Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
   

Editouriau dóu mes de desèmbre

Bon an, mal an, 2004

Fai cènt an, aquest mes, que Frederi Mistral se vesié guierdouna dóu prèmi Nobel de Literaturo fuguè l’escasènço pèr li felibre e tóuti lis aparaire de la lengo de faire de l’annado 2004, “l’annado Mistral”, estènt mai que se capitavo l’an dóu cènt cinquantenàri de la creacioun dóu Felibrige. Dins tout, fuguè uno reüsssido, se counmemourè l’evenimen, se celebrè lou pouèto.

Fuguè de-bon un pountin pèr faire assaupre que li prouvençau estaca à sa lengo èron toujour gaiard, mai d’un siècle après la respelido felibrenco.

La retoumbado de touto aquelo boulegadisso es tambèn de mesura dins l’afougamen que meteguèron li poudé loucau que siegon, regiounau, despartamentau vo coumunau, à rendre óumage au grand pouèto de soun païs.
Osco pèr acò.

Vuei, l’an 2004 s’acabo, anan festeja Nouvè.
Urous coume Batisto, cresian de tourna faire nosto crècho, sourti nòsti vièi santoun, n’en croumpa de nouvèu e moustra à bèus iue vesènt noste gàubi pèr adouba lou pichot mounde de la nativeta.
Èro simple coume uno vièio tradicioun que se perpetuo sènso faire de mau en degun.
Eh, bèn noun, l’escolo de la Republico n’en vòu plus entendre. En 2004, la lèi sus lou fichu islamique es estado voutado pèr li deputa. Aquéli finocho, pèr se pas metre d’esquino la coumunauta que s’enribanavo, espandiguè, tout d’uno, l’interdicioun à tóuti li religioun, interdicioun de moustra de signe oustensible vo oustentatòri de sa cresènço en un Diéu valènt-à-dire que fau pas faire de vantacioun de sa fe de quente biais que siegue.
Nàutri prouvençau e catouli, pecaire, avèn pas senti veni lou vènt.
L’an 2004 intrara dins li marrit conte de Nouvè.
Li santoun e la crècho prouvençalo soun coundanable pèr la lèi.
Lou ravi nous dira :
— I’a que de leva soun fichu à la peissouniero …
Sarié trop facile, es pas serious.
Que si, es serious. La proumiero vitimo es l’Escolo di Felibre de la Mar qu’engimbro desempièi 80 an un councours de crècho dins li quartié de Marsiho, cresié, bedigasso, de faire participa sènso proublèmo lis escolo de dous arrondimen.
Que noun, l’Ispeitour de l’Educacioun Naciounalo carga dóu seitour diguè de noun. Noun, e perqué noun? Au noum de la santo e venerablo laïceta touto pouderouso e de si nouvèu proufèto, li founciounàri de l’Ensignamen.
Lou brave ome bataiè pas au mitan pèr dire soun franc valentin e escriguè soun “avis défavorable au motif que la crèche avait une connotation religieuse”. Sic.
Urousamen que coumprenèn lou franchimand, senoun sarian toumba de quiéu.
Aro, aviso, la Pastouralo se poudra plus jouga dins lis escolo, lou blad de Santo-Barbo se poudra plus faire poussa sus un burèu, li naveto de la Candelouso se poudran plus manja dins la court, e de la Santo-Estello n’en faudra pas parla…

Alègre ! Alègre ! Diéu nous alègre
Calèndo vèn tout bèn vèn !

Bernat Giély

Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat