 |
Editouriau
pèr Juliet
e Avoust
La Setimàni
Jòrgi
Frêche, lou nouvèu presidènt de la Regioun
Lengadò-Roussihoun n’en vòu cambia lou noum.
Istourian de fourmacioun a desclapa lou vièi noum de sa
prouvinço que dóu tèms di Rouman, di Got
e Visigot se sounavo la Setimàni.
|
De-verai,
li raro de la Setimàni pegon em’aquéli de l’atualo
regioun batejado “Lengadò-Roussihoun”.
Aquelo doublo denouminacioun tèn lou mot “Lengadò”’
dóu parla de l’endré, mai s’acoublo emé
“Roussihoun”, un noum que sièr rèn qu’à
escoundre la Catalougno, es de-bon uno apelacioun bastardo emé
“aucune réalité historique” coume dis l’ancian
maire de Mount-Pelié, entre que “Setimàni” pòu
èstre emplega coume un “élément identitaire
majeur”.
Perqué pas ? La Setimàni a un passat…
Soun noum,
d’ùni dison que ié sarié esta baia d’en
proumié pèr li veteran de la setenco legioun roumano,
li “Septimani”,pèr d’àutri saberu vendrié
di sèt ciéuta vo di sèt bàrri de soun terraire.
Frederi Mistral, dins soun diciounàri, dis bèn que la
Setimàni èro lou noum que pourtavo lou bas Lengadò
quouro li Got se ié recatèron.
Lou trelus de la Setimàni s’espandis de l’an 509 à
l’an 710, emé touto meno de veleïta d’independènci.
L’envasioun arabo, pièi l’envasioun franco restancaran
si pretencioun.
La Setimàni resquihara dins l’Empèri caroulingian.
Se capitara tambèn un Marquesat de Setimàni, cita pèr
Frederi Mistral… Saupre, s’emé sa Setimàni nouvello,
Jòrgi Frêche n’en voudrié pas èstre
lou Marqués ?
De tout
biais, un noum n’escafo un autre. Partènt d’aqui, i’aura
pas plus de “Lengadò”, que siegue à Toulouso
vo à Mount-Pelié.
De pèr ansin uno vièio garrouio d’apelacioun de noste
lengage toumbo.
D’efèt, à la lengo que cantavon li troubadour, se
ié disié mant un cop la lengo prouvençalo, aurié
pouscu resta lou noum dóu parla de tóuti li gènt
dóu Miejour, mai li renaire l’an pas vougu, l’engàmbi
èro que la lengo prouvençalo pourtavo lou noum d’un
soulet terraire la Prouvènço, la Prouvènço
egemounico, centralisarello que bouto sa lengo pertout sus lis àutri
païs d’Oc…
Adounc se diguè pièi, la lengo d’Oc, e tourna-mai
se rediguè qu’aquelo apelacioun s’estacavo à-n-un
rode, lou Lengadò centralisaire.
Eh bèn, aro sara acaba, la lengo d’Oc se pòu pas
plus restaca à-n-uno terro, la prouvinço de Lengadò
que, pecaire, à l’enverso, pourtavo rèn que lou noum
dóu parla de si gènt, es à l’artimo.
Mai gardaren la lengo d’Oc es la lengo d’aquéli que,
vuei, dison “o”, coume la lengo d’Oil es la d’aquéli
que dison “oui” pèr dessepara dous mounde.
Basto,
dirian osco à la Setimàni, mai se trobo que soun Segne,
Jòrgi Frêche, es ana dire tout d’uno que la lengo
dóu païs èro rèn qu’un patoues…
e d’apoundre pièi, pèr pas trop se faire crida “un
patoues dóu latin”!
Sian mai cue, emé nòstis apelacioun de lengage e de terraire.
Bernat
Giély
FELIBRIGE
1854 – 2004
Lou
tèms a pas de preso sus lou Felibrige que vèn de festeja
si 150 an.
Li voues di primadié resouno encaro dins l’atualita :
“Lou 21 de mai de l'an 1854, sèt jouvènt èron
acampa au castelet de Font-segugno, alin dins la Coumtat, sus la mountagno
de Castèu-nòu-de-Gadagno. Couneissès pas lou castelet
de Font-segugno ? Un nis de roussignòu perdu dins la ramiho.
Segur un nis de roussignòu, car de-longo li felibre ie venien
canta, au brut di font cascaiarello, en fàci d'aquelo autro font
pouëtico, la grand roco bloundo de Vau-cluso.
— Es aqui, coume dis uno prefàci dóu Liame de Rasin,
que fuguèron aplaudi li proumié cant de Mirèio,
qu'Aubanèu a vist sa Miougrano en flour, que Crousillat fasié
gousta sa Bresco, que Mathiéu a coumença sa Farandoulo
e que Tavan a fa brusi lou dindin de soun eissado. »
Li sèt jouvènt: Brunet e Pauloun Giera d'Avignoun, Ansèume
Mathiéu de Castèu-nòu-de-Papo, Mistrau de Maiano,
Roumaniho de Sant-Roumié, Tavan de Gadagno, emé lou felibre
qu'a l'ounour de vous parla, tóutis afouga pèr lou bèu,
tóutis enebria de l'amour de la Prouvènço, en uno
sesiho memourablo e soulènno, foundèron lou Felibrige
e tirèron lou plan dóu proumier Armana.
Avèn fa de camin, despièi, un glourious camin!
…
Escoutas, o gouvernaire, e sachés bèn que pèr tant
aut e pouderous que fugués, la lengo prouvençalo es bèn
au-dessus de vautre! Sachés que sian un grand pople, e qu'es
plus lou tèms de nous mespresa! Trento despartamen parlon nosto
lengo ; d'uno mar à l'autro mar, di Pirenèu is Aup, di
planuro de la Crau i campas dóu Limousin lou meme amour fai batre
noste pitre, l'amour de la terro natalo e dóu parla peirau. Sachés
qu'arrestarés pulèu lou mistrau quand boufo e la Durènço
quand escampo que la lengo prouvençalo dins soun triounfle.
Teoudor Aubanel
|
