age-Mejan, “ La lente désagrégation de la Nation en une juxtaposition de particularismes, de communautés et de tribus, oui, c'est bien le risque que nous prendrions.” Se comto 175 lengo regiounalo, mai se vèi em'acò la duberturo óuferto pèr la Charto, noun pas rèn qu'i lengo regiounalo, mai tambèn i lengo minouritàri valènt-à-dire pèr éu i lengo de l'inmigracioun, lou berbère e l'arabe dialeitau vuei, e deman perqué pas lou chinés, lengo regiounalo de Franço.
Aqui, lis àutri deputa presènt ié faguèron la bramado, mai de-bado.
Lou digne eiretié de l'abat Grégoire troubè pamens uno fidèlo en la persouno de Marioun Maréchal-Le Pen, la deputa de Vau-Cluso, que repepiè tranquilet sus lou meme item.
Urousamen la grando armado dis aparaire di lengo regiounalo èro aqui, emé en ferre de lanço li deputa bretoun.
Tóuti, à-de-rèng, i'anèron coutrìo pèr afourti la necessita e l'urgènci de ratifica la Charto éuroupenco que legitimarié l'ensignamen e l'emplé di lengo regiounalo dins la vido vidanto de noste païs.
Segur i'aguè pamens de discutido e d'amendamen pèr faire leva li quàuqui reservo qu'acoumpagnon aquel article unique. Coume l'afourtiguè Pau Molac, sarié mestié de supremi dins la declaracioun interpretativo lou passage qu'impauso lou francés i persouno de dré public e priva, ço que poudrié à terme coundana l'ensignamen dins d'escolo privado coume li Calandreta e tambèn la difusioun d'emissioun de televisioun en lengo regiounalo sus la cadeno publico FR3. Soun amendamen coume d'àutri dins la memo draio fuguèron foro-bandi.
S'ausiguè tambèn forço deputa demanda tant lèu uno lèi pèr l'ensignamen e l'aparamen di lengo regiounalo sènso espera la revisioun de la Coustitucioun.
De mai, lou deputa Marc Le Fur, qu'èro d'aquéli, ensistè pèr counèisse lou calendié que menarié à la ratificacioun de la Charto. Davans lou mudige de Madamo la Menistre, baiè soulet lou debanat pous-sible : lou vote à l'Assemblado Naciounalo, e, s'es favourable, lou vote au Senat, pièi, se soun tóuti d'acord, l'acampado di deputa e senatour en Coungrès à Versaio vo bèn un referendum pèr moudifica la Coustitucioun rèn que pèr apoundre “ La Republico pòu ratifica la Charto éuroupenco di lengo regiounalo e minouritàri ”. Acò se jogo à l'incertan… n'en soun à se demanda s'apounchon pas de jounc em' uno masso.
Basto ! emai i'aguèsse lou presidènt dóu Partit de Gaucho, Jan-luc Melenchon que se diguè contro la ratificacioun de la Charto, dins uno poulido letro adreissado i deputa, aquelo sesiho fuguè un recounfort pèr tóuti lis aparaire di lengo regiounalo… Vèire e entèndre autant d'elegit veni presta ajudo reviscoulo noste mounde !
Lou vote óuficiau se fara lou dimars 28 de janvié, lou numerò de febrié de “Prouvènço d'aro” sara deja vers l'empremèire, publicaren la resulto que lou mes que vèn, en pregant à man jouncho que se troubara la majourita necito.
FLNP
Es pas en causo dóu debat sus li lengo regiounalo à l'Assemblado Naciounalo, mai se capitè qu'aprenian lou meme jour que lou FLNP, un groupe independentisto prouvençau venié de faire peta uno boumbo davans lou Cèntre di Finanço publico de z'Ais.
L'esplousioun se faguè à 4 ouro dóu matin, emé, urousamen, que de degat materiau.
Sèmblo que sarié li mémis independentisto qu'avien revendica d'atentat devers Brignolo l'an passa.
Un Frount de Liberacioun Naciounalo de Prouvènço, acò, segur nous espanto…
Lou Counseié municipau d'Ais, Arvè Guerrera, tambèn Counseié regiounau a dis que nàni, l'aparamen dóu païs de Prouvènço passo pas pèr d'agressioun pariero, e de ramenta que lou mistralisme fuguè jamai un mouvamen vióulènt : “ Es dins un encastre demoucrati e renouva pèr la participacioun dis estajan e pèr la proussimeta loucalo e regiounalo, que lou debat dèu agué liò.”
Bernard Giély |
