Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de setèmbre 2016

 

S’es toujour parla la bello lengo franchimando en Franço…

Uno lengo óuficialo e pas mai !

 

En ciberespàci

L’envòu de nosto lengo

O, bèn segur poudèn plourineja : lou libre numerique es à mand de ramplaça lou libre papié e la prèsso papié coundanado à mouri…
à quau n’es la fauto… au “  prougrès  ”… se dis que s’arrèsto pas… s’espandis plan planet emé lou tèms que passo… mai vieiis pas, es quicon de toujour nouvèu.
Lou barrulaire enfourmati qu’escracho l’empremarié es à l’obro se fau leva dóu mitan…

La trasmessioun de nosto lengo pòu pas escapa au fenoumène e passo aro pèr internet…
Es tout vist, que pèr trouba uno librarié que prepauso à la vèndo lou libre en lengo nostro que cercan, es pas un pichot afaire, acò ’s lou pica de la daio… Mentre que sus la telo d’internet es tout trouba…
E quand lou libras es numerisa e se pòu legi tant lèu à l’escran sènso rèn paga, acò se fai eisa !
La moulounado de mounde que counsulton lou site dóu C.I.E.L.d’Oc n’aporto toujour la provo, la provo que la proumoucioun de nosto lengo fai avans emé li libre numerisa.
Fai avans sènso countèste, n’avèn agu la bello provo aqueste estiéu dins un acamp au CIRDOC de Beziés que recampavo tóuti li partisan d’aquéli mejan mouderne de coumunicacioun.
Afouga pèr la sauvo-gardo de nosto lengo, passiouna pèr la recerco de sis escrit, fin teinician dins la mestrìo de l’óutis enfourmati, saberu toujour à la pouncho dóu prougrès pèr la publicacioun sus internet de tèste courreitamen aligna sus li normo internaciounalo, èron aqui presènt vengu de tout lou païs d’oc, pèr escambia e parteja si couneissènço e soun travai pèr que mai e de-coutrìo faire la proumoucioun de noste lengage dins lou mounde entié.
Lou ravimen fuguè tambèn de rescountra tant de jouine apetega à-n-aquelo obro. Pecaire, la chourmo dóu C.I.E.L. d’Oc, emé si vint an d’age de soun cèntre, erian li plus vièi… countènt pamens de vèire que dins aquéu doumaine la relèvo èro assegurado.
(De legi pajo 6 e 7)

 

En Corso

L’assassinat di lengo regiounalo

Lou proumié menistre, Manuèl Valls, l’es mai vengu dire en Corso à la debuto dóu mes de juliet :

“ La Republico a uno soulo lengo óuficialo, lou francés, car es praticado pèr tóuti. Revendren pas bèn segur sus aquéu principe ”.

Es praticado pèr tóuti perqué l’escolo de la Republico parisenco a fa soun proun pèr nous la leva de bouco.

Jan-Gui Talamoni, avié pamens pas manca de dire en lengo corso à la debuto de soun mandat ço que voulien : “ En voutant pèr li naciounalisto, lou pople corse a di que la Corso èro pas un moussèu d’un autre païs, mai uno nacioun, emé sa lengo, sa culturo, sa tradicioun poulitico, soun biais d’èstre au mounde ”.

E t’avien vouta la cou-ouficileta de la lengo corso emé lou francés sèns se soucita que l’article 2 de la Coustitucioun “ La lengo de la Rebublico es lou francés ” èro toujour aqui, inamouvible.

Lou chèfe dóu gouvernamen bèn segur i’es ana de sa ranganello : Paris gouverno dins sa lengo e pas mai, i’a uno ligno roujo que fau pas franqui…

Mai pecaire que ié diguè Jan-Gui Talamoni : “ La cou-ouficialita es pas un caprice… Un païs coume la Franço pòu countunia de refusa à-n-un pichot pople, lou dre à l’eististènci ? ”

Te crese, vese toun mourdant te vòu baia un os à rousiga, vaqui : se vai crea uno nouvello agregacioun pèr la lengo e la culturo corso emé pièi pèr óujeitiéu uno filiero bilengo dins chasque establimen escoulàri.
Lou tour es jouga, la virado dóu Manuel Vals a capita…

 

En Païs d'oc

La mort de nosto lengo

Paure de nous-autre, s’espèro la rintrado escoulàri pèr tira un comte, mai la reformo di coulège dóu Gouvèr s’es pas un comte d’abouticàri, viro pas bèu, sara de-bon un arrestamen de comte…
L’ensignamen de nosto lengo dins lou segoundàri, es sus l’arpo de la mort.
Lou fau pas dire, e carga un grand chut… senoun lou menistre nous vai veni leiçouna.

 

 

Bernat Giély

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat