Editouriau
dóu mes de desèmber
D’éurò dins un boulidou d’argènt
La Mounedo de Paris fai si sòu emé li
regioun.
D’efèt, la Mounedarié naciounalo
vèn de bandi à quatre milioun d’eisemplàri
uno nouvello tiero de pèço de 10 éurò en
argènt, counsacrado i 22 regioun de Franço e i 4 despartamen
d’óutro-mar.
Chasco pèço presènto uno faço emé lou
terraire geougrafi de la regioun e soun signe eraudi.
Vaqui l’esplico seriouso dóu presidènt de la Mounèdo
de Paris, Cristòu Beaux :
—
Ceux qui sont en Midi-Pyrénées verront la croix catalane,
typique du sud-ouest….
Ç
o que permet de "véhiculer les symboles de l'histoire régionale".
Lou bèu Parisen se garço pas mau de l’istòri
de nòsti regioun emé sa crous catalano qu’empego à Toulouso… Pamens
aquelo crous n’a couneigu de noum, crous de Fourcauquié,
crous de Sant-Gile, crous dóu Lengadò, crous de Toulouso
vo crous óucitano.
Mai li Miejournau-Pirenen poudran, coume à passa tèms,
jouga à crous o pielo.
"L’idèio, dis aquéu saberu de l’eraudico, es
de rèndre l’éurò un pau mai amable, un pau
mai proche dóu ciéutadan".
Fuguè un tèms se sarian di "aquel argènt es
pas crestian" em' aquéli crous de sabèn pas
ounte !
De tout biais, es un capitau enrauma.
La resoun cournudo de l’amableta de l’éurò vau
soun pesant d’or.
Bèn segur, la Prouvènço es pas óublidado
dins aquelo mounedaio.
La Prouvènço, Provence Alpes Côte d’Azur que
ié dison, a pas de crous sus sa pèço. Si simbole
soun autant clar que soun apelacioun coumplicado: un pèis de mar
pèr representa la mountagno, Lis Aup, e uno aiglo de mountagno
pèr representa la mar, la Costo d’Azur e uno grafignado
de coustat a baia au restant de la regioun, la Prouvènço.
Dins sa publicita pèr faire lusi si pèço la Mounedo
de Paris simplifico li causo, es la PACA, pèr "susciter
plus d'engouement des Français", valènt-à-dire,
pèr empli soun boulidou d’argènt à-n-éli.
Li Prouvençau que soun gaire amouneda an pas de marrit sang à se
faire es rèn que d’argènt mort pèr li debas
de lano dis especulaire de touto merço.
Pèr li mai fourtuna, dirias que i’a que se courba e n’en
prene d’aquéli bèus éurò sounant?
L’óuperacioun es rendablo, l’afourtisson.
Es pamens pas d’argènt que s’escampo pèr carriero,
li pèço en metau precious soun prepausado au publi dins
li burèu de la Posto.
De bèus éurò tin-tin pèr inmourtalisa la
regioun Prouvènço-Aup-Costo d’Azur, pèr pas
un un sòu. |
Panèu
Interdicioun
Aquelo endicacioun escarto dounc touto meno d’individualisacioun
e noun pòu èstre doublado pèr un segound dispousitiéu
sus lou meme suport pèr pas engendra de counfusioun dins la tèsto
d’un menaire de veituro. Vaqui l’encauso de la sancioun à l’encontro
de la Coumuno.
Vai soulet, que lou Conse, Nouvè Segura, vai faire apèu,
tant soulamen aquelo reguignado en justiço es pas suspensivo de
la decisioun dóu Tribunau amenistratiéu que faudra eisecuta,
adounc retira li panèu dins li dous mes.
Lou Maire leissara pas tout en rambai, fisançous : — Acò vai à l’encontre
de la Coustitucioun, que dis. S’aquelo decisioun fai jurisprudènci,
acò pòu deveni un pretèste ideau pèr un vertadié racisme
anti-óucitan!.
E d’apoundre :
—
Se vertadieramen es un dangié, es tèms de faire lou meinage
en bord de routo.
De-segur, lou Tribunau amenistratiéu es ana cerca de niero ounte
n’i’avié pas. La legislacioun arcaïco de l’Estat
francés lou permet. Que li lengo regiounalo siguèsson,
aro, au patrimòni culturau de la Republico, degun se n’en
soucito. Provo encaro un cop qu’aquel article 75-1 de la Coustitucioun
es uno badinado.
Urousamen lou mes passa tambèn lou groupe d’estùdi
parlementàri sus li lengo de Franço depausavo sa proupousiciounde
lèi sus li lengo regiounalo, un proujèt ambicious tant
pèr l’ensignamen, que pèr la vido vidanto, emai pertoco
la signaletico, la legalisacioun de l’iscripcioun dóu noum
de vilo en lengo dóu païs sarié óuficialisado.
Un pan de nas assegura pèr lou Tribunau amenistratiéu de
Mount-Pelié s’acò es vouta.
|
