Editouriau dóu mes de óutobre

L'intercoumunalita
Lis egouïsme prouvençau moustra au det…

Es poulido la descentralisacioun en Prouvènço !
Cadun pèr sa pèu !

Couóuperacioun prouvençalo

L'intercoumunalita, l'amista entre li coumuno vesino, nòstis elegit pouliti, gousto-soulet, s'entèndon pas gaire pèr acò. Cadun vòu garda sa part de gatèu, mestreja li sòu de sa viloto à sa voulounta e gouverna sènso partage dins soun cantounet.

La grando metroupòli éuroupenco dóu païs de Marsiho s'esquiho toujour.

Pamens n'a passa d'aigo dins Uvèuno despièi que Gastoun Defferre voulié pas d'intercoumunalita, de pòu de se vèire fourça de travaia emé li Maire coumunisto di coumuno d'à coustat.

Pièi i'aguè li garrouio poulitico simplasso entre  li Jan-coucounié, Jan-Glaude Gaudin e Jan-Nouvè Guérini que restanquèron tourna mai la couóuperacioun poussiblo.
Li coumunauta an pamens espeli un pau à bóudre… e aro fau toujour assaja de reüni tout aquéu bèu mounde.

Mai aro, la counsequènci d'aquelo carènci de nòstis elegit loucau pèr sourti de l'adrouno de sis egouïsme, es que l'Estat se met de bon de la partido.

Autourita parisenco

Fau lou gouvèr de Paris pèr regla li proublèmo d'unita en Prouvènço.
Pèr acò faire, Jan-Marc Ayrault, lou proumié menistre, es vengu dire la voulounta dóu gouvèr de crea uno nouvello metroupòli de l'agloumeracioun marsiheso, estènt qu’es “ uno questioun d'interès naciounau ”.

Adounc es decida pèr lis àutis autourita parisenco que li sièis coumunauta de l'encountrado se déuran aligna, coume lou dis bèn lou menistre en chefe : “ l'agloumeracioun marsiheso dèu camina vers la soulucioun de la metroupòli ” e pas mai ! Ansin, la coumunauta urbano “ Marsiho Prouvènço Metroupòli ”, la coumunauta d'agloumeracioun dóu Païs d'Aubagno e de l'Estello, coume aquelo dóu Païs de z-Ais, aquelo dóu Pays dóu Martegue, aquelo de Seloun-Estang-de-Berro, emai lou Sendicat d'agloumeracioun nouvello ( SAN ) “ Ouèst-Prouvènço-Istre ”, van devé aprene à s'ama dins la grando metoupòli d' 1,8 milioun de persouno tancado aqui coume l'a precisa lou menistre : “ Aquelo metroupòli éuroupenco tendra comte de la diversita e de la coumpleissita dóu territòri e preservara li liame de proussimeta e lis identita loucalo. ” Lis indian dóu païs n'en faran belèu partido !
Acò es de figo d'un autre panié, ço que comte es la freirejacioun disciplinado que nous vèn de Paris.

Fau saupre qu'enjusqu'aro dins tóuti aquélis establimen publi de couóuperacioun intercoumunalo, la maje part de si baile soun soucialisto e contro touto alianço, franc Éugèni Caselli, lou presidènt de “ Marsiho Prouvènço Metroupòli ” que sarié soulet à sousteni un parié proujèt. Tant soulamen vuei, lou patroun, Jan-Marc Ayrault, es un pelot soucialisto, e te li vai vira coume uno meleto. Es acò lou redressamen !
Restara qu'uno rebroussiero, de drecho, Mariso Joissains, “ Coume l'ai deja dich à Sarkozy, lou dise à Hollande : la metroupòli, es noun ”.
Pèr lou restant tout vai bèn, Michèu Vauzelle, lou presidènt dóu Counsèu regiounau de Prouvènço, freto fort e fai lusi tout acò, “ Tène particuliaramen à saluda l'acioun de voste gouvernamen pèr l'aveni de nosto capitalo regiounalo. La Regioun sara, à vòsti coustat presènto e reativo dins la poulitico que souvetas coundurre ”.
Li faiòu de Prouvènço prenon de grano.
Noun, es de bon vèire, i’a aqui l'acord de tóuti.
Jan-Glaude Gaudin a bèn escouta, e se dis : saupre se li proumesso que tiblon van pas peta, “ sarai, bèn entendu, forço vigilènt à la façoun que li causo se passaran ”.
Li patroun d’endustrìo, pèr la bouco de Jaque Pfister, lou presidènt de la Chambro de coumèrci dison éli : “ Merci Jan-Marc Ayrault. Es un proujèt que vai dins lou sèns de ço qu'avian demanda. Fau que participessian ativamen à la demarcho ”.
L'anaren pas crida à Roumo, mai tout vai bèn. D'aise, d'aise, se vesèn de tèms davans nous-autre…
“ Aquelo metroupòli couneitado emé la realita, councentrado sus li coumpetènci essencialo ( trasport, desvouloupamen ecounoumi, universita, recerco, renouvacioun urbano ) e sus lis imperatiéu envirounamentau, necessitara uno periodo de councertacioun en delai de laqualo chascun déura prene si respounsableta ”.

Pèr jouga à la petanco, t'an manda lou couchounet un pau luen !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com