|
De
bon verai, l’anglés a pres plaço dins lou mounde
dóu travai, resquiho eisa dins la publicita, la musico,
li filme, l’enfourmatico, l’internet, basto tout ço
qu’es mouderne.
Partènt d’aqui touto meno de gènt bèn
branca dins la vido vidanto estalouiron soun gàubi de parla
anglés pèr esnoubisme rèn que pèr
resta mouderne.
(L’esnobe es adeja un mot d’eila que vòu dire
lou courdounié, pièi fuguè uno meno de mot
de mesprés pèr aquéli qu’èron
en deforo de l’Universita de Cambridge. Pecaire, li courdounié
despareisson mai lis esnobe fan flòri).
Adounc pensas un pau, s’à n-aquéli gènt,
— n’i’a que tirasson tambèn encò
nostre —, ié demandavian de parla patoues coume si
grand e rèire grand?
Basto! Es toujour la memo istòri que viro, la recoumenceto.
Fuguè un tèms ounte la lengo franceso èro
la lengo dóu Poudé, la lengo di noutable. Se la
majo part di gènt d’en bas se n’en garçavon,
se n’en troubavo pamens proun pèr parla coume si mèstre,
coume li gènt d’en aut.
Es li mémi singe que cambion de lengo tóuti li siècle
à l’aflat dóu vènt d’amount.
Glaude Hagège countèmplo acò… Es la
tourre de Babèu s’en vai en douliho, la cresian dreissado
dins li païs dóu levant, èro bastido en ribo
de Tamiso sus de foundamento soulido, cimentado de Basic English.
Tout lou restant es que de sablo que resquihon dins l’aigo
dóu tèms.
Vai, a resoun : — Li lengo
soun bèn mai que
d’espèci vivènto. Soun situido au mai prefouns
de l’umanita. Uno lengo es tambèn un biais de senti
d’imagina e de pensa. Desfèndre soun amo fàci
i peril que l’amenaçon, acò coumando de liéura
un coumbat. Davans la pretendudo moundialisacioun, la lucho pèr
la pluralita di culturo e di lengo es uno formo de l’acioun
umano pèr inversa lou cours, apertamen inmancable di causo
dóu mounde .
Sian bèn de soun avis, nous autre, pecaire, que luchan
pèr sauva nosto lengo, tant soulamen sian pas dóu
meme coustat de la barragno.
Soun coumbat pèr lou francés es un coumbat pèr
l’esperit, que dis. Coume se lou nautre èro un coumbat
pèr inenteligènci.
Mai lou finoche saup que se pòu pas crida au nivèu
internaciounau que lou francés dèu èstre
sauvo-garda quand l’Estat francés de soun coustat
sagatavo si lengo regiounalo.
D’aqui entre aqui, lou fau pas dire, lou fau nega… pamens
fai adeja escorno à nòsti gouvernaire, adounc fau
leva aquéu descrèdi : — Une condition d’efficacité
est que l’Etat neutralise le reproche, stratégiquement
habile bien que de mauvaise foi, qui lui est fait parfois à
l’étranger, à savoir de réclamer que
le français garde son rang international, alors qu’au
même moment les langues régionales ont une situation
précaire en France.
Sabèn pas ounte trobo la marrido fe dis estrangié
que veson que tóuti lis estat d’Éuropo respeiton
la Charto éuroupenco di lengo regiounalo e minouritàri
e que lou gouvèr francés refuso de l’aplica
sus soun terraire.
Belèu qu’aquéu gouvèr, aro, a la petocho,
se sènt trop menaça pèr lou lengage anglés,
vòu pas se leissa rousiga à l’en-dedins pèr
li parla regiounau e partènt d’aqui counsoulido l’unicita
de sa lengo, nivello, betouno, aubouro de bàrri, coume
l’article 2 de la Coustitucioun que recounèis plus
qu’uno lengo pèr la Republico, lou francés.
Bèn segur coumprenèn noste brave lenguisto que repren
ço que Frederi Mistral avié deja espremi mai pouëticamen :
— chaque langue est par nature le miroir d’un peuple
et de ses représentations.
Mai, se coume l’escriéu, la douminacioun d’uno
souleto lengo es uno menaço, nous autre sian menaça
pèr lou centralisme lenguisti francés, pèr
lou moundialisme anglés, e esperan plus que la revihado
dóu lengage chinés…
Adounc, quand, pèr faire viéure la diversita di
lengo, Glaude Hagège nous demando de refusa la soumessioun
à n-uno souleto lengo que pretendrié li suplanta
touto. Restan ne!
Fai de tèms e de tèms que refusan aquelo meno de
soumessioun à la lengo de la Republico, mai belèu
que se sian engana de lengo, sian pas sus lou meme espigoun de
l’escalo di lengage de l’umanita.
|
