Editouriau dóu mes de juliet e avoust La Biblioutèco numerico moundialo Sias pas sènso saupre que, tre l’espelido de l’internet encò nostre, uno chourmo de prouvençau se diguèron que falié sarra l’anguielo e se n’en servi pèr espandi li tresor de nosto lengo dins lou mounde entié, valènt-à-dire nosto literaturo que di troubadour enjusqu’i pouèto e roumansié mouderne d’aro fai mirando. Fuguè la creacioun dóu Cèntre internaciounau de l’escrit en lengo d’oc, lou CIEL d’Oc, l’idèio èro de numerisa tóuti li libre papié redegi dins noste parla e de li tremuda en libre eleitrouni, d’ùni dison en doucumen dematerialisa.

Pèr acò faire, se poudié foutougrafia li pajo uno à cha uno, e l’oubrage se poudié pièi legi à l’escran en «mode image», tant soulamen lou tèste rèsto aqui caia, se pòu pas manoubra dedins, cerca de mot, vo reprene d’escapouloun.
Adounc es la numerisacioun coumplèto emé la recouneissènço di caratère que se chausiguè pèr faire d’oubrage en mode tèste. D’aquéu biais, lou libre iniciau s’endevèn un fichié pèr l’ourdinatour, lou tèste es parié que s’èro esta pica sus lou clavié, se ié pòu naviga dedins, se n’en pòu moudifica la presentacioun, groussi li letro, mai subre-tout se ié pòu faire de recerco, se voulès saupre ounte Frederi Mistral a emplega lou mot «Marsiho» dins soun obro, pas besoun de tout relegi, l’aplicacioun enfourmatico vous meno dre sus lou mot. Pièi subre-tout se voulès prene de passage d’uno obro, sufis de faire uno còpi e de l’ana pega ounte voulès, à guiso de citacioun de l’autour. Enfin lis ensignaire de la lengo an d’oubrage aqui, à gratis, pèr travaia sus lou tèste emé sis escoulan.
Fuguè, de-bon, uno escoumesso, lou CNRS de l’Universita de z’Ais, prestè tant lèu soun ajudo, la coumuno de Berro baiè li loucau, lou Ciel d’Oc troubè d’emplega e despièi mai de dès an, tóuti li jour de doucumen escri dins noste parla soun numerisa, entira de soun papié pèr pousqué resquiha sus la telaragno de l’internet.

Sabian que la Biblioutèco Naciounalo sarié pas en rèsto e anounciavo souto la bandiero de “Gallica” un prougramo de numerisacioun de sis oubrage. Tant soulamen, èro tout vist qu’anavon pas se soucita en proumié di libre escri dins uno autro lengo que lou francés, la lengo óuficialo de la Republico. Pièi mai, sa numerisacioun èro bastardo, fan rèn que de reprouducioun en mode image, aquelo teinico es pas mai qu’uno estirado dóu vièi proucedat dóu microfilme. Se pòu legi lou tèste de la pajo se la fotò es bono. Es deja acò, l’interès es de pas agué besoun de se desplaça dins uno biblioutèco pèr counsulta l’oubrage. Gallica a tambèn rabaia quàuqui libre e revisto toucant nosto lengo, aperaqui un cinquantenau sus li 80.000 libre que prepauso à l’escran.
Lou CIEL d’Oc a realisa éu à l’ouro d’aro 688 libre e 268 revisto, mai en mode tèste jougant coume se dis sus la qualita, e festejara bèn-lèu soun proumié milié de doucumen.
Vaqui la toco dóu CIEL d’Oc a capita : espandi la lengo dins lou mounde entié, e subre-tout la pourta sus lou platèu de l’escran dins lis oustau sènso óubliga li gènt à se desplaça.
L’acès à la couneissènço d’oubrage rare sara plus un privilège pèr inteleituau furnaire vo couleiciounaire argenta.

Pamens, vuei, lou CIEL d’Oc coume Gallica riscon d’èstre nega pèr la gigantesco óuperacioun de numerisacioun de tóuti li doucumen d’archièu dóu mounde entamenado pèr lou mai grand moutur de recerco de l’internet, la soucieta americano Google.
Google prevèi de revira sus support enfourmati 15 milioun d’oubrage en sièis an, aperaqui 4,5 miliard de pajo. An de machinasso capablo de vira e d’escanerisa 600 à 1200 pajo à l’ouro. Li baile de la soucieta Google, Sergey Brin e Larry Page an fa saupre que voulien metre à la dispousicioun di legèire tóuti li richesso dóu mounde. Pèr que pas, es uno toco lausablo se la lengo prouvençalo es pas óublidado.
Mai, pèr aro, la biblioutèco virtualo dóu CIEL d’Oc es en avanço sus éli, emai aguessian pas li 170 milioun d’éurò de Google pèr faire avans.
Lou gigant american que s’aligno sus lou CIEL d’Oc pèr faire la publicacioun en «mode tèste» vèn pamens de s’embrounca sus la recouneissènço di caratère. S’avison que se la pajo es un pau embrutido, marcado d’un ple vo d’uno petoulo de mousco , li bèlli machinasso fan de cagado. Fau uno releituro emé un courreitour, es ço que fan bountousamen li sòci dóu CIEL d’Oc pèr nosto lengo.
Pèr Google vai ié doubla lou pres de soun óuperacioun, pecaire…
Viro que viraras uno pajo se tourno.
Li vièii biblioutèco d’Éuropo cridon deja à la mounoupoulisacioun americano, la Franço bramo sous exception culturelle e li baile dóu negòci ié veson qu’un afaire de sòu à la Bill Gates.
Nous autre sian segur de pas rèn vèire veni s’esperan Google pèr numerisa lis obro de Roumanille.
Sènso coumta que de proujèt councurrènt à l’óuperacioun de Google soun en camin is Indo e en Chino qu’an deja manda en ligno 50.000 oubrage e s’endraion vers lou milioun.
Adounc pèr garda li pèd sus terro, bèn tanca dins noste païs s’acountentaren encaro long-tèms de la Biblioutèco virtualo de noste CIEL d’Oc.

Bernat Giély

La chourmo de Prouvènço d’Aro se metra au fres au mes de juliet.
I’aura pas d’editouriau au mes d’avoust.
Se retroubaren pèr la rintrado, au mes de setèmbre.

Tricìo Dupuy
Direitriço dis Edioun