Editouriau dóu mes de juliet e avoust 2026

Despartido

L’obro eisemplàri dóu Majourau dóu
Felibrige, Jan Fourié…

L’egrègi Majourau dóu Feibrige, Jan Fourié, vèn de defunta lou 8 de Jun 2026.

Jan Fourié èro nascu lou 20 de nouvèmbre de 1944, à Esperaza dins l’auto valèio de l’Audo. En un tèms que dins tout lou païs se parlavo la lengo d’oc emai se ié diguèsse lou patoues… Bèn segur dins la famiho Fourié èro encaro lou proumié lengage que tre soun jouine age, Jan aguè de pratica entre-mescla dóu parla francés.
À l’escolo de la Republico fuguè fourça d’aprene e de bèn mestreja la lengo franceso, mai óublidè jamai sa lengo de famiho, subre-tout qu’un cop sis estùdi acaba deguè quita lou païs, pèr eiserci soun mestié d’emplegat à la Caisso di Depost e Counsignacioun à Paris en 1962.

Èro uno pountannado ounte li Miejournau mountavon à bóudre travaia dins Paris e se retroubavon pèr freireja e se rememoura soun païs abandouna. Jan Fourié tant estaca à la lengo famihalo de soun liò de neissènço s’èro fa marca au Felibrige en 1973 pièi à l’Istitut d’Estùdi Óucitan, e manquè pas de trouba l’assouciacioun parisenco que lou restacarié à soun païs “ Lis Ami de la lengo d’Oc ” e n’en devenguè lou secretàri generau en 1974. La memo annado publiquè soun “ Histoire de la littérature occitane et des écoles félibréennes en terre d’Aude ”.

Passiouna pèr aquelo literaturo d’oc, i’anè mai l’an d’après emé soun libre “ Emile Barthe et les écrivains biterrois d’expression occitane ”. La defènso di lengo regiounalo èro devengudo soun suprème coumbat. Baile dis Amis de la lengo d’oc participavo, chasqu’an à l’ourganisacioun de la Felibrejado di “ Miejournau de Scèus ”.
Pas proun de soun travai d’istourian, Jan Fourié èro un flame pouèto de lengo d’oc e daverè, en 1981, lou proumié prèmi de pouësìo i Jo flourau mistralen, engimbra pèr la Vilo de Scèus.
Pamens toujour dins si recerco lenguistico publico en 1982 un “ Dictionnaire de la littérature occitane audoise ”.
D’escambarloun, mai toujour respetuous dóu biais d’escriéure de cadun, saup recampa tout lou mounde en baiant mai en 1982 “ La langue d’Oc, le Félibrige et l’IEO, la littérature d’Oc en Auvergne ”.

Demai, sis obro pouëtico soun de-longo courounado, aganto lou segound prèmi de pouësìo i Jo Flourau Setenàri dóu Felibrige, en 1983, ço que ié vauguè lou titre de Mèstre en Gai Sabé. Soun recuei “ Images e paraulas ” es en preparacioun mentre que sis obro countùnion d’èstre courounado, nòu cop pèr li joio li mai z-auto de l’Acadèmi di Jo Flourau de Toulouso, quatre cop pèr la Soucieta arqueoulougico e literàri de Beziés e pèr la Coumpagnié de la Ginèsto d’Or de Perpignan.
En 1983, l’istourian ounouro sa coumuno emé soun recuei “ Espéraza, essai historique ” e en 1984 sara un autre endré dóu païs qu’espepidounara dis soun libre “ Notes historiques sur la commune de Rennes Le Château ”. Toujour militant pèr sauva la lengo se raprouchara e oubrara emé l’assouciacioun “ Défense et promotion des Langues de France ”. En 1987, lou Majourau dóu Felibrige afouga qu’èro, countara l’istòri felibrenco de Paris emé si libre “ Le Félibrige parisien durant l’Entre-deux-guerres ” e “ Le Félibrige parisien après la deuxième guerre mondiale, 1946-1976 ”. Mai es aquest an pèr la Santo-Estello que se debanavo à Perpignan que fuguè elegi Majourau dóu Felibrige pèr pourta la Cigalo de l’Óulivié.

En 1988, es “ Mistral et les félibres de l’Aude ” que l’istourian publico, mai lou pouèto es toujour aqui emé em’ un recuei de pouèmo “ Al camin del temps ”. Demai l’oumenage à soun davancié au majouralat parèis dins la revisto La France latine : “ Laus del Majoral Renat Mejean ”.
Mai es soun obro majo que l’encaparro d’annado de tèms, alestis un “ Dictionnaire des auteurs de langue d’Oc de 1800 à nos jours ” que sara publica en 1994, un oubrage que faguè mirando e fuguè lèu abena. Uno nouvello edicioun èro necito, Jan Fourié se meteguè tant lèu à la prepara en l’atualisant emé mai d’un centenau de noutiço
nouvello apoundudo i vue-cènt adeja eisistènto. Lou diciounàri, de-bon, es esta revist, aumenta e courregi pèr aganta un nivèu di mai fisable, e publica en 2009 adus lou temouniage de la richesso de nosto literaturo.
Un cop à la retirado, Jan Fourié s’entournè viéure dins soun vilage de l’Audo, toujour atiéu pèr la mantenènço de la lengo se retroubè Assessour dóu Felibrige de Lengadò-Roussihoun, presidènt de la seicioun audenco de l’Istitut d’Estùdi Óucitan e presidènt de l’Escola occitana, tout en perseguissènt si recerco dins li doumaine de l’escrit en lengo d’oc e de l’istòri dóu païs.
Jan Fourié, bèu pouèto, Majourau afouga pèr sauva la lengo, restara un di grand Mèstre de la literaturo d’oc.

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com