Editouriau dóu mes de abriéu 2026
AI, l’IA
L’Inteligènci Artificialo
agantara li lengo regiounalo…
Se pòu crèire toumbado di nivo, mai l’inteligènci artificialo es aro aqui, eiçavau, a mes pèd à terro, se poudrié dire,
mai noun, rèsto à miech aire, s’es esquihado dins la mecanico di mejan mouderne de coumunicacioun pèr
proumetre de pitanço en trasfourmant d’à founs lou travai, l’educacioun, lou mounde de l’entre-presso e la soucieta.
Lou tambourinage pico tenèbro…
Basto ! l’IA, soun acrounime, fai mirando, tant soulamen, mèfi, en Americo se dis AI, fau pas mescla acò emé d’ai
pèr d’aiet, o d’ai pèr d’ase, Frederi Mistral baio lou mot dins soun Tresor dóu Felibrige :
AI, interj. de douleur et de surprise.
Ai! ai! ai! hélas!
Basto ! IA vo AI, l’inteligènci artificialo es un óutis que baio d’enfourmacioun, prepauso l’autoumatisacioun eisado
dóu travai e trobo la soulucioun à tóuti li proublèmo que se podon pausa.
Lou nautre es d’entèndre aquelo teinoulougìo parla e escriéure en lengo prouvençalo dins lou mounde entié.
Mai pecaire, en quau s’adreissa e coume s’acoustuma à sis apelacioun OpenAI, ChatGPT, IAact e bèn segur
MistralIA ?
L’espandimen de l’IA pèr lou biais d’internet se capito à 77 % american. Adounc vai-ié di machino learning pèr li
data scientist que menaçon li start-up emé li responso errouniéuvo di GPT-thinking-mini.
Urousamen l’IA nous adus dins si proumesso que vai permetre is interloucutour qu’an de lengo despariero de se
coumprene en gardant cadun soun parlage, estènt que la traducioun se fai tout d’uno en tèms reau.
Pamens sabon pas encaro se l’anglés internaciounau pausara soun “ bagage d’imprecisioun e d’incoumprenènço ”.
Pèr aro, sarié l’aplicacioun Google Traduction qu’aurié aganta la gestioun de 249 lengo pèr lou tèste e 60 pèr lou
voucau.
Sus Facetime, telefone e AirPods i’aurié encaro que 10 lengo de dispouniblo pèr la traducioun en dirèit.
Ansin emé l’integracioun que se fai sus lis i-fone d’Apple Intelligence, trouban l’anglés american, lou francés,
l’alemand, l’italian, lou pourtugués, l’espagnòu, lou chinés, lou japounés e lou courean.
Mai la courso d’aquelo teinoulougìo countùnio d’envala li lengo dóu mounde entié.
Tant soulamen d’ùni s’inquieton estènt que sara inutile d’aprendre de lengo estrangiero, bastara d’agué un i-fone
equipa pèr l’Inteligènci Artificialo de tradutour autoumatique.
Aro, saupre s’aquelo Inteligènci Artificialo poudra proumòure li lengo regiounalo ?
Sèmblo poussible, adeja nòsti counfraire de la man d’eila dóu Rose an coumprés qu’es indispensable de parla à
ChatGPT en óucitan.
Fau encouraja lis internauto à parla en óucitan, pèr acò, Benezet Dazéas, lou direitour dóu Coungrès permanènt
de la lengo óucitano beilejo lou prougramo LINGUATEC-IA que desvouloupo lis óutis d’inteligènci artificalo en
óucitan, en basque e en catalan e bouto en liame lis universita di dos man di Pirenèu Toulouso, Perpignan, Pau,
Bilbao, Pampeluno.
Aquéu prougramo baio espèr em’ un finançamen de 1, 5 milioun d’éurò, un milioun en prouvenènci de l’Unioun
Éuroupenco. De mai lou soustèn dóu Menistèri de la culturo es assegura.
La meso au poun de diferènti teinoulougìo pèr l’ócitan es entrin de se faire, noutamen la traducioun autoumatico,
la sintèsi voucalo e benlèu la recouneissènço voucalo pèr lou gascoun e lou lengadoucian.
Ansin ChatGPT coumenço d’èstre francamen pas mau à respèt de l’óucitan. Se pòu counversa em’ éu.
Un dis óujeitiéu de Linguatec-IA es de crea un bon moudèle de lengage estrui pèr l’óucitan.
Aro, saupre se i’a encaro de pan sus la cledo pèr lou prouvençau ?
Bernat Giély
Pèr mai d’entre-signe :
https://linguatec-ia.eu/fr/
https://linguatec-ia.eu/oc/
|
