Editouriau dóu mes de abriéu 2020
Marrit mau
Aquéu verin que s’es courouna virus
d’en pertout se rebalo…
Marrit sang
O ! mal evenimen ! Lou tèms viro pas bèu e rebalo uno countagioun coume se disié dins li pountannado de pèsto.
Vuei la mau-ancouès aganto lou mounde, malaut à noun plus !
D’assetoun sus noste roucas de Sisife, - roucas dóu Prougrès pèr Frederi Mistral dins sis Isclo d’Or -, lou sian ana pesca aquéu mau ? Noun, “ Zóu toujour ! Fort d’alen, d’à pas, lou sournaru escalo ”.
Fuso e s’enfuso en planeto aquelo malautié misteriouso, enfeciouso, countagiouso, endemico, epidemico, refratàri e mourtalo.
Aro lou mau d’enduro es samena, poudèn pas resta sènso souna mot : se nòsti rèire se fasien “ un sang de pèsto ”, nous-autre emé noste nouvèu marrit sang poudèn pas dire que s’anan pas faire “ un sang de courounavirus ” farié trop d’alòngui ; “ un sang de couvid 2 ” belèu ! Mai, vai ! em’ aquéu sang de bilo s’enanan pas grasiha lou sang, pèr acò fau de-segur toujour resta à sang pausa que l’entendemen d’aquelo pandemìo nous manco. Souvetan soulamen que siegue un flèu que passo, coucha pèr la medicacioun. Fisançous coume lou sian en Prouvènço emé noste prouvèrbi :
À tout mau i’a medecino.
Pièi poudèn resta sus nòstis Isclo d’Or pèr cassa li nivo menaçaire d’aquéu flèu :
Grand soulèu de Prouvènço
Fai lusi toun blound calèu !
Coucho l’oumbro emai li flèu !
À-de-matin lou soulèu s’es bèn leva !
Mai, pecaire, sian encaro dins l’oumbro d’aquéu flèu.
La planeto pòu garda soun terme d’epidemìo en lengo nostro.
Lou cèu es grand ! emé soun ajudo e de siuen, l’esperan, arribaren à derraba d’aqui aquelo nouvello pèsto que se carrejo sènso soucit sus li camin aerian de la Sedo dóu mounde mourderne.
Lis eleicioun municipalo
Aquéli voutacioun soun pas restado en plan. Fuguè de tiro-alongo, de tiro-arrié, pièi de tiro-laisso pèr decida se falié manteni l’eleicioun di Municipe quand lou monde coumençavo d’aganta pòu dóu marrit mau que s’anounciavo, adeja en camin, matrassant l’Itàli enjusco lou Piemount prouvençau.
Lou valènt Gouvèr parisen voulié pas vèire lou mourtalage d’aquelo prouvinço vesino, faguè pas gaire tiro-molo, quand a di, a di, faudrié vouta lou dimenche 15 de mars 2020.
E lou proumié menistre de veni faire l’espaventau, la veio, pèr espauri lou mounde emé li barraduro d’escolo e tout lou restant… lou mau sarié dangeirous que lou lendeman dóu vote… Acò èro pas de figo boujassoto que venié vèndre dins touto sa frescour… boulegavo rèn que lou guespié de la poulitico pouliticiano… lis eleitour qu’agantaran la petego de sourti anaran pas is urno… e lou partit gagnant sara perdant… estènt qu’aquéu dóu gouvèr èro liuen d’abulo… pièi s’es tira de comte de ma grand la borgno, mentre que s’abandounavo lou segound tour.
Dins tout, li vilage, vilajoun, bourg, bourgado, van retrouba un Municipe, mai dins li vilo, vilasso, capitalo, grando coumunauta o Metroupole, la partido s’es pas jougado, degun empourtè la vitòri… e aro li partit n’en soun à faire tè tu, tè iéu… tant soulamen lou gouvèr que fasié dins si braio a remanda, de but en barro, la fin d’aquélis eleicioun à l’estiéu que vèn, à-n-un poussible 21 de jun, quouro lou verin courouna virus sara dins soun pountificat. Basto, vuei, pèr resta dins la tradicioun saludan coume un ciprès un jour d’auro tóuti li bràvi Maire quàsi segur de prene la cherpo d’aquéu poudé dins sa coumuno e qu’avien signa la Charto “O pèr la lengo e li culturo prouvençalo” dóu Couleitiéu Prouvènço. Soun adeja un bon trentenau.
Bernat Giély
|
