Editouriau dóu mes de abriéu 2025
“ Plan Fanfare ”
Barrulado foulclourico de la Menistro de la Culturo
Lou mes passa, lou dijòu 13 de mars, Dono Rachida Dati, la valènto menistro de la Culturo, s’envenguè en Prouvènço pourta la bono paraulo.
Tre lou matin d’aquéu dijòu, fuguè un rescontre à-z-Ais que se faguè emé lou presidènt de la Regioun Prouvènço-Aup-Costo d’Azur, Renaud Muselier.
L’unioun se troubè pèr la signaturo d’uno letro d’entencioun afiermant la voulounta coumuno de ranfourça l’acès à la culturo, de sousteni la creacioun artistico e de preserva lou patrimòni dóu territòri regiounau.
S’es bèn precisa : “ Aquéu partenariat marco uno ambicioun claro : faire de la culturo un moutour d’atrativeta, de desvouloupamen e de liò souciau, tout en plaçant la Regioun Sud coume moudèle à segui pèr lis àutri terraire ”.
Dono Rachida Dati afourtiguè que “ Li regioun jogon un role essenciau dins lou champ di poulitico culturalo ”.
E Renaud Muselier d’apoundre : “ Nosto regioun es uno terro de culturo, de creacioun e de trasmessioun. Bono-di aquéu partenariat emé l’Estat, anan baia encaro mai d’envanc à noste patrimòni, à nòstis artisto e à tóuti aquéli que fan viéure la culturo au quoutidian ”.
Basto ! Sian belèu pas proun cultiva pèr coumprene e saupre se dins aquelo poulitico culturalo que “ countribuïs à l’identita e à la diversita culturalo de noste païs ” se ié pòu trouba la lengo prouvençalo ?
Dono Rachida Dati s’endraiè, pièi, en Païs aupen pèr participa à Gap à la reduberturo dis Archiéu despartamentau dis Àutis-Aup après dous an de travai de reabilitacioun, ço qu’a permés uno trasfourmacioun toutalo de l’istitucioun, moudernisant sis infrastruturo e permetant aro de reprene la couleito dis archiéu publi, restabli la counsultacioun di doucumen e prepausa uno prougramacioun culturalo alargardo.
D’aqui, la Menistro es anado à la prefeturo signa dos counvenioun.
Uno pèr lou “ Païs d’art e d’istòri ” entre lou Menistèri de la Culturo e li coumunauta de coumuno dóu Guihestres-Queiras e de Serro-Pounçoun qu’adus uno recouneissènço naciounalo à-n-aquéu terraire rurau e countribuïs à ranfourça soun atrativeta dins uno ecounoumìo douminado pèr lou tourisme.
L’autro counvencioun porto un soustèn à la Cinematèco de Mountagno que fai viéure la memòri audiou-visualo di terraire aupen.
Em’ acò, Dono Rachida Dati a anouncia l’alargamen dóu “ Plan Fanfare ” i musico tradiciounalo, danso foulclourico e teatre amatour, ço que viso à sousteni li pratico vivènto e ranfourça mai l’identita culturalo di territòri. Sarié uno avançado majouro pèr la recouneissènço e lou soustèn d’aquélis espressioun vivènto.
Lou discours sus aquéu tèmo se faguè dins lou castèu de Tallard, “ dins un liò qu’encarno dos di priéureta que me siéu fissado tre moun arribado au menistèri de la Culturo : lou patrimòni e li territòri ”.
E de parti sus uno incresablo richesso : “ lou patrimòni culturau inmateriau … ço que se trasmeton li femo e lis ome que vivon sus nòsti territòri de generacioun en generacioun : impounderable, intoucable, e pamens tant vivènt : aquéu patrimòni inmateriau es fa de saupre-faire, de rituau, de fèsto, basto de tout ço que religo ”.
“ Dins aquéu doumaine, Tallard es un lioc impourtant pèr uno pratico escricho despièi 2023 sus la tiero representativo dóu patrimòni culturau inmateriau de l’umanita : aquelo de l’amountagnage ”.
Pièi de s’adreissa i Tallardenco e Tallarden : “ Pèr li musico tradiciounalo di mountagno qu’avès ilustrra aqui tant brihantamen, pèr li danso, li coustumo, fasès la demoustracioun qu’aquéli pratico traverson li generacioun, nous reünisson. Fan de nous-autre uno coumunauta. Vuei, souvète ana encaro mai luen dins lou soustèn à-n-aquéli pratico e dins sa meso en valour ”.
E d’avisa que lou “ Plan Fanfare ” es lou soulet dispousitiéu naciounau d’enverguro que lou permetra estènt que valouriso lis especificeta regiounalo.
E zóu mai de faire rampèu : “ Vuei, siéu urouso de vous anouncia que souvète ana mai liuen e que lou Plan Fanfare se vai alarga à d’àutri pratico e usage di culturo poupulàri, noutamen li musico e danso tradiciounalo, li cant courau e poulifounique, lou teatre amatour… Tre aquéu printèms, counsacrarai 800 000 éurò à-n-aquéu soustèn is art e tradicioun poupulàri… En aparant aquéli pratico culturalo, perpetuant un eiretage qu’a pas fini de nous enrichi mutualamen. Aquel eiretage, ai counsciènci que perduro bono-di la passioun de milioun de nòsti counciéutadan que countribuïsson à lou faire viéure…”
A bèn parla, mai de qu’a di ?
Tout vai bèn pèr la Culturo en païs nostre, la Menistro es intrado dins la danso… farandoulado vo fanfarounado qu’enchau es amounedado e, tin-tin, baio de sòu.
Tant soulamen manco quaucarèn…
De-z-Ais à Gap dins la culturo dóu patrimòni dóu païs, pèr nous-autre i’a, en priourita, la lengo prouvençalo…
Mai aquelo lengo a pas lou dre de fanfarouna dins lou “ Plan Fanfare ” de Madamo la Menistro de la Culturo…
Dono Rachida Dati saup de-segur pas que i’a de lengo regiounalo parlado sus uno partido dóu territòri naciounau despièi mai long-tèms que lou francés, e en Regioun Sud de Renaud Muselier es toujour lou prouvençau, qu’a pamens degu entèndre canta en intrant dins la danso en Gavoutino…
Pecaire, lou patrimòni lenguistique sèmblo pas intra dins aquéu patrimòni culturau inmateriau que nous es vengudo prouclama Madamo la menistro dins soun amountagnage embrumassa.
Mai coume a pas acaba de dansa lou rigaudoun se pòu espera que finira pèr ausi lou parla patrimouniau que fau sauvo-garda…
Bernat Giély
|
