Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de juliet et avoust

Lou Grand Marsiho en Prouvènço

Lou grand relarg

Après l'anóuncio de crea lou Grand Paris, uno grando coumunauta que recamparié Paris intra-muros e tóuti li banlègo, grando e pichoto, la segoundo vilo de Franço, Marsiho, poudié pas resta tancado, subre-tout qu'au mitan lou Grand Lioun es deja fa, e lou Grand Niço vai rousiga lou terraire regiounau.

Aro es de bon vèire que lou presidènt Nicolas Sarkozy vòu faire capita soun proujèt de Grand Paris, estènt qu'a nouma lou 18 de mars passa, Crestian Blanc, secretàri d'Estat carga dóu Desvouloupamen de la regioun capitalo.
La cuberto es mai tirado vers l'embourigo de la Franço. Segound lou journau Le Monde, Nicolas Sarkozy es "convaincu que la croissance de l'économie nationale est en grande partie tributaire de l'attractivité de Paris et de sa région".
Lou restant es toujour lou desert francés.

Adounc falié se manda à l’aigo pèr un Grand Marsiho, l'idèio es pas nouvello, lou Club d'échanges et de réflexions sur l'Aire Métropolitaine Marseillaise travaio sus aquéu proujèt despièi 1990.
Marsiho dèu deveni la capitalo de la Mediterragno, emé pèr proumiés óujeitiéu de participa à l'espelido memo de l'Arc mediterran, d'acrouca soulidamen soun espàci au cèntre de gravita dóu Nord de l'Éuropo e de jouga un role d'interfàci entre l'Éuropo e la Mediterragno.
Es tout vist que l'encountrado marsiheso es un ensèn ecounoumicamen dinamic emé de noumbróusis ativeta coumplementàri lis uno dis autro.
Ansin se poudrié prepausa uno espandido coumunautàri à l'entour de Marsiho sus diferèntis escalo :

- L'escalo 10, valènt-à-dire un ciéucle de 10 kiloumètre de diamètre à parti de Marsiho, tant soulamen coume i'a la mar d'un coustat, acò fai que la mita d'un ciéucle. Sian encaro aqui dins lou terraire coumunau.

- L'escalo 50, sarié un quadrilatàri Fos-Seloun-Aubagno-La Ciéutat. Se despasso gaire lou relarg di coumunauta de vilo d'aro.

- L'escalo 150, es lou delta dóu Rose que cuerb l'espàci que vai de Seto, mounto en Aurenjo e redavalo sus Iero.

- L'escalo 500, es adeja l'Arc Mediterran de Barcelouno à Gèno, qu'en mai d'acò s'espandis sus Toulouso, Lioun, Turin e Milan.

Fin finalo, vuei es sus l'escalo 100 que se bastis lou proujèt de Grand Marsiho. Un ciéucle que mounto enjusco Avignoun e s'en revèn sus Touloun.

Lou troumpetaire dóu proujèt es Renaud Muselier, lou souto-presidènt de la Coumunauta urbano "Marsiho-Prouvènço-Metroupolo" que vòu enventa, coume dis, la vilo de deman.

Pèr èstre au nivèu di gràndi metroupolo que soun Milan, Munich o Barcelouno fau regroupa li pole ecounoumi sus lou gros mesouioun de Marsiho. Aquéu nouvèl aire urban que prepauso recamparié aperaqui 1 milioun 600 milo estajan.
Lou proublèmo mage es qu'un Grand Marsiho dèu franqui un fube de barragno amenistrativo e pouliticiano.

Enjusco aro, li regroupamen de vilo respondon mai à de preóucupacioun poulitico qu'ecounoumico.
De mai, li pichòti coumuno fougnon pèr se leissa restaca à-n-uno grando vilo.
Lou Grand Marsiho vai trouba aquéli trigoussado d'un coustat, e pièi li raro despartamentalo de l'autre.
La nouvello metroupolo s'estalouiro sus tres despartamen, Bouco-dóu-Rose, Var, Vau-Cluso, valènt-à-dire que vai rousiga sus li prerougativo di Counsèu Generau, e li baroun que soun à la tèsto d'aquéli couleitiveta van pas lacha soun froumage.

Basto, lou Grand Marsiho, que s'asseto sus un bacin de vido ounte travaion e se desplaçon li Prouvençau, dèu reüssi à s'afranqui di limito amenistrativo que daton de l'an pèbre.
Renaud Muselier l'an bèn coumprés davans la levado de bouclié de la vilo de z-Ais : « Se parlan de perimètre, evoucan la gouvernanço e jalan tout. La vesioun dèu s'apiela sus de councrèt. Pas besoun d'èstre de gaucho vo de drecho pèr desvouloupa trasport, gestioun de l'aigo e dis escoubiho, emplé vo culturo ».
Lou proujèt se capito tambèn dins la draio de la reformo Balladur sus li couleitiveta territourialo.
La Franço a trop de coumuno, la Prouvènço tambèn. Rèn que lou despartamen di Bouco-dóu-Rose comto 119 coumuno ; 15 qu'an pas soulamen 1.000 abitant ; 54 que soun d'escambarloun entre 1.000 e 5.000 abitant ; 26 entre 5.000 e 10.000 ; 13 entre 10.0000 e 20.000 ; 8 entre 20.000 e 50.000 ; 3 an mai de 50.000 abitant.
Emé lou Grand Marsiho, sarié un biais d'escouba dins la fourniguiero, mai sabèn proun que lou risque es de groussi encaro un cop lou milo-fueio di couleitiveta territourialo. S'es crea de Regioun pèr supremi li despartamen, li despartamen soun resta. S'es crea de coumunauta de vilo pèr supremi de coumuno, tóuti li coumuno soun restado. Dison qu'acò es de palié de demoucracìo, faudrié pulèu dire de marcho, d'espigoun pèr ajuda lis elegit de touto meno à mounta emé de cumul de mandat n'en vos n'en vaqui, à bóudre.
Chanjaren pas aquéu bèu mounde. Lou Renaud Muselier n'es counsciènt quand dis :
"Fau aprene à jouga couleitiéu, es lou soulet mejan de gagna".
Soun Grand Marsiho, pas proun de restaca Avignoun poudrié mounta enjusco lou port de Lioun coume baso arriero dóu port de Marsiho. "Avèn d'atous counsiderable : Iter à Cadaracho, li pole de coumpetitiveta, li pole ecounoumique pourtuàri, lou regroupamen di tres universita de z-Ais-Marsiho, e Éuromediterragno, la souleto óuperacioun d'interès naciounau en Franço, que viso à trasfourma 300 eitaro. Sènso óublida lou pargue di Calanco, li zono franco vo encaro "Marsiho Prouvènço", capitalo éuroupenco de la culturo. Avèn sachu desvouloupa tout acò, fau ana mai liuen."
Lou countrat d'agloumeracioun d’aquéu Grand Marsiho poudrié èstre signa tre l'an 2013.
Faudra belèu ramenta, aut e fort, qu'aquéu terraire es d'en proumié prouvençau, que la lengo istourico d’aquéu païs es toujour gaiardo. Li baile de la Culturo auran de l'ausi coume lou Renaud Muselier que l'entendra dous cop, estènt sa qualita de presidènt dóu Counsèu culturau de l'Unioun pèr la Mieterragno. Aqui mai, nosto lengo dèu trouba sa plaço.

Pèr aro, sian mai en retard, lou Grand Lioun festejo si quaranto an. Emé 57 coumuno e 1, 5 milioun d’estajan. An pas crento de dire qu’acò s’es fach à la liouneso, poudren pas dire que lou Grand Marsiho s’es fach à la marsiheso, farié galeja, mai perqué pas à la prouvençalo… De tout segur, lou Grand Lioun estalouiro aro quàuqui grand proujèt urban “Counfluènci” entre Rose e Sauno que sèmblo un pau Éuroumediterragno, "Porto dis Aup" qu’enausso li teinoulougìo de pouncho, emai "l’anèu blu" que reameinajo li canau e li reservo naturalo.

I’a mai de quaranto an, li Marsihés dóu port vièi se garçavon di Liounés.
La rodo viro.

 
Bernat Giély
 
 
Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com
 
 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat