Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de juin 2024

 

Eleicioun éuroupenco

 

Aubouras d’abord lou patrimòni lenguistique de l’Éuropo !

 

Zóu mai, pèr beileja l’Éuropo anan elegi nòsti representant au Parlamen éuroupen, valènt-à-dire 81 deputa demié li 720 d’aquel ourganisme pèr lou mandat de 2024 à 2029.

La Franço a pas vergougno d’ana assegura la meso en obro de la legislacioun éuroupenco, alor que n’en respèto pas li decisioun e refuso toujour de ratifica la Charto éuroupenco di lengo regiounalo e minouritàri, mai es de figo d’un autre panié…

Lou Parlamen éuroupen tèn soun sèti à-n-Estrasbourg, aqui li deputa s’acampon en sessioun quàsi un cop lou mes, mai soun un pau d’escambarlon estènt que van tambèn à Brussello pèr d’acamp suplementàri pèr de coumessioun o àutri reünioun de groupe poulitique. Aro saupre eilai se gardon sa lengo ? Frederi Mistral cito G. d’Astros dins soun Tresor dóu Felibrige :

Paris noun parlo pas flamand
Ni Brussello lou francimand

Vai, vuei, acò parlo soulet, es tout simple, fau pas se passa la lengo à l’iue, li baile de l’Éuropo lenguejon en anglés, mau-grat que l’Anglo-Terro se siegue esquiha de l’Unioun éuroupenco.
Segur un deputa parlo emé lou pessu…
Mai, pecaire, nous-autre entendèn pas toujour bèn lou role d’aquélis elegit éuroupen.
Beilejon lou Parlamen éuroupen qu’es uno meno d’ourganisme emé de coumpetènci legislativo, bugetàri e de countourrole, mai rèsto tributàri de la Coumessioun éuroupenco e dóu Counsèu éuroupen. Es en relacioun em’aquélis assemblado que s’establis lou bugèt éuroupen.
Emai nòsti parlamentàri éuroupen an de discuti, amenda e vouta li tèste legislatiéu prepausa pèr la Coumessioun éuroupenco.
Aquelo gouvernanço dóu Parlamen éuroupen emé la Coumessioun éuroupenco e Counsèu éuroupen se ié dis lou “Triangle istituciounau ” de l’Unioun éuroupenco.

Lou Counsèu éuroupen que recampo li chèfe d’Estat o de gouvernamen di 27 païs de l’Unioun éuroupenco e baion lis óurientacioun e li priourita poulitico generalo de l’Unioun éuroupenco.

La Coumessioun éuroupenco, elo, qu’es coumpausado d’un coumessàri éuroupen pèr Estat membre, siegue 27 coumessàri carga de prepausa de lèi au Counsèu éuroupen e au Parlamen éuroupen pèr li faire aceta e aplica.

Lou Parlamen éuroupen, éu soulet, vèi si sòci elegi demoucraticamen, 720 deputa que partejon soun travai dins 20 coumessioun.

Adounc aqueste mes nous es demanda d’ana vouta pèr ço que se dis d’éuroudeputa. N’en fau destria 81 demié li 38 listo de candidat.

La tiero es longo, n’i’a d’ùni e d’àutri, un pau chanjourleto.
Fau assaja de destria la bono dins l’ordre de presentacioun dóu Menistèri de l’Interiour :
1. “ Pèr uno umanita soubeirano ”. M. Fedel.
2. “ Pèr uno demoucracìo realo : deciden d’espernautre ! ”. M. F. Ponge.
3. “ La Franço fièro, menado pèr Marioun Maréchal e soustengudo pèr Eric Zemmour  ”.
4. “ La Franço insoumesso - unioun poupulàri ”,  Mmo Manoun Aubry.
5. “ La Franço revèn ! emé Jourdan Bardella e Marino Le Pen ”.
6. “ Éuropo ecoulougìo ”. Mmo Marìo Toussaint.
7. “ Free Palestino ”. M. Nagib Azergui.
8. “ Partit animalisto - Lis animau comton, vosto voues tambèn ”. Mmo Elèno Touy.
9. “ Partit revouluciounàri coumunisto ”. M. Óulivié Terrien.
10. “ Partit pirate ”. Mmo Caroulino Zorn.
11. “ Besoun d’Éuropo ”. Mmo Valerìo Hayer.
12. “ PACE - Partit di ciéutadan éuroupen, pèr l’armado éuroupenco, pèr l’Éuropo soucialo, pèr la planeto ! ”. M. Alexandre Audric.
13. “ Equinòssi : ecoulougìo pratico e renouvèu demoucratique ”. Mmo Marino Cholley.
14. “ Ecoulougìo pousitivo e territòri ”. M. Yann Wehrling.
15. “Listo asselineau-frexit, pèr lou poudé d’achat e pèr la Pas ”. M. Francés Asselineau.
16. “ Pas e descreissènço ”. M. Michèu Simonin.
17. “ Pèr uno autro Éuropo ”. M. Jan-Marc Fortané.
18. “ La drecho pèr faire entèndre la voues de la Franço en Éuropo ”. M. Francés-Savié Bellamy.
19. “ Lucho oubriero lou camp di travaiaire ”. Mmo Natalìo Artaud.
20. “ Chanja l’Éuropo ”. M. Pèire Larrouturou.
21. “ Nous lou pople ”. M. Jòrgi Renard-Kuzmanovic.
22. “Pèr un mounde sènso frountiero ni patroun, urgènci revoulucioun ! ”. Mmo Selma Labib.
23. “ Pèr lou pan, la Pas, la liberta ! presenta pèr lou partit di travaiaire ”. Mmo Camiho Adoue.
24. “ L’Éuropo acò sufis ! ”. M. Flourian Philippot.
25. “ Noun ! prenen-nous en man ”. M. Edouard Husson.
26. “ Fourtaresso Éuropo - listo d’unita naciou-nalisto ”. M. Pèire-Marìo Bonneau.
27. “ Reviha l’Éuropo ”. M. Rafèu Glucksmann.
28. “ Noun à l’UE e à l’OTAN, coumunisto pèr la Pas e lou prougrès souciau ”. M. Charle Hoareau.
29. “ Alianço ruralo ”. M. Jan Lassalle.
30. “ Franço libro ”. M. Francis Lalanne.
31. “ Éuropo territòri ecoulougìo ”. M. Guihèume Lacroix.
32. “ Lou brusc ciéutadan ”. Mmo Louris Elmayan.
33. “ Gaucho unido pèr lou mounde dóu travai soustengudo pèr Fabian Roussel ”. M. Leoun Deffontaines.
34. “ Defèndre lis enfant ”. M. Gaël Coste-Meunier.
35. “ Ecoulougìo en cèntre ”. M. Jan-Marc Governatori.
36. “ Demoucracìo representativo ”. M. Hamada Traoré.
37. “ Esperanto lengo coumuno ”. Mmo Lauro Patas d’Illiers.
38. “ Liberta demoucratico franceso ”. M. Patrice Grudé.
Ouf ! pèr legi lou prougramo de caduno d’aquéli listo fau embrassa l’aubre de la paciènci. Acò passo l’osco… sian escagassa rèn que pèr espepidouna se la defènso di lengo regiounalo es soun soucit.
Adounc, lou mai eisa, èro de ié demanda soun avejaire sus l’aplicacioun en Franço di decisioun preso pèr l’Unioun éuroupenco.
Vaqui la questioun que i’avèn pausa pèr escrit : Moussu lou candidat,
La lengo de Frederi Mistral, 170 an après sa mort, es pas despareigudo, mai l’estat desastrous de soun ensignamen la coundano. Li proumesso eleitouralo di presidènt de la Republico de ratifica la Charto éuroupenco di lengo regiounalo vo minouritàri soun pas estado tengudo.
Coume l’a forço justamen fa remarca lou Deputa éuroupen, Csaba Sándor Tabajdi, la Franço es la vergougno de Éuropo de pas vougué sauva la lengo di troubadour, la proumiero lengo literàri de l’Éuropo mouderno.
Esperan toujour uno voulounta poulitico courajouso pèr sauva li lengo regiounalo, en ratificant enfin la Charto éuroupenco que 26 païs membre dóu Counsèu de l’Éuropo an adeja mes en vigour. À la vèio de la participacioun de
voste groupe au Parlamen éuroupen, souvetarian faire part de voste engajamen pèr l’aplicacioun en Franço d’aquelo Charto éuroupenco e ansin poudé rèndre-comte de vosto responso dins nosto publicacioun: “Prouvènço d’aro”.
“Prouvènço d’aro”, en entié redegi en prouvençau enfourmo tóuti li mes, desempièi bèn lèu quaranto an, si legèire dis acioun menado en favour de la proumoucioun de la lengo dins l’ensignamen e la vido publico, aussi sarian tras qu’urous de faire counèisse voste avejaire sus la sauvo-gàrdi di lengo istourico de Franço.
Bèn segur la responso caussiguè pas rapidamen la demando… Nous fau boucla lou journau avans la fin dóu mes.

Basto ! pèr aro, ço que sabèn es que Jan Lassalle de la listo “ Alianço ruralo ” es un aparaire de la lengo d’oc e que d’ùni listo d’ecoulougisto soun pèr la defènço di lengo regiounalo. Acò vau pas dire que lis àutri soun contro, n’en sabèn pas rèn, franc de Marioun Maréchal qu’a vouta contro la ratificacioun de la Charto éuroupenco di lengo regiounalo à l’Assemblado naciounalo, mai a chanja de camp e belèu d’avis ?

De tout biais après la voutacioun uno grando floupado d’aquéli listo saran escafado, se troubara d’elegi que li sòci d’uno pougnado de listo de grand partit, pièi couneissèn la musico, en poulitico i’a toujour d’àutri priourita que de s’óucupa de patoues sènso interès pèr l’auto soucieta.

E pamens la counsigno d’esplecha lou riche patrimòni lenguistico de l’Unioun éuroupenco se placardo toujour emé 24 lengo óuficialo e tambèn 60 lengo regiounalo vo minouritàri parlado pèr 50 milioun de ciéutadan éuroupen.

Mai vau miés demoura chut !

 

 

Bernat Giély

 

Editouriau dóu mes de óutobre 2022

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", 12 traverse Baude, 13010 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Sèti sociau de Prouvènço d'aro,
"Flora pargue", bast.D,
64, traverso Paul, 13008 Marsiho.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat