Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de desèmbre 2018

 

D’assetoun….

Regioun SUD a tengu sis Assiso de la Culturo.

Assiso de la Culturo
au Counsèu Regiounau
en vilo de Marsiho

Maioun essenciau de la vido ecounoumico dóu territòri, la culturo es au cor dis enjò de la Regioun Sud. Pèr impulsa la poulitico culturalo que vèn, la Regioun Sud tenguè sis Assiso lou 6 de nouvèmbre passa en l’Hotel de Regioun à Marsiho.
Fau pas s’engana sus lou lengage, se parlo pas de ço que se pòu cultiva pèr la vido ecounou­mico dóu terraire.
Pèsqui pas ! Pertoco pas li gènt de champ que fan la culturo di cougourdo ! Noun, sian dins lou bèu mounde que labouron pas lou païs, sa “ culturo ”, en francés sarra, la souleto que comto, es facho pèr desvouloupa de faculta inteleitualo emé de couneissènço aqueso que permeton d’estalouira lou sèns critique, lou goust e lou jujamen artistique.
Adounc en Regioun Sud, li gènt soun pas sènso culturo, estènt que se n’en fai lis “Assiso"…
Aï ! aï ! aï ! aquéu mot grana es pas un sèti, coume lou poudrié faire pensa soun etimoulou­gìo de participe passa substentiva dóu verbe asseta ! Noun es rèn qu’un sinounime dóu terme “ acamp ”.
E pamens, pecaire, en aquelo reünioun lis atour culturau de la Regioun Sud se soun asseta de quiéu sus li rèsto de la lengo e di tradicioun culturalo prouvençalo. Pas un mot sus lou parla istourique de la Regioun Sud. Pòu bèn creba, degun se n’en soucito aqui, es pas plus dins la culturo de la Regioun Sud.
La Culturo en Regioun Sud es autro causo, reservado d’en proumié i bèu parlaire que rafi­non lou francés emé l’acènt pounchu. An de retourico pèr jouga en sceno e lou fan vèire. Mai, chut, n’en fau pas mena brut.
Lou moumen soulenne d’aquélis Assiso fuguè bèn segur quand lou presidènt Renaud Muselier mountè en tribuno prene lengo e fuguè en favello pèr abéura de bèlli resoun la poulitico culturalo que menavo la Regioun Sud.
Zóu mai ! Regioun Sud ié venguè mai coume un bèn-èstre qu’assassinavo l’acrounime PACA, bono-di soun enventiveta judiciouso… Segur, de countristaire d’aquelo apelacioun n’i’avié pas cap… courtisanarié óubligo, lis atour cultu­rau s’asaton toujour bèn i voulounta de soun partenàri financié, e perdon pas lou Sud.
De verai, coume l’afourtiguè lou cabiscòu, Renaud Muselier, la Regioun Sud suvenciouno proun bèn la culturo :
“ On dépense environ 3 % du budget pour la culture quand les autres régions en dépensent 2 % et l’État grosso modo 1 %… je pense que la culture est un axe fondamentalement impor­tant pour le développement de la Région. Avec 1 200 manifestations recensées, on est doté d’une offre exceptionnelle et on peut donner un sens à la politique culturelle que nous menons…”
Aqui mai, sian à contro-sèns de vougué prou­mòure la lengo istourico dóu païs, n’an pas rèn à faire.
Pamens pèr recampa de mounde, l’ome avié bèn anouncia : “ Notre politique culturelle doit être le trait d’union entre les 5 millions d’habi­tants de la Région Sud. Elle doit préserver notre patrimoine en encourageant la création et la diffusion artistique ”.
La preservacioun de quente patrimòni ? Pèr li 5 milioun de Costo-Azuren, Aupenc e Prouvençau fau encouraja la difusioun artistico bèn aparisenquido, li barjo-mau emé sa lengo patrimounialo de Prouvènço an que de se teisa, acò es plus un mode de parla en Regioun Sud, e que mai dins lis Assiso d’aquelo culturo que lis intervenènt e debatèire de si taulo redouno èron esta designa d’avanço pèr l’autourita regiounaulo fin de respondre courreitamen i dous bòni questioun que se pausavon en taulo redouno virtualo :
1 - Avis de recherche : quels nouveaux publics pour la culture ?
2 - Ni clientélisme, ni tiroir-caisse : quelle poli­tique culture régionale pour demain ?
E d’un, se cerco un nouvèu publi pèr lis atour culturau que mounton sus sceno vo aquéli que fan soun cinema. Lis artisto d’aquelo meno soun forço noumbrous estènt que la Regioun Sud a suvenciouna 1 200 de si manifestacioun que diguè lou patroun.
Ansin lis esplico prenguèron de tèms, e viro que viraras entour d’aquelo taulo redouno n° 1. Fugis que fugiras, la salo se vuejavo. Plan planet, lis ausidou ensuca pèr li repepiage s’escapavon e i’agué pas d’avis de recerco pèr li retrouba.
À la questioun 2, fuguè la memo panoucharié pèr faire d’alleluia sus la poulico regiounalo de deman. Tant soulamen, pas proun di bràvis escoutaire qu’avien deserta la sesiho, li deba­tèire designa, éli mai, s’èron esbigna e quand la presentatriço li sounè, faguè chi ! I’avié plus de cliènt e rèn dins lou triadou de caisso pèr n’en fini em’ aquelo segoundo interrougacioun.
Basto tout se passè bèn pèr li dous o tres prouvençalisto que tirassavon aqui, aguèron que de bada. Li predicadou, la flour dóu bèn dire, i’anavon à tu e à iéu ! pèr bèn afierma coume èro escri que “ La Région Sud est une terre de culture et de nombreuses actions sont entreprises pour affirmer cette identité ”
Osco pèr l’identita de la Regioun Sud.
Mai mèfi ! fau pas mescla lou Sud e lou Miejour.

Nautre en plen jour
Voulèn parla toujour
La lengo dóu Miejour
Qu’acò ’s lou dre majour
Coume lou cantè Frederi Mistral, fau pas tout prendre à malo :
L’an panca crebado
La pèu
Dóu rampèu.

 

Bernat Giély

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat