Editouriau dóu mes de janvié À la longo dóu tèms 1976-1906, fai trento an que se publico, tóuti li mes, un journau en entié redegi en lengo nostro. Sian encaro quàuquis un, que despièi, mes à cha mes, s’achinissen bountousamen au travai pèr manteni, riboun-ribagno, aquelo publicacioun de prèsso.

À la debuto, èro pèr tapa un trau… un vide sensible pèr lis aparaire de la lengo dins lis annado setanto. Lou mounde di media se limitavon encaro au journau, à la radiò e à la televisioun. Se poudié entèndre un pichot pau noste parla, un cop la semano, devers li dès ouro dóu vèspre, sus lis oundo d’uno radiò regiounalo. Li grand quoutidian, éli, leissavon soulamen resquiha d’articlet dins sis edicioun loucalo. E, bèn-segur, la televisioun aparisenquido se garçavo pas mau di terradouren refratàri au lengage franchimand.
Nòstis assouciacioun prouvençalo, respetuouso de la tradicioun, se cercavon de niero entre éli… La mantenènço d’aquel eiretage pauso pas de proublèmo… Lou sa de gàrri es toujour plen.

Lou proublèmo èro que d’aquéu tèms, quand anavian vèire d’elegit vo de direitour de radiò-televisioun pèr assaja de faire uno plaço à nosto lengo, tant dins lis óufice culturau di couleitiveta loucalo que dins l’óufice regiounau de radiò-televisioun, nous rebecavon tant lèu : Mai quau sias, dequé representas ? I’a plus degun que s’interèsso à voste patoues ?
De bon verai, nòsti deputa e princihoun de la poulitico que fan sa vido à Paris, coume nòsti baile parisen de l’ORTF, davala à bèl esprèssi pèr coulounisa la prouvinço, anavon pas escouta li pastre e gènt di mas que barjacavon un vièi dialèite mouribound.

Adounc falié intra dins aquéu mounde ounte tout se coumtabiliso e se dèu moustra souto un bèu lume.
Li radiò loucalo èron pas encaro autourisado, la televisioun èro bèn cadenado pèr l’Estat, lou soulet media que nous soubravo, èro la prèsso. Vaqui coume se decidè de publica un journau escri tout en prouvençau tira à 5000 eisemplàri sus li routativo dóu quoutidian marsihés “Le Provençal” e vendu dins li kiosque di despartamen di Bouco-dóu-Rose e dóu Var.

Ansin fuguè lou proumier atous pèr provo que de legèire d’aquelo lengo n’i’avié forço.
Pièi, aquelo prèsso nostro serviguè tambèn de suport à l’acioun bandido devers li coumuno pèr la prouvençalisacioun di panèu de signalisacioun e de porto-voues pèr ourganisa la grando manifestacioun de 1982 à Marsiho pèr la lengo à la telé. Fuguè e rèsto l’óutis de proupagando dins tóuti li lucho menado pèr la defènso de la lengo.

Basto! Perqué teni tant de tèms? Lou mounde a chanja ?
Respoundren que sian de testard… legèire, redatour e baile de la publicacioun… e que cresèn ansin manteni uno part de l’usage de noste parla.
Lou mounde que viro, lou vesèn pamens vira !

Souto la daio de la garamaudo, bèn reglado sus lou reloge dóu tèms, li Prouvençau de la bono, à cha un, se teison…mai, sian fisançous, la nouvello crido di jouine n’escafo lou silènci…
La subre-vido de noste journau es la provo que sian toujour gaiard, trento an après.

Aro pamens fàci à-n-un nouvel aversàri, lou prougrès que bourroulo li mejan mouderne de coumunicacioun e anóuncio la fin de la leituro sus de suport de papié, coundana pecaire pèr li suport numerique, CD, DVD, Mp3, etc, etc.

Es de bèu vèire que tóuti li journau d’enfourmacioun malautejon. Traverson, coume dison, uno criso culturalo de l’escrit.
Bèn segur, la televisioun es devengudo la mestresso dóu mounde. Legi demando un pichot esfors, regarda l’escran vai tout soulet.

Mai l’internet es arriba. Aqui dedins tout se trobo, televisioun, journau, libre, musico…Èro la mort assegurado de tout ço que se publico sus papié.
Eh, bèn! Noun, sian encaro de generacioun qu’an besoun de teni e de senti souto sa man lou papié dóu libre vo dóu journau, pèr pièi counserva à bèus iue vesènt aquel oubrage.
Aro, saupre se li drole s’encoumbraran long-tèms de papié? Es de figo d’un autre panié.

De tout biais, la chourmo de “Prouvènço aro” a coumprés tre la vengudo de l’internet qu’èro un mejan eicepciounau d’espandi nosto lengo dins lou mounde entié e t’an crea emé lou Cèntre internaciounau de l’escrit en lengo d’oc uno biblioutèco virtualo qu’espandis aro 900 libre e revisto en lengo nostro sus la telaragno d’internet. Prouvènço aro se legis ansin sus tóuti lis escran d’ourdinatour.
Vuei, tout acò es coumplementàri, veiren pièi se fau resquiha en plen dins lou numerique, e se la prèsso papié a fa soun tèms, anaran faire l’Aiòli sus internet.
À despart d’acò, trento an fai uno estirado de tèms, mai pas encaro proun pèr sauva uno lengo, avèn encaro de pan sus la cledo pèr mai de trento an.
Anen, fasen avans e veiren Berro.

Pèr l’ouro, bono annado, bèn granado, acoumpagnado…
que l’an 2006 vous retrobo flòri de bonur, e en pleno santa.