|
|||||||||||||||||||
Pèr
pantaia de ço que se poudrié faire encò nostre,
vaqui un conte de Nouvè pèr uno lengo regiounalo :
Li Counseié regiounau de Bretagno an vouta lou mes passa un plan pèr reviscoula la lengo bretouno, à l’aflat dóu presidènt de la coumessioun Culturo, Jan-Pèire Thomin. Vaqui lou resumit d’aquél engajamen courajous. Lou Counsèu regiounau de Bretagno recounèis óuficialamen, au coustat de la lengo franceso l’eissistènci dóu bretoun e dóu gallò coume lengo de la Bretagno. Counsciènt de si respounsabilita, lou Counsèu regiounau s’engajo, pèr aquéu plan de poulitico lenguistico e en recercant la mai largo assouciacioun de si partenàri e, en particulié, li cinq despartamen bretoun, perfin de permetre la perenisacioun de la lengo e de la culturo bretouno. La toco : - Assegura lou mantenamen e la trasmessioun dóu bretoun poupulàri. - Pemetre à chasque bretoun que lou souvèto d’aprene, d’escouta, de parla e de legi lou bretoun. – Favourisa la presènci de la lengo bretouno dins li divers champ de la vido vidanto en Bretagno… Pèr la trasmessioun de la lengo, dins l’ensignamen la toco es d’arriba à 20.000 escoulan dins lis escolo bilengo en 2010. La fourmacioun de 150 proufessour. L’ensignamen de la lengo bretouno déura èstre desvouloupa tant dins lou primàri, que dins li licèu e coulège. Lou Counsèu regiounau ajudara, dins l’encastre de sa poulitico territourialo, lou finançamen de la coustrucioun di classo vo escolo bilengo. Pèr la trasmessioun famihialo, un dis enjò de la poulitico lenguistico porto sus la qualita de la lengo. La voulounta de manteni lou bretoun poupulàri que fau apara dins touto la richesso de soun espressioun, de soun acènt, de soun biais de vèire lou mounde e la vido. La fourmacioun dis adulto fara l’óujèt d’uno poulitico vouloutaristo pèr aumènta la demando. La Regioun soustendra de campagno regulièro de proumoucioun e d’enfourmacioun sus l’ensignamen bilengo e li cours pèr adulto. La lengo bretouno noun dèu pas èstre limitado à-n-uno lengo apresso à l’escolo. Dèu countinua d’èstre presènto dins lou mounde dóu travai. Lou Counsèu regiounau soustendra la demando d’atribucioun de frequènci ertziano i televisioun publico e privado. Pèr ço qu’es de la radio, la toco dèu èstre la difusioun radioufounico en lengo bretouno sus touto la Bretagno. Lou Counsèu regiounau negouciara emé France3-Ouest un crèis significatiéu dis ouro reservado à la lengo bretouno, en demai au moumen de grando escouto. Lou Counsèu regiounau adoubara un plan de desvouloupamen dis endustrìo culturalo en Bretagno coume se fai en Irlando e au Païs de Gallo. Un plan, tambèn, au soustèn à la prouducioun e la difusioun de l’edicioun en bretoun sara mes en plaço. De mai, lou Counsèu regiounau soustendra la fourmacioun di coumedian proufessiounau, ajudara lis autour en lengo bretouno, e lis chourmo de tiatre en lengo regiounalo. La meso en obro dóu bilenguisme au Counsèu regiounau sara la creacioun d’un groupe de travai de “poulitico lenguistico” dins l’assemblado regiounalo e la creacioun d’un service “lengo bretouno” à la Direicioun de la Culturo. La Regioun assegurara la generalisacioun prougressivo de la signalisacioun bilengo, lou desvouloupamen dóu bilenguisme dins li publicacioun de la Regioun e sur soun site Inertnet, emai la preso en comte de la lengo bretouno dins lou Plan de fourmacioun dóu persounau dóu Counsèu regiounau. De que demanda mai pèr Prouvènço ? Mai, pecaire, noste Counsèu regiounau de Prouvènço-Aup-Costo d’Azur s’es countenta d’uno voutacioun sus la denoumicacioun de nosto lengo es pas mai… L’an 2005 sara belèu proupice pèr ié ramenta que la lengo istourico de Prouvènço s’amerito autant que la lengo bretouno. Lis assouciacioun de defènso de la lengo an un nouvèl eisèmple à moustra à nòstis elegi dourmihous. N’en parlaren mai… Bernat Giély L’Etat se descargo de nosto patrimòni —
Dubert à la refleissioun ; Es à l’estùdi;
Sian pas encaro fissa. — La regioun a pas l’intencioun de
deveni castelan…, es ço que dis Miquèu Sapin, presidènt
de la Regioun dóu Cèntre: de coumunicat lacounique en
declaracioun acerbo, li couleitivita territourialo, an aculi emé
doutanço la publicacioun de la listo di mounumen vo site istouri
naciounau, poutencialamen trasferissable i Regioun, tout acò
sara decidi pèr decrèt en Counsèu d’Estat.
Dins li 178 edifice designa, 17 se trobon en regioun Prouvènço-Aup-Costo
d’Azur e van èstre prepausa i couleitivita territourialo.
De que vòu dire trasferissable es à dire que fan pas
partido siègue di bèn de la courouno, coume Versailles,
siegue d’un liò de memòri naciounau coume lou
Panthéon
vo encaro un mounumen architeiturau coume li proumiéri glèiso
goutico. |
|||||||||||||||||||
| Mescladisso d'archiéu |  |
|
Se voulès
vous abouna escriéure à :
|
 |
Presentacioun
en francés |
Catalogue
dis edicioun |
Editouriau
dóu mes |
Mescladisso
d'archieu |
diciounàri
en ligno |
Countat |
Edicioun Prouvènço d'aro © Copyright 2011
 |