Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de juliet e avoust 2024

 

Art countempouran en dòu…

L’artisto nissart, Ben, aparaire de la lengo,
vèn de nous quita!

L’artisto nissart, Ben, lou pintre di mot en lengo nostro s’es suicida lou mes passa tant lèu après la mort de sa femo Anìo. Fasié 60 an qu’èron marida e aurié pas supourta de viéure sènso elo.

L’artisto

Ben, de soun noum vertadié Benjamin Vautier èro nascu lou 18 de juliet 1935 à Naple, d’uno maire mita irlandeso mita óucitano e d’un paire souïsse.
Sa famiho s’istalant à Niço en 1949 n’en boulegara plus, fasènt d’éu un Nissart de la bono e subre-tout l’artisto tant lèu pivela pèr lou Nouvèu realisme, segur coume disié que l’art dèu èstre nouvèu e adurre uno turtado.
Tre l’an 1955, coumencè de realisa si dessin, sis esculturo vivènto de l’art grafique. Pèr éu, tout es art e tout es poussible en art, uno meno  de noucioun d’aproupriacioun dóu mounde que desvouloupara.
Ben, èro, de-bon, lou pintre di mot, qu’adusié rèn que de nouvèuta dins l’art countempouran e faguè de-longo sa recerco dóu nouvèu pèr moustra que tout es poussible en art.
Dins sis escrituro d’un art councetuau, Ben baio de verita, de coumentàri vo de coustatacioun sus lou mounde e l’atualita. Mai ço que pòu parèisse riserèu, adus proun souvèn matèri à pensa.
Tant lèu counqueris lou grand public e subre-tout li jouine estènt qu’uno partido de sis obro soun reprouducho sus de suport destina is escoulan coume de carnet, d’estilò vo de trousso.
Pas proun d’acò Ben espandis de tra de proupagando pèr atriva lou public e satisfaire de-longo soun envejo de coumunica soun pousiciounamen sus l’art.
Pèr acò tambèn bandis de letro d’enfourmacioun en rouneò, pèr la Posto, pèr fax, e pièi pèr internet souto ou titre de newsletter, ounte pouëticamen parlo de tout.
Ben a tambèn participa à-n-uno mouvanço apelado "art postal", la liberta toutalo de creacioun èro prouclamado pèr courrespoundènci dins uno meno de desir d’eisista en deforo dóu marcat de l’art.
Partido integranto de soun obro es li debat intitula "pèr o contro", pièi "Chez Malabar et Cunégonde", e à flour e à mesuro: "La Fenêtre en 1973, La Différence en 1981, Le Centre du monde en 1999, L’Espace à débattre en 2011".
Ben èro encaro un representant di mai couneigu dóu mouvamen Fluxus, n’en difusavo lis idèio e l’esperit en Franço, valènt-à-dire qu’aparavo un art d’atitudo en repensant li limito vo li noun-limito de l’art.
Avié tambèn rejoun li code dis "happenings et performances" desvouloupa is Estat-Uni. Li siéuno que realiso à Niço ié dison "Boum", "Ourla" o "Dire la verita".
Aro, pecaire, Ben vèn de perdre coume se dis soun egò, sa teourìo generalo de l’art l’egò que cultivavo e ié permetié se subre-viéure.
 

Líaparaire di lengo

Ben èro un grand artisto, mai pèr nous-autre, es l’aparaire di lengo regiounalo que n’en faguè un de nòsti ferre de lanço, disciple de Francés Fontan en aubourant que mai la lengo d’oc dins sis escrit.
"I’a pas de pople sènso sa lengo, i’a pas de lengo sènso sa culturo e chasque pople a lou dre d’èstre mèstre de soun destin culturau, poulitique e ecounoumique sus soun territòri lenguistique. Noun recounèisse aquéu dre, es aceta d’enterina li situacioun d’imperialisme", acò èro, coume disié, la cadeno de l’esquino pèr resóudre li counflit e li tensioun qu’eisiston entre li groupe etnique dins mai de 60 Estat e Regioun dóu mounde. Un vesioun dóu mounde ounte chasque pople poussedis sa countemoureneïta e sa creativeta.
Sa lucho contro lou genoucide lenguistique pèr li puissanço douminanto se retrobo dins soun libre "La Clef ", atlas etnoulinguistique, redegi emé li sòci dóu Partit naciounalisto óucitan, que en mai de la prefàci e la counclusioun n’en faguè tambèn lou dessin de la cuberto.
Dins  sis analiso etnisto, ié vai d’afourti :
- siéu pèr uno Éuropo que se regiounaliso,
- siéu pèr la poulitico dóu " pouliticamen e etnicaman courrèit " que se desvouloupo is USA,
- siéu pèr li mesuro de descentralisacioun e de desloucalisacioun,
- siéu pèr l’elabouracioun d’uno charto pèr de minourita noun territourialo,
- siéu pèr lis assouciacioun que defèndon li lengo,
- siéu pèr uno poulitico de quouta car es tout autant de fatour que van dins lou bon sèns.
Pèr éu lis analiso e soulucioun etnisto soun claro e eissido dóu simple bon sèns. Soun basado sus la recouneissènço de la realita lengo/pople. Zóu, tóuti li pople, sènso eicepcioun, an lou dre de se counsidera encò d’éli sus lou territòri de sa lengo.

Ben, restara lou genious artisto de l’art countempouran, mai, nous-autre, gardaren subre-tout lou souveni dóu manifestant dins li passo-carriero pèr la sauvo-gardo de nosto lengo.

Bello provo de sa noutourieta, 1 400 persouno ié rendeguèron un darnier oumenage pèr soun enterramen de-coutrìo emé sa mouié, lou dijòu 13 de jun 2024. Li dous cercuei èron cubert dóu drapèu óucitan… e lou groupe Nux Vomica faguè clanti li cansoun nissardo.

Bernat Giély

Lou site de Ben :
http://www.ben-vautier.com/

Editouriau dóu mes de óutobre 2022

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", 12 traverse Baude, 13010 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Sèti sociau de Prouvènço d'aro,
"Flora pargue", bast.D,
64, traverso Paul, 13008 Marsiho.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat