Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes d'abiéu

Regioun Prouvènço

Avèn pas beca sus lis eleicioun regiounalo, pamens lou mes passa se n’en parlè e desparlè.
Segur que lou relarg regiounau nous pertoco mai que la telo eisagounalo teissudo pèr la
grosso aragno parisenco.
È ro l’escansènço de parla de culturo regiounalo e de revendica l’aparamen de la lengo dóu païs. Subre-tout qu’en regioun Prouvènço-Aup-Costo d’Azur, lou parla terradounen es prouvençau.
Prouvenço aro a bèn assaja de pausa li questioun que falié pèr engaja lou futur presidènt dins la sauvo-gardo dóu patrimòni lenguisti de “sa” Regioun. Mai, de-bado, noste barjadisso interèsso degun en periodo eleitouralo.
Es uno questioun de pes e de mesuro, li regardadou dóu pes eleitourau an lèu pesa si resoun. La coumunauta prouvençalo es pas lourdasso en raport dóu rèsto.
Sian aqui, coume se dis, vesible sènso mai, acò sèmbo un bèu païsage de Prouvènço en founs d’escran. Sage coume d’image s’arrapan coume poudèn à ço qu’avèn cresegu “nosto” Regioun.
Fin finalo nous veson enregouï pèr l’eternita. La lengo es un eiretage d’à passa tèms que sa trasmessibleta couparié li Prouvençau di couneissènço mouderno. Seca la paraulo es uno óuperacioun sauvarello.
Pèr tourna à noste item, avèn escupi en l’èr en pausant de questioun sus la defènso de la lengo qu’interèsson qu’uno pichoto minourita d’eleitour. Basto! anan pas escupi aigre pèr acò, rèn es perdu, rèn à chanja, Michèu Vauzelle a pas davala de sa carreto…
È ro pas besoun de se nousa la cervello pèr saupre la resulto d’aquelo voutacioun, tóuti lis istitut de soundage de la capitalo dounavon lou presidènt sourtant bèu gagnant…
E acò fuguè lèu tapa.
Fau dire tambèn qu’aquelo eleicioun viravo en de batèsto de poulitico pouliticiano que nous despasson. Falié resta en deforo e se sian bèn garda de chausi uno coulour.
Coume que siegue, dins tóuti li partit, s’atrobo d’elegit estaca à l’aparamen di lengo regiounalo, malurousamen soun pas proun noumbrous.
Pamens aqueste cop, sian gasta, fau saluda l’eleicioun de dous ferverous aparaire de la lengo, Ano-Marìo Hautant e Arvé Guerrera, militant de Région Provence, fédération Provençale du Partit Occitan, Régions & Peuples Solidaires.
Es bèn lou proumié cop que se troubara de Counseié regiounau estaca à l’aparamen de la lengo de soun païs.
N’en parlaren miés lou mes que vèn.
D’aqui entre aqui, saupre se la P.A.C.A. poudra retrouba soun noum de Prouvènço ?
Saupre encaro se la lengo, que d’ùni ié dison lengo prouvençalo, d’ùni lengo d’oc e d’ùni lengo óucitano, sara proumougudo au rèng de lengo óuficialo de la regioun à egalita emé lou franchimand ?
Veiren courre l’auro…

 
Bernat Giély
 
 
Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com
 
 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat