Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
   

Editouriau dóu mes de nouvèmbre

Erian mai de 10.000 lou 22 d’óutobre à Carcassouno

Estabousi, esbalausi, estrambourda, espanta, countènt, urous e rèire-urous, n’en sian encaro beat, la manifestacioun pèr la lengo lou 22 d’óutobre à Carcassouno a recampa mai de 10.000 persouno.

   

Franc di manifestacioun bessounado emé l’aparamen dóu Larzac, jamai s’es recampa tant de mounde pèr sauva nosto rebello lengo d’oc.
Avèn pamens tirassa nòsti groulo dins de mouloun de passo-carriero que siegue Toulouso, Mount-Pelié, Clarmount vo Marsiho à crida nosto revòuto, mai pecaire jamai autant de manifestant se soun desplaça.

Crentous e timoura, d’ùni afourtissien deja que falié pas plus davala pèr carriero, acò farié vèire nosto feblesso, sian pas proun noumbrous, nous pourtarié mouiso.
Aquéli d’aqui podon beissa l’alo, sian encaro un pople fièr e libre, Carcassouno vèn de nous baia mai que mai fisanço en l’aveni de noste parla.

Lou journau "L’Indépendant", diguè à la uno qu’èro "La déferlante", de bon verai, coume uno erso que salivo, la manifestacioun s’estiravo e s’espandissié sènso n’en jamai fini.
De drapèu e de bandeirolo à moulounado acoulourissien lou courtège pèr ramenta nosto identita e nosto revóuto. Pau à cha pau li carriero de Carcassouno s’emplissien de mounde vengu d’en pertout, despièi la Vau d’Aran enjusqu’i valado piemounteso d’Itàli.
Li catau e lis elegit en tèsto tenien à la man la grando bandiero pourtant revendicacioun pèr la lengo. Pièi venien touto meno de group, de cantaire, de musician. Se cantavo, se jougavo, se cridavo, se dansavo... un bèu soulèu enluminavo la grando parado.
Li prouvençau se retroubavian un pau esparpaia dins aquelo erso umano, se vesié pamens li bandiero d’Arle, de z’Ais, de Marsiho, de Niço, de Touloun, e bèn-segur la chourmo de Prouvènço d’aro aubouravo la siéuno. La presso loucalo s’avisè bèn-segur que li gènt de Prouvènço èron aqui, acò s’entend "le chuintement des Limousins voisine avec les finales douces des provençaux".
Basto, erian pas soulet, un cop endraia, li manifestant poudien pas remounta lou courtège vengu trop long, semblavo uno toro roujo e jauno qu’engoulissié li kiloumètro.

De mounde e de jouine

De-bon, sian toumba dóu quiéu davans la moulounado d’aparaire de la lengo vengu à Carcassouno.
Pamens es d’à genouioun que falié toumba, quand se sian avisa que la maje part di manifestant èron de jouine.
"Surprise : les manifestants étaient plutôt jeunes", escriguè dins lou journau "La Dépêche du Midi".
Se li Calandreto èron vengudo en troupo de tóuti li despartamen, li militant dis assouciacioun d’aparamen de la lengo èron tambèn mendre d’age.
Lou couleitiéu "Anen !Oc, pèr la lengo óucitano" avié sachu touca la jouinesso. Lou vot de Frederi Mistral "vous àutri li gènt jouine que sabès lou secrèt, fases que noun s’arouine lou mounumen escrèt" emai siegue pas au front de la Tourre Magne, s’es coumprés sus li bàrri dóu castèu dóu Comte Trencavel à Carcassouno lou 22 d’óutobre de 2005.
Devers sièis ouro de vèspre, li manifestant envahiguèron la ciéuta istourico.
Sus un pountin au pèd de la tourre de La Vado li baile de la manifestacioun reprenguèron nòsti revendicacioun, uno letanìo, belèu, de dicho e redicho, pèr nautre, mai uno rampelado martelado de tout lou pès de 10.000 persouno.
L’apèu de Carcassouno que Jan-Louis Blenet, lou presidènt di Calandreto e David Groclaude lou presidènt de l’IEO, sachèron, faire clanti. Segur, coume l’an di: Carcassouno es qu’uno estapo, i’aura un après Carcassouno. Sus aquel espèr l’inne dóu païs d’oc "Aquéli mountagno", canta pèr de milié de voues ressounè dins li muraio de la fourtaresso.
Lou 22 d’óutobre à Carcassouno lou pople dóu Miejour a retrouba lou bon camin pèr recounquista l’empèri de sa lengo.

Bernat Giély

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat