Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de mai

Republico Federalo e Demoucratico di Païs d’Oc

La Proumiero Republico Federalo e Demoucratico di Païs d’Oc vèn de coustituï un Gouvèr Prouvisòri Óucitan óuficialamen prouclama à Toulouso lou 24 de mars 2007 e presenta à Marsiho lou 26 d’abriéu 2007.

 

 
Lis Oucitan soun pèr la Republico... o mai pèr la Republico óucitano!
Sian pas satisfa de l’estat francés. Agué la Republico di Païs d’Oc permetrié enfin lou plen respèt di dre de l’Ome. Atualamen en Franço, la situacioun es l’inegalita entre li citouien: lis Óucitan podon pas viéure dins sa lengo.
Adeja à l'epoco di revendicacioun de Mistral e dóu Felibrige, li poulitique dis estat centralisto nous couiounavon, en discours, jougavon la divisioun (religiouso, dialeitalo, grafico) e viravon la causo en ridicule prouvincialisto, estremisto, museografique, etc… Se servon toujour de nautre. Mai noste pople a counsciènci de si racino e vòu ana de l'avans.
Si la Franço defènd lou francés, li Païs d'Oc defèndon sa lengo, la lengo d'Oc. E pèr acò, nous fau un poudé em’ un gouvèr propre aguènt uno poulitico ativo pèr supourta la lengo d'Oc, arresta la casudo dóu noumbre de loucutour e promóure la lengo dins la soucieta.
Emé l’independènci d’Óucitanìo en raport à la Franço, voulèn arresta aquesto soulidarita à sèns unique, crea direitamen d’àutri soulidarita emé lis àutri Païs éuroupen dins uno Éuropo federalo e demoucratico di pople. Pas pèr li frountiero dis estat-nacioun!
Aro, la diferènci entre un naciounalisto óucitan e un naciounalisto francés tèn en acò: quand sa patrìo es óucupado, lou naciounalisto óucitan defènd l’eisistènci meme de sa nacioun, alor que lou naciounalisto francés a plus rèn à prouva mai defènd si pousicioun emperialisto.
L'annado venènto, l'autonoumìo!
Lou jour se lèvo en Óucitanìo!
 
Dicho di mèmbre dóu Gouvèr
 
Discours de Moussu Miquèu Aguilera, Presidènt dóu Gouvèr Prouvisòri Óucitan pèr la Republico Federalo e Demoucratico di Païs d’Oc.
À pouncho d’aubo, lou jour se lèvo en Óucitanìo. Lou jour se lèvo pèr lou Pople d’Oc. Lou jour se lèvo, aro que se soun acaba, de siècle de vergougno, de bon e leiau servìci à la boto de quàuquis estat emperialisto. Lou jour se lèvo, tre que li trèvo di crema qu’encantavon encaro nosto memòri se bandisson dins la niue. Lou jour se lèvo. Sian d’ouro. Voulèn la liberta, touto la liberta, rèn que la liberta pèr noste Pople. Plus jamai voulèn èstre encadena i canoun dóu coulounialisme.
En 1992, li Jacoubin an modifica l’article 2 de la Coustitucioun, estènt que falié lucha contro un anglò-sassoun qu’èro un pau mai qu’envasidou. Mai en fa, èro pas verai; dins aquéu tèms, an vougu subre-tout amouraia nosto lengo, e li lengo de Franço, pèr mai nous courseta, pèr que fuguessian d’estajan doucile e monolengue. D’aro endavans, la souleto lengo permeso fuguè lou francés. Adounc falié pas charra que lou franchimand pèr èstre republican encò nostre.
Sian devengu, dempuèi 15 an, coume d’estrangié au dedins de noste propre païs. Uno meno d’andicapat de la paraulo, se se pòu dire ansin.
Pièi, i premìci de la Coustitucioun Éuroupenco, i’aguè coume un tremoulun de liberta pèr li Pople sèns Estat, à l’entour de la Charto Éuroupenco di lengo regiounalo e minourado, estènt qu’anavon, enfin avedre un biais de legitimita.
Mai aqui fuguè un noun categouri, venènt dóu soulet Païs di Dre de l’Ome: Franço.
Alor, fin finalo, un jour, coume l’a escri Rouland Pecout, d’ùni d’entre nautre, an decida d’avé rasoun, an decida d’eisisti.
Fau dire, tambèn, que fasié forço tèms que lou soulèu se levavo pas pèr lou Pople Nostre... Mai, de tout biais, coume faire pèr engimbra quicon pèr n’en sourti? Nautre se sentissian un pau soulet e ourfanèu.
Nietzsche disié quicon coume: — Soulet, avès toujour tort, mai, es à dous que debuto la verita.
Anavian, au dire d’ùni, aparèisse coume uno troupelado de farfadet? d’ideious? de la tèsto asclado... Schopenhauer escriguè que: — Touto verita passo pèr tres nivèu, d’en proumié: se trufo d’elo. Pièi es coumbatudo mort e dur. E, enfin es recouneigudo coume se fuguèsse evidamen veraio de-longo.
Adounc, lis Óucitan decidiguèron de se liga entre éli. (…)
Lou jour anavo enfin se leva, sus Óucitanìo... E fuguè ansin qu’avèn pouscu redigi ensèn, li Baso de Narbouno. Lou soulèu traslusissié l’istòri, Óucitanìo sourtié de l’ombrino. Pièi, avèn decida de coustituï un Gouvèr Prouvisòri Óucitan, au noum dóu principe de liéuro assouciacioun, e dóu drech imprescriptible internaciounau di pople à l’autò-determinacioun.
Aquéu gouvèr a pèr toco de redigi la proumiero Coustitucioun di Païs d’Oc, e d’èstre em’ abnegacioun e leiauta au service dóu Pople d’Óucitanìo.(…)
Es verai, que nosto founcioun es pas que provisòri, d’abord que l’eisecutiéu dóu GPO es pancaro eligi. Aquéli qu’esperavon uno armado de liberacioun saran bènléu, decebu, mai nosto representacioun es subre-tout simboulico. Sabèn que lou pople soulet es soubeiran. Touto legitimita déura passa pèr de voutacioun demoucratico. Oubraren pèr que n’en fuguèsse ansin.
Lou simbèu de noste gouvèr es uno couloumbo, aquelo dóu Roucas di Cremat de Mountsegur, proumiéri vitimo dóu poudé soubeirenisto e centralisto francés.
Sian d’ome e de femo liéure. Sian pas de separatisto. Voulèn manteni de liame emé Franço e àutri Pople. Volèn pas de vióulènci, oubran pèr la Pas e la Justìci. Aquelo resoulucioun passo pèr lou perdoun, en visto d’uno recounciliacioun frairenalo di Nacioun au dedins d’Éuropo. Mai, subre-tout, lou perdoun es supausa de faire uno reparacioun, adounc uno di clauso sara de recounèisse la legitimita de nosto crido, en visto de tourna Óucitanìo is Óucitan. (…)
Visco la Republico Federalo e Demoucratico Óucitano!

Discours de Moussu Laurèns Revest, Proumié Menistre dóu Gouvèr Prouvisòri Óucitan
Acampa à Toulouso en aqueste dissate 24 de Mars 2007, prouclaman vuei, l’eisistènci d’un Gouvèr Prouvisòri Óucitan pèr uno Republico Federalo e Demoucratico di Païs d’Oc. Es pèr nautre un ate impourtant pèr faire recounèisse à bèus iue vesènt dóu mounde l’eisistènci d’uno nacioun óucitano.

Discours de Moussu lou Menistre de l’Ecounoumìo-Finanço, dóu Coumerce, de l’Industrìo, de l’Artisanat, de l’Agriculturo e de la Pesco.
… Lou segound rampèu es un retour à la definicioun de menistre. Lou terme de menistre vòu dire etimoulougicamen servitour. Pènse que d’ùni an un pau óublida aqueste sèns. Es precisamen aquesto founcioun de service que m’óubligue de rampli, coume Menistre de l’Ecounoumìo: un service au proufié de l’Óucitanìo e dóu pople óucitan dins sa toutalita: caumaire, salariat dóu priva o dóu publi, artisan, coumerçant, independènt, cap d’entrepreso. Un service fin de countribuï à ameioura lou quoutidian de cadun. Aro, ecounoumìo rimo emé souciau. (….)
MM. Aguilera et Revest, tel. 06.83.11.73.82 e 06.81.36.81.71.
Site internet: http://gpo.identitat-d-oc.net.
Adresse mail:
gouvernement_provisoire_occitan@hotmail.com.
T. D.
 
Coumpousicioun dóu Proumié Gouvèr
 
- Miquel Aguilera (Prouvènço), Presidènt.
- Laurèns Revest (Niço), Proumié Menistre.
- Franceso Diener (Lengadò), Menistère de la Santa e de l’Envirounamen.
- Secretairis especialisado à la Santa: Alino Corbalan.
- Felip Bonnet (Gascougno), Menistre de l’Ecounoumìo-Finanço, dóu Coumerce, de l’Industrìo, de l’Artisanat, de l’Agriculturo e de la Pesco.
- Secretaire especialisa au menistère de l’Agriculturo e de la Pesco: Frantz Venes.
- Secretaire especialisa au menistère à l'Artisanat: Daniel Noël.
- Marina Bec (Lengadò), Menistro de la Jouinesso, dis Esport e dis Afaire Souciau.
- Secretairis especialisado au menistère dóu Souciau: Couleto Fraisse.
- Jaque Ressaire (Prouvènço), Menistre de la Culturo, de l’Educacioun e dis Art.
- Secretairis especialisado au menistère à l'Educacioun: Celino Bec.
- Valerìo Frechoso (Prouvènço), Menistre de la Coumunicacioun, de l’Enfourmacioun e di Trasport.
- Secretaire especialisa au menistère à la Coumunicacioun, Enfourmacioun: Nicolas Laffont.
- Secretaire especialisa au menistère di Trasport: Renat Matalot.
- Savié Bada (Catalougno), Menistre de la Justìci.
- Secretairis especialisado au menistère de la Justìci: Assoumcioun Amat.
- Jan-Marc Pellet (Dóufinat dóu Miejour), Menistre dis Afaire Estrangié, de la Defènso e de l’Interiour.
 
 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat