Editouriau dóu mes de juliet

La boulegadisso territourialo

Lou Felibrige, lou vesènt, dis aro soun franc valentin. La reformo di couleitiveta territourialo ié porto soucit.
D’efèt, l’Estat repren tourna-mai la man. Nous dis qu’après mai de trento an de descentralisacioun èro "tèms d’eisamina li dificulta rescountrado".
Lou grand esparpai di couleitiveta loucalo e la marrido reparticioun di coumpetènci entre aquéli galiniero fai que lou gouvèr te vai esplumassa tout acò. Lou gau, aro, sara lou prefèt de regioun, mèstre di basso-court territourialo.

Adoun, l’ouro es au regroupamen di couble: coumuno (36 789) e intercoumunalita (15 900) d’un las, despartamen (101) e regioun (26) de l’autre.
La reformo en proufoundour, coume dison, de l’architeituro istituciounalo loucalo coumenço pèr lou ramplaçamen di counseié generau e di counseié regiounau pèr un nouvèu tipe d’ome de terren, lou counseié territouriau.
Lou proublèmo aqui es coumtable, èron 5.660 counseié generau e counseié regiounau qu’an susa sang e aigo pèr servi soun païs, aro saran rèn que 3.471 counseié territouriau e se dedoublaran pèr sieja "dins lis istànci deliberanto dóu despartamen e de la regioun".
Se fau pamens pas faire de marrit sang, i’aura toujour de mounde à la pourteto pèr prene li plaço.
Segur que sara plus facile dins la Regioun Nord-pas de Calais, 4 018 644 abitant e soulamen 2 despartamen, que dins la nautro, 4 815 232 abitant e 6 despartamen.
Li nouvèu counseié territouriau de Prouvènço auran de pan sus la cledo.
Pecaire saran que 224 en liogo di 359 counseié despartamentau e regiounau que tirasson aro.
Basto ! sian pas dins lis ànci pèr éli.
Avèn subre-tout de pensamen pèr li coumpetènci di couleitiveta.
"La presènci territourialo de l'Estat es recentrado à l’entour de dous aisse : lou piloutage e la meso en obro di poulitico publico".
Em’ acò t’an trouba "la subsidiarita", un principe que reservo unicamen à l’espigoun superiour ço qu’à l’espigoun d’endebas se farié d’un biais pas tant eficace.
Adounc la culturo risquarié bèn de sourti di regioun pèr mounta rèn qu’à Paris, valènt-à-dire que la culturo prouvençalo s’escaparié vers la Capitalo.
Urousamen nòstis elegi soun mounta tant lèu sus sa figuiero, e fin-finalo la culturo coume l’esport restaran "dins li doumaine de coumpetènci partejado" emé l’Estat. Veiren bèn !
Se capito tambèn que dins lou meme tèms, un group d’estùdi à l’Assemblado naciounalo preparon uno proupousicioun de lèi pèr li lengo regiounalo que farié, pau vo proun, resquiha la defènso di lengo regiounalo dins li Regioun.
Aquéu group que recampo tambèn de bèu mounde de nosto Regioun volon demanda d’en proumié la recouneissènço di lengo regiounalo. Pièi baia à la Regioun la poussibleta de vouta un estatut óuficiau pèr la lengo de soun terraire.
Demai, li Regioun aurien óubligacioun de crea un ourganisme publi de desvouloupamen de la lengo de soun païs, un pau dóu biais de l’Óufice de la lengo bretouno.
Em’ acò prepauson la creacioun d’un ourganisme de couourdinacioun au nivèu naciounau pèr mena uno poulitico en favour di lengo regiounalo souto l’autourita dóu proumié menistre.
Un fube d’article d’aquelo proupousicioun de lèi pertocon pièi l’ensignamen, lou finançamen dis escolo assouciativo, la fourmacioun dis ensignaire… L’ajudo à la creacioun culturalo es pas óublidado.
Lis acamp d’aquéu group de deputa soun pas encaro acaba…

Descentralisacioun

Dins soun discours à la Felibrejado de Scèus, lou mes passa, lou Capoulié, Jaque Mouttet, a endraia lou Felibrige dins uno revendicacioun tourna-mai vengudo d’atualita :

Lou Cènt-cinquantenàri de Mirèio, l'an passa, nous moustrè à bèl èime la grandour e la moudernita de l'obro, mai tambèn li foundamento de la Reneissènço de la lengo d'O, de l'amo dóu païs, de l'idèio e dis amiro de Mistral.

Aquest an 2010 es tout ensèn lou 150en anniversàri de l'espelido de la Mióugrano entre-duberto de Teoudor Aubanel, que de coutrìo emé Mirèio counsacrè lou Felibrige. Es peréu lou Centenàri de la despartido d'Arsèni Vermenouze que nous fai souvenènço de sa forço d'amo, de soun ande esperitau e patriouti; sentimen qu'avènon nosto ahiranço pèr l'aplanage qu'escracho tóuti li jour un pau mai nosto dignita d'ome d'O, sentimen que nous aclinon à la refleissioun en un tèms proun tihous ounte nous volon rauba un pau mai de nosto liberta. E coume pas, au sujèt de la lengo, se souveni di paraulo de Fèlis Gras :
Au founs dóu pous enca souspiro… s'au pous anas escouta, sout li calado ausirés uno voues canta la liberta.

Demouran vuei sèmpre dins la memo determinacioun de reviéure e de revendicacioun boufa pèr l'engèni mistralen, pèr Mirèio o pèr Fèlis Gras. Après la lèi Deixonne que fuguè l'enançamen sèmpre atiéu pèr l'ensignamen, en 1968 "lis evenimen de mai, nous dis l'Armana di Felibre, an, curiousamen, fa esclata uno eisigènci que lou Felibrige n'avié fa soun credo despièi sèmpre : la liberta, lou libre espandimen dis ome pèr la descentralisacioun. Aquéu besoun de descentralisa, lou Cap de l'Estat e de menistre n'an recouneigu l'urgènci, mai es, de pertout, que lis ome se soun dreissa, tout d'uno, contro la tiranìo d'uno amenistracioun d'autant mai insupourtablo que soun poudé es de mai en mai negatiéu, empachamen lou mai souvènt de faire ço qu'es de faire. Pèr la proumiero fes, en Franço, s'es parla coume d'uno causo noun soulamen souvetablo mai necito de regiounalisacioun e meme d'autounoumìo !
Es-ti besoun de remembra, eici, que la dóutrino mistralenco a sèmpre fa la part di prerougativo que revènon au poudé centrau e d'aquéli que revènon i regioun ?
Fau souveta, aro, que la grando flamado de mai noun siegue un fiò de paio".
A faugu, cadun saup, espera 1982 pèr counèisse la lèi Deferre.

E l'Armana de 1969 de persegui : "Adeja se parlo d'assemblado regiounalo e li fau souveta, dóumaci de tàlis assemblado, dóu moumen qu'eisistaran, saran fourçado d'agi patriouticamen, valènt-à-dire en favour dis interés mage di regioun representado pèr éli".
Ansin despièi trento an de descentralisacioun flacasso mai realo, poudèn avaloura lou pes de soun ande e n'en faire sourgenta un ensignamen. Segur sus mai que d'un poun s'ameritarié d'èstre ameiourado e alargado, mai demoro un aquist precious que devèn proutegi.
Vuei, la reformo di couleitiveta loucalo, qu'amaduro lou gouvèr, risco justamen de nega aquéli trento an de prougrès e rènd mai-que-mai soucitous lou Felibrige qu'a jamai decessa de prouclama la necessita d'uno vertadiero descentralisacioun.
En aubourant la Coupo, disiéu à Castihounés : - La Franço talamen tant centralisado s'estoufo d'egoucentrisme. Li principe de Mistral baiarien pleno vido au païs, aurié feni de s'estransina. Coumprendran-ti enfin à Paris que liogo de s'entestardi dins l'arcaïsme, uno vertadiero descentralisacioun, pèr pas dire uno vertadiero regiounalisacioun, sarié que prougrès e enançamen.

La reformo di couleitiveta que s'anóuncio laisso pouncheja uno recentralisacioun qu'es pèr li felibre intoulerablo, au rebous di leiçoun que baiè Frederi Mistral e de soun flame discours de Sant-Roumié dóu 9 de setèmbre 1868 "Ço que voulèn" que sèmpre devèn agué en memòri.
Uno reformo èro de segur necito, mai aurié faugu la vèire dins lou sèns countràri, ana pu liuen dins la descentralisacioun liogo d'assaja d'agué lou plen gouvèr sus l'ensèn de l'amenistracioun de nòsti terraire e sus li decisioun que se ié prenon. La menaço que plano sus li coumuno e sus si coumpetènci fan rebouli. Li mejan toucant la culturo, coume d'àutri doumaine d'aiours, noun an d'èstre mestreja pèr Paris, sian deja proun vitimo d'uno culturo (un semblant de culturo) que nous impauson, unico e aplanado qu'a ges de sèns, qu'a ges de racinun e qu'abestis.

E pièi lis gràndi metroupòli que se coungreion van pas dins lou sèns de l'istòri di territòri e s'encapon pas dins l'esperit de ço que se fasèn d'un païs mouderne.
Basto! aquéli pensamen an de nous rememoura que Mistral es esta à l'óurigino de l'idèio de descentralisacioun, que Leoun de Berluc-Perussis fuguè lou paire dóu regiounalisme, dóu mot e de la filousoufìo, que Jan Carle-Brun, éu, fuguè l'aposto dóu regiounalisme vertadié, Jóusè d'Arbaud, que counmemouran aquest an li sieissanto an de sa mort, fuguè lou regiounalisto plenié. Vous counvide, coume counvide tóuti li decidaire, de vous embuga de sa pensado regionalisto tant bèn espremido dins la revisto Le Feu. Ié troubarés la clau de nòstis esperanço, li clau d'un moudèle de soucieta respetous dis ome e dis idèio, un moudèle de soucieta pantaia de longo pèr li felibre de tóuti li generacioun.
Posque vuei lou mounde s'endraia dins aquelo auto vesioun de la soucieta, dins aquel umanisme que se n'esvanis, dins aquelo sentido pregoundo d'uno forço degudo à l'engèni dóu Mèstre, d'uno forço que nous porto. que passo pas…

Uno vido pèr l’Óucitanìo
Jaume Ressaire