Editouriau dóu mes de janvié 2023

En bon noumbre

Tout comte fa e rabatu,
d’ùni lengo s’escargnon pas, se copon…

Sian en l’an 2023

Coume lou tèms fuso !
Es mai aqui ! de que vai nous adurre l’an nòu ? Sara-ti l’an dis aigo, l’an dóu gros ivèr, l’an de la poudro o l’an di gròssis amelo ? se demandavo Batisto Bonnet.
- Ah ! vai, l’an nòu es toujour un brave ome : quau viéura veira…

Pèr nous-autre, i’a uno bando d’an que publican Prouvènço d’aro, 35 an, e chasque an fasèn fiso pèr dura, emai siegue à pas de galejoun.

Adounc, pèr aquéu cap-d’an 2023, poudèn se souveta tourna-mai uno bono annado acoumpagnado de forço autro !
Pièi, nòsti vot soun toujour aquéli dóu Mèstre : I’a 130 an d’acò, vaqui coume Frederi Mistral engaubiavo si souvèt “ À l’an nòu ” dins soun journau L’Aiòli de janvié 1893.

Galant leitour, gènto abounado,
Te souvetan la bono annado
D’aiòli prouvençau toujour acoumpagnado.

Vague encaro ! lou tèms passo, passo lou bèn !

Segur emé l’an 2023 sian pas au bout dóu comte e di coumtaire d’annado pèr li tèms avenidou faran durado…
Lou mounde espelis toujour emé sa crespino.

E sian 8 miliard

O, la darniero estimacioun coumtavo en 2021 aperaqui 7, 837 miliard de persouno sus la terro e vuei, segound un raport de la chourmo americano dóu World Population Prospects que publico l’O.N.U. la poupulaciun moundialo vèn d’ategne au 15 de nouvèmbre 2022 li 8 miliard d’estajan.

Miliard de Diéu ! noste juramen prouvençau disié pas à quant mountavo aquéu noumbre e aro aquelo chifro de 8 miliard d’èstre uman pèr l’an nòu, nous n’en dis pas mai, rèsto uno miliasso que n’en deschifran gaire l’impourtanço. Tanca davans l’enflour d’aquelo umanita qu’es la nostro, ié vesèn que de comte d’abouticàri.

Tout aquéu mounde s’espandis dins 253 païs e lou mai grand noumbre de poupulacioun groussis dins de terraire luenchen de Prouvènço.

À l’ouro d’aro li dous païs li mai poupla soun vesin la chino emé 1,41 miliard d’abitant e l’Indo emé 1,37 miliard d’abitant.
Lis Estat-Uni-d’Americo que se volon moustra li proumié dóu mounde soun rèn que tresen, emé soulamen 333 milioun d’abitant.
Vènon pièi, à-de-rèng, l’Indounesìo 268 milioun, lou Nigeria 212 milioun, quàsi parié emé lou Bresil e lou Pakistan. Seguis en vuechenco plaço lou Bangladesh 173 milioun, pièi la Russìo 146 milioun, lou Meissique 129 milioun, lou Japoun 126 milioun, li Filipino 110 milioun, l’Etioupìo 101 milioun, l’Egito 100 milioun, lou Viet-Nam 97 milioun, lou Coungo 95 milioun, l’Alemagno 83 milioun, l’Iran 81 milioun, la Taïlando 68 milioun e enfin, en vint-e-unenco plaço, la Franço emé 67 milioun d’abitant.
Segur aquéli chifro s’aboulegon de-longo, mai lou classamen varìo gaire.

Sian pamens pas au boumbihage, mai d’ùni païs boumbisson forço en poupulacioun.

En 1966, lou Jaque Dutronc cantavo coume un roussignòu : 700 milioun de Chinés, e iéu, e iéu… Pecaire lou comte es plus bon, la chifro a doubla soun 1,4 miliard en 2022, mai n’èro parié pèr la pichoutesso dóu pople de la planeto d’aquéu tèms, rèn que 3,4 miliard.

Dins tout, la Franço a trouba sa plaço, mai la Prouvènço, la regioun PACA vo la regioun Sud ounte sian, farié aperaqui uno poupulacioun de 5 milioun d’estajan coume la Palestino e, s’èro restado uno nacioun à despart, poudrié prene la 125enco plaço dins lou paumarés di païs dóu mounde. Pièi, bèn mai qu’acò, estènt que groussis… lis espert de l’Istitut Naciounau dis Estatistico e dis Estùdi Ecounoumique ( INSEE ) nous avison adeja que la poupulacioun “ en Paca ” crèis de 0,1 % pèr an, e sara mountado à 5,23 milioun d’abitant en 2050.

Basto ! Demié li 253 Estat, i’a 8 miliard de gènt, mai la creissènço umano se viro en descreissènço pèr lou lengage que se parlo à travès lou mounde, siegue 6 900 lengo.
Malurousamen 40 % d’aquéli lengo parlado soun menaçado pèr l’encauso di païs qu’impauson uno lengo naciounalo coume la Franço emé soun article 2 de la Coustitucioun, la lengo de la Republico es lou francés, li barjo-mau que parlon prouvençau soun pas republican, mai n’en fau pas mena brut.
Tout vai bèn dins lou meiour di mounde, l’UNESCO nous dis qu’uno lengo parlado disparèis tóuti li 15 jour. La Franço es à l’obro emé mai de 13 lengo regiounalo “ seriousamen en dangié ”, lou prouvençau escapo pas à la coundanacioun…

Vaqui dounc lou classamen di lengo qu’an uno recouneissènço óuficialo decretado pèr lis Estat.

Quouro se pren que li “ l oucutour natiéu ”, valènt-à-dire li gènt qu’emplegon sa lengo maternalo dins soun païs, se baio pau o proun li 10 lengo li mai parlado dins lou mounde :
1 - Lou chinés.
2 - L’espagnòu qu’es la lengo óuficialo di païs d’Americo latino.
3 - L’anglés emplega dins mai de 67 païs.
4 - L’indi, principalo lengo de l’Indo.
5 - L’arabe, lengo óuficialo de 25 Estat.
6 - Lou bengali, parla dóu Bangladesh.
7 - Lou pourtugés, qu’en mai dóu Pourtugau se parlo au Bresil, au Mouzambique, en Angoula…
8 - Lou russe, lengo de Russìo e di païs vesin.
9 - Lou japounés, es la lengo de 130 milioun de persouno que se parlo au Japoun.
10 - Lou pendjabi, parla dins li regioun de l’Indo e dóu Pakistan emé 90 milioun de loucutour natiéu.

Tant soulamen, fourço mounde emplegon uno segoundo lengo, coume nous-autre lou prouvençau e lou francés e subre-tout emé la boulegadisso que se fai dins lou mounde entié pèr lis escàmbi internaciounau es besoun de counèisse mant uno lengo, ansin journalisto e ome d’afaire soun “ multi-lengo ”, ço que fai que li lengo li mai parlado dins lou mounde aduson un autre classamen :
1 - L’anglés, 1, 132 miliard de loucutour. Lou mai grand noumbre d’anglou-fone s’atrobon is Estat-Uni, en Indo, au Nigeria emé en Chino. Es la lengo la mai estudiado dins lou mounde.
55 % di site de l’internet soun en anglés.
2 - Lou chinés mandarin, 1, 116 miliard de loucutour. La Chino es uno grando puissanço ecounoumico, sa lengo s’emplego aro dins lou coumerce e lou tourisme.
3 - L’indi, 615, 4 milioun de loucutour.
4 - L’espagnòu. 534, 3 milioun de locutour.
5 - L’arabe, 310 milioun de locutour.
6 - Lou francés, 279, 8 milioun de locutour. Es la lengo óuficialo dins 29 païs.
7 - Lou bengali, 265 milioun de loucutour.
8 - Lou russe, 258,2 milioun de loucutour.
9 - Lou pourtugés, 234,1 milioun de loucutour.
10 - L’indounesian, 198,7 milioun de loucutour.

Bèn segur lou noumbre de loucutour de chasco lengo galoupinejo de-longo, l’evoulun es degu à la creissènço demougrafico e au desplaçamen de poupulacioun.

Pèr la lengo prouvençalo pas besoun de cerca d’enquèsto, pecaire, sian liuen d’abulo pèr un classamen.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com