Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de fébrié 2015

 

Gouvèr territouriau…

Li counsèu en poulitico chanjon rèn que de noum

Li couleitiveta loucalo chanjon de voucabulàri, lou mes que vèn es pas lis eleicioun cantounalo que se faran, mai lis eleicioun despartamentalo pèr ramplaça li counseié generau en de counseié despartamentau que s’acamparan pas au Counsèu generau, mai au Counsèu despartamentau.
Lou bon chanjamen sarié belèu esta de supremi tout aquéu bèu mounde e de baia mai de poudé e coumpetènci i nouvèlli Regioun pèr redurre coume se demando toujour lou milo-fueio di couleitiveta territourialo.
Mai basto, es coume acò, lou grand soucit di Counsèu despartamentau sara de chanja soun papié d’en-tèsto e si pancarto pèr bèn moustra sa nouvello apelacioun countourroulado.
Lou grand chanjamen pamens sara l’eleicioun d’aquéli counseié. Li saberu dóu gros grum de la poulitico pouliticiano nous an enventa l’escrutin binouminau à dous tour.
Es-à-dire qu’anan elegi un binome. Li candidat déuran se presenta en binome.
Lou binome es l’espressioun algebrico de dous mounome, mai aqui sian dins la noumenclaturo dis èstre vivènt, dos persouno soun pegado, elegido ensèn coume de marida, tant soulamen an pas lou dre d’èstre dóu meme sèisse, es óubligatòri que lou binome siegue coumpausa de persouno de sèisse diferènt, un ome, uno femo. Aquelo reparticioun dins lou binome se ié dis la parita coume l’egalita, la fraternita… Es adounc aro assegura…  sara un scrutin binominal mixte majoritaire à deux tours pèr èstre bèn clar.
Ansin anan vouta pèr un parèu.
Se poudié pensa qu’aquéli, un cop elegi, anavon se parteja à egalita la remuneracioun de Counseié despartamentau… Oh! que noun, li dous mèmbre dóu binome eiserçaran soun mandat independentamen l’un de l’autre, adounc chascun soun gatèu.
Lis eleitour agantaran pas la favo.
Aquelo nouvello reglamentacioun eleitouralo aurié pouscu prene en comte li proumesso dóu presidènt de la Republico emé l’aplicacioun dóu vote à la proupourciounalo e lou respèt dóu noun-cumul de mandat. Mai que noun, tóuti li pelot de la poulitico poudran mai multiplica si porto-fueio, encencha de si cherpo e taiolo barioulado pèr s’óucupa de tout, de founs en cimo.
Quant à l’escrutin proupourciounau sara vo sara pas pèr deman, de tout biais es pas pèr vuei.
Que li Counseié despartamentau siegon elegi en noumbre proupouciounau à-n-aquéu di voues óutengudo sarié trop facile. L’escrutin à dous tour coumplico à bèl esprès, e costo car à ourganisa, mai permet rèn qu’i grand partit de se parteja lou gatèu.
Aquéli qu’auran pas davera 12, 5 % di voues au proumié tour anaran pinta de gàbi… Li gabiolo roujo e jauno soun pèr nous-autre après aquelo eleicioun bèn reglamentado.
Saupre se troubaren de binome que parlaran en lengo nostro ? Se pòu pas devina… lou saupren lou mes que vèn.

Pèr aro, poudèn aprecia la pourtado de la darniero eleicioun, èro aquelo di senatour. S’elegisson entre éli dins soun mounde poulitician, es pas gaire demoucrati, mai prenon lou poudé sènso vergougno pèr sieja, coume se dis, dins la chambro auto dóu Parlamen segound lou sistèmo dóu bicamerisme, an sa cadiero reservado au Palais dóu Lussembourg à Paris, souto la survihanço de la Gardo Republicano.
Dins aquel emicicle li cadiero s’abenon pas… adounc se pòu dire que li senatour rèston pas d’assetoun, travaion, que !
Pèr acò, estènt que li nouvèu senatour avien pres plaço après la darniero eleicioun soun esta counvida pèr se bouta tant lèu à l’obro.
Avien à l’espèro la proupousicioun de lèi pourtant ratificacioun de la Charto éuroupenco di lengo regiounalo, adeja voutado favourablemen pèr li deputa, mai l’an pas encaro agantado. Lou Felibrige avié pamens counvida tóuti li senatour de noste païs à lèu lèu vouta aquéu tèste, mai de-bado. Soulet lou senatour de l’Audo, Rouland Courteau, prenguè la peno de respondre coume defensour de noste patrimòni lenguisti.
Li senatour de Prouvènço soun resta mut, tant acò ié fai soucit…

 

Bernat Giély

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat