Editouriau dóu mes de febrié 2023
Courso à la coucardo
La Bouvino, e la fe di biòu,
fau escoubiha tout acò…
Fin di courso à la coucardo
Aqueste cop ié sian, dins la draio de la prouteicioun animalo, l’interdicioun di courso de biòu camarguenco es demandado.
Acò se cridè dins uno counferènci de prèsso que se faguè lou mes passa ourganisa pèr Eddine Ariztegui, lou counseié municipau dóu Partit Animalisto de Mount-Pelié, e que rapourtè lou journau “ Le Monde ” fuguè uno ataco terriblo contro la bouvino e si pratico arcaïco. Pèr mena la batèsto i’aurié adeja 50 elegit demié éli lou rèire patroun di Verd EE-LV Julian Bayou e lis assouciacioun animalisto representado pèr Caroline Roose e Henry-Jean Servat.
Nous dison que la tradicioun justifico pas de faire soufri un animau, à coumença pèr l’abrivado “ sortir de leurs prairies des bovins paisibles pour les immerger dans une foule hurlante provoque un stress profond ”. Pecaire, li gardian de Camargo l’avien pas vist !
Mai es li ferrado e subre-tout lou bistournage que sarien la vergougno de la Bouvino.
Dins lou libre “ Terro camarguenco ”, H. Marc, C. Naudot e V. Quenin, nous dison coume se passavo en 1958, pèr la ferrado : “ Lis anouble soun à cha-un sourti de la manado, à chivau e au pas, pièi courseja à found de trin pèr dous gardian, e au moumen vougu, un d’éli d’un bon cop de ferre sus lou malu fai viro-passa l’anouble. Alor li dous gardian sauton lèu-lèu de chivau, e dóu tèms que l’un d’éli mantèn l’animau pèr sòu, soun coulègo ié mes lou mourrau dins la narro… pièi, aquest, es, em’ un coutèu marca is auriho ( escoussuro ) à la marco de la manado. I’a meme de manadié, que i’apoundon encaro uno marco à fiò sus la cueisso senèstro ”.
Pèr lou bistournage : “Aquesto ouperacioun counsisto à bistourna li tau ; se fai chasqu’an dins li manado, à l’autounado ; es un travai proun dangeirous. Lou bistournage es reserva is animau qu’an pas douna satisfacioun dins li courso dóu tèms de la sesoun bouvino en cous ; souvènti-fes devènon pu meichant e permet de lis engreissa pèr li carnage. Lou biòu aganta i bano em’ un seden, es inmoubilisa, la tèsto dins li rai d’uno rodo de carreto, li pato de darrié ligado em’ uno sabatiero ; l’animau es cabussa e mantengu soulidamen au sòu pèr li gardian qu’an bono pougno, dóu tèms que lou bistournaire fai soun óufice…”
Nous dison, aro, que pratica acò pèr tourseduro testiculàri e bloucage dóu desbord de sang es un meno de suplice de la pinso quand es pas uno ablacioun toutalo di testicule.
Patrick Laurent, lou presidènt de la Federacioun di manadié, rebequè pamens is ataco “ La castration à vif, c’est vraiment marginal. On procède à des anesthésies locales ”.
Basto li Verd e lis assouciacion animalisto volon plus di courso camarguenco, tradicioun que genèro tant de soufrènço animalo.
Frederi Mistral que defendié la Bouvino es aro coundanable.
Nosto lengo “ sara la lengo de la joio ” que disié dins Lis Isclo d’Or :
La cridaren dins li bravado ;
E l’ourlaren is abrivado,
Quand se fara courre li biòu.
Jóusè d’Arbaud, éu, èro à l’avans-gàrdi dins L’Antifo : “ Segur ai toujour agu la fe i biòu. Mai de courso e de ferrado, n’ai vist proun ma part, e n’en veirai mai… Dins nòsti païs, li biòu se fan courre e i’a ges de fèsto sènso biòu ”.
Tambèn Charloun Rieu, dins soun pouèmo La ferrado di Tes de Roustan, espremis emé la plus grando sincerita lou sentimen de la Fe di Biòu:
Ardit ! gai cambarado
Cavalié de vint an,
Partèn pèr la ferrado
Sus li Tes de Roustan.
Emai lou rèire capoulié, Fèlis Gras, dins soun discours i Santo en 1896 èro pas en rèsto :
“ Acò empacho pas qu’is ouro de lesi, quand lou tambourin voun-vouno poudèn nous espaceja vers li ferrado, e courre is abrivado, e afrounta lou negre tau dins lou round. Mai qu’uno fes la voto passado, lou biòu tourno en pas dins sa palun emé si gardian, que soun éli un di grand sourgènt de nosto pouësio ”.
Batisto Bonnet veneravo aquelo tradicioun dins soun libre “ Lou baile Anfos Daudet ” :
“ Ah ! lou bon tèms… lou tèms galoi, di voto, di cousso de biòu dins lis areno e li round de carreto, en plen soulèu, dins li revoulunado di crid di gènt e li rire perla di femo ! ”
Mèste Eisseto dins soun recuei “ Li saladello ” óublidavo pas la Bouvino :
Li biòu, lis Areno... li flour
Soun lou trelus de nòsti fèsto,
Que lou Nord garde si frejour :
Nàutri jougan de noste rèsto
Tant soulamen emé la coumparesoun dóu Miejour e dóu Nord, se sentié adeja veni l’óupousicioun dis elito parisenco à nòsti tradicioun terradourenco.
L. Denis Valvérane dins soun libre “ Lou Maianen ” l’escound pas :
“ Mai èro de saupre se li gouvernaire franchimand, à soun grat, poudien dita la lèi i Latin dóu Miejour, s’entrauca dins si mour, countrista sis us e trata Prouvènço e Lengadò en terraire counquista. Un arresta manda de Paris venié d’espeli que defendié li courso de biòu.”
O, acò avié adeja coumença dóu tèms de Frederi Mistral que baiè sa remoucado escricho au Menistre de l’Interiour dins l’Armana prouvençau de 1874 souto lou titre Remoustranço di biòu de la Camargo :
“ Eicelènci. Pèr uno circulàri en dato dóu 4 de setèmbre 1873, avès defendu li courso e coumbat de biòu, à l’estiganço qu’aquel espetacle brut acoustumavo li Prouvençau à la visto dóu sang e tendié à-n-acarnassi lou pople dóu Miejour.
Acò ’s toujour la memo istòri : li Prouvençau soun de brutau, soun d’enrabia, soun de sóuvage. Sèmblo, de vous entèndre, qu’an tua paire e maire… Dirai pas que li Parisien soun d’eisèmple de vertu ?
Coume aquel arrestat nous pertoco grevamen, e coume es aparènt, Moussu lou Menistre, que de maniacle e de manèfle nous an carga auprès de vous e nous an acusa de crime banaru, venèn emé respèt, mai pamens emé forço, coume counvèn en brau negre, proutesta contro vosto dicho…
Vesès dounc pèr tout acò, Moussu lou Menistre, que li coumbat e courso de biòu, au liò d’èstre de tuo gènt e de carnalage, soun au countràri de jo noble e d’eisercice masculin ounte li calignaire venien se leva la rampo e s’acoustuma au dangié…
Un cop que li gardian nous poudran plus faire courre, veiren, despietadous, arriba li bouchié que nous ensucaran lis un après lis autre… Quand embanan un ome, acò ’s la barbarié ; quand li bouchié nous tuon, es la civilisacioun.”
Lou Mèstre de Maiano a degu apasima tout acò, li courso de biòu e de vaqueto an countunia enjusqu’aro.
Pamens Mistral regretavo uno pratico d’aquéli fèsto de bouvino, qu’aro a despareigu :
“ Ço que i’avié de laid, tenès, sabès ço qu’èro ! la courso à la bourgino. E li Tarascounen èron fort pèr acò. I bano nous estacavon uno longo tourtouiero, em’ acò nous bandissien pèr li carriero de l’endré, en nous tirant e péu-tirant e mestrejant emé la cordo.”
Vai, li gènt dóu Nord restèron acoustuma à roundina contro li courso de biòu, e Farfantello dins soun libre “ Li Mirage ” lou disié encaro :
Mau-grat lou Nord que sèmpre reno,
amount, quand se parlo di brau,
mantendren lis us patriau.
Nòsti dre, Raço miejournalo,
se Paris nous li raubo un jour,
s’aubouraren en grand coumbour !
Mi gardian, sus nòsti cavalo,
voulountous, quand faudra lucha,
mau-grat li nèsci e lis arlèri,
à la pouncho de nòsti fèrri
reprendren nòsti liberta !
Vaqui, ié sian mai, à l’ouro d’aro lou dangié es toujour aqui pèr la Bouvino emé de nouvèlli meno de renaire.
Se capito forço mau, estènt que se preparavo uno demando d’iscripcioun de la Bouvino à l’enventàri dóu patrimòni culturau inmateriau de l’UNESCO que preservarié la pratico di courso à la coucardo.
Mai es pas acaba è aro es lou presidènt de l’Unioun di jouine de Prouvènço e dóu Lengadò, Toumas Pagnon, baio la replico : “ N’avèn proun que d’ùni que counèisson pas nòsti tradicioun, vouguèsson nous dita noste biais de viéure ”, e fai la rampelado pèr uno manifestacioun que se debanara lou 11 de febrié à Mount-Pelié.
“ La cansoun gardiano ” de Jóusè d’Arbaud pòu tourna clanti :
Mi fraire gardian, sian qu’uno pougnado
Mai sauvan la terro e l’us naciounau
De la mau-parado.
Basto, quand fai vènt, fau venta… ié sian mai !
Bernat Giély
|
