Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de janvié

Em’ un Coungrès... l’APORLOC
vèn d’acaba soun obro

L’APORLOC, Assouciacioun de Prefiguracioun de l’Ourganisme de Regulacioun de la lengo d’Oc, es estado creado en 2009. Soun apelacioun porto sa toco: alesti la futuro estruturo qu’aura pèr cargo de defini, manteni e difusa la coudificacioun ourtougrafico de la lengo d’Oc dins li doumaine coume la grafìo, la gramatico, la leissicougrafìo vo la toupounimìo.

Aquelo assouciacioun recampo :
— lis istitucioun de messioun publico (Institut d'Estudis aranesi, Chambra d'Òc, lo Cirdòc, l'InÒc Aquitània, lo Centre de Ressorças Occitanas e Meridionaus, lo Centre de ressorças pedagogicas de la Val d'Aran),
— la maje part di federacioun istourico de la lengo d’oc (Institut d'Estudis Occitans, Federacion deus Ensenhaires de Lenga e de Cultura d'Òc, Confederacion occitana de las escòlas laïcas Calandreta, Associacion Internacionau d'Estudis Occitans).
— l'Estat (Menistèri de la Culturo e de la Coumunicacion - D.G.L.F.L.F.).
— li couleitiveta territourialo que la soustènon e participon à sis istànci en qualita de membre counsultatiéu.

L’ajudo financiero es apourtado pèr lou Counsèu Regiounau d’Aquitàni, lou Counsèu Regiounau de Miejour-Pirenèu, lou Counsèu Regiounau de Lengadò-Roussihoun, lou Counsèu Regiounau de Rose-Aup, lou Counsèu Generau d’Aran e lou Menistèri de la Culturo e de la Coumunicacioun D.G.L.F.L.F.
Forto d’aquéu soustèn l’APORLOC a pouscu coumpli soun pres-fa qu’èro adounc de metre en plaço uno meno d’istitucioun scientifico e mouralo que representèsse lis usagié e li loucutour de l’óucitan, apela tambèn lengo d’oc, dins lou respèt de l’unita e de la diversita de la lengo.

Poussibleta de faire

Pèr saupre coume acò èro de faire, lou cargat de messioun de l’APORLOC, Benaset Dazeas, anè au rescontre d’istitucioun pariero à-n-aquelo que se dèu estigança : l'Institut d'Estudis Catalans, Euskaltzaindia - Academia Reiau de la Lenga Basca, emai Fryske Akademy. Anè tambèn escouta un mouloun de persounalita qualificado e d’usagié pèr ié permetre de precisa li messioun, tant coume li moudalita founciounalo e bugetàri d’aquéu nouvel ourganisme.
Un cop acaba, presentè soun raport sus ço que se pòu faire dóu biais que se pratico aiours. Mai pecaire, coumparo que coumpararas, la situacioun de la lengo d’oc en raport dis àutri lengo minourisado de Franço e d’Éuropo mostro soun inmènse retard dins li mejan e lis óutis necite à sa valourisacioun e à sa trasmessioun.
Lou tablèu de sintèsi di vesito dins lis Acadèmi mostro acò à bèus iue vesènt lou bèu travai que se dèu faire dins l’encastre d’un establimen parié. Frederi Mistral n’avié pantaia en creant lou Counsistòri di Majourau dóu Felibrige, mai aquelo assemblado de saberut troubè pas l’envans pèr s’impausa coume uno autourita lenguistico, chascun jouguè soun role de manjo-soulet. De resta d’assetoun 125 an sus lou Tresor dóu Felibrige acountentavo tout lou mounde. Fauguè espera l’eleicioun dóu Capoulié d’aro, Jaque Mouttet, pèr enfin coumprene que falié moudernisa lou diciounàri de Frederi Mistral, es l’obro entamenado pèr lou Counsèu de l’Escrit Mistralen que pòu mena tambèn i principe de la regulacioun lenguistico dins la draio apreparado pèr l’APORLOC.

Messioun de founs

Lou nouvel ourganisme prepausa pèr l’APORLOC vai agué tres messioun foundamentalo :

— la recerco scientifico, aqui dèu èstre en capacita de countribuï à garda parié l’usage de la lengo à respèt de soun identita propro, de sa situacioun d’aro e de sis evoulucioun…
— la regulacioun lenguistico, pèr pourta uno responso sus li “canoun” de la lengo dins lou respèt de la pluridialeitalita e de la trasversalita…
— la prouducioun d’óutis lenguisti de referènci, valènt-à-dire, diciounàri generau, gramatico generalo, diciounàri especialisa…
Li principe d’acioun soun clar, n’i’a cinq :
— La representativita: l’ourganisme de regulacioun de la lengo d’Oc dèu èstre representatiéu de la lengo. Dèu reüni la diversita de la demando dis utilisaire e la diversita di sabé sus la lengo…
— L’estabilita: l’ourganisme de regulacioun de la lengo d’Oc a pèr messioun la messo en plaço e lou desvouloupamen d’un ensèn de pratico nourmativo…
— La coulegialita di decisioun : em’ acò li membre de l’ourganisme soun tengu pèr soulidàri di decisioun presso couleitivamen.
— La difusioun de l’enfourmacioun que dèu s’alarga lou mai poussible…
— Lou partenariat: l’ourganisme travaiara en partenariat emé lis poudé pouliti que se voudran lis atour dins lou relarg de la lengo, d’en proumié li couleitiveta territourialo dóu païs…

La denouminacioun

Bèn-segur, revenguè au presidènt, Gibert Mercadié d’anouncia la fin de l’APORLOC e de presenta pèr lou dedut la nouvello istitucioun que pren pèr noum : “Lou Coungrès permanènt de la lengo óucitano”.
A pèr toco segound l’article 2 de sis estatut “de countribuï à la vitalita de l’óucitan apela tambèn lengo d’Oc…”.
En mai de soun assemblado generalo e soun counsèu d’amenistracioun, un Counsèu lenguistic e un Counsèu dis usagié participaran au travai pèr la regulacioun de la lengo.
Aro la toco es dounado, se fau groupa à l’obro.

Aro la toco es dounado, se fau groupa à l’obro.

 

Bernat Giély

Pèr mai d’entre-signe :
APORLOC
Lou Counsèu permanènt de la lengo óucitano
InÒc - Castèth d’Este - BP 326
64141 Billère cedex
Site internet : aporloc.free.fr
Courriéu: autouritat-de-regulacion-oc@in-oc.org
 
 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 
 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat