Editouriau
dóu mes de mai
Culturo e
viticulturo prouvençalo
Lou
vin pur de noste plan
Charto éuroupenco
di lengo regiounalo
Èro l'an passa. Fai un an que i’aguè,
lou 7 de mai 2008, lou grand debat à l'Assemblado Naciounalo emé l'ufanouso
declaracioun dóu Gouvèr sus li lengo regiounalo presentado
pèr Dono Crestino Albanel, la Menistro de la culturo e de la coumunicacioun.
È
ro plus besoun de ratifica la Charto éuroupenco di lengo regiounalo
vo minouritàri, l'Estat francés anavo s'óucupa soulet
dóu sort de si lengo eisagounalo. Vesian d'aqui li lèi
e li decrèt d'aplicacioun s'amoulouna pèr faire lou pan
de nas à-n-aquelo Charto éuroupenco de nàni.
L'annado a pas sufis… Li 577 deputa que travaion coume de bèstio
dins l'emicicle de l'Assemblado Naciounalo an pas lou tèms, pecaire,
de s'escavarta emé d'afaire culturau parié.
Li falié vèire susa lou 9 d'abriéu passa, quouro
assajèron de vouta la creacioun d'uno nouvello autourita amenistrativo
independènto coumpausado de 9 membre nouma pèr 6 an - l'Auto
Autourita pèr la difusioun dis obro e la prouteicioun di dre sus
Internet, cargado de metre en plaço un dispousitiéu de
sancioun graduado pèr lis internauto - aquelo HADOPI faguè chi,
li 577 deputa èron pas vengu, se retroubèron rèn
que 36 dins lou round e se pousqué pas adóuta aquéu
proujèt de lèi. Urousamen i'a pas de sancioun graduado
pèr l'absenteïsme di deputa.
Basto, nòsti gouvernaire an de pan sus la cledo, e nous van mai
dire que sian pas dins li priourita di priourita.
Lou
rousat de Prouvènço
De
tout biais, la Prouvènço a chanja de
man e de culturo, es lou menistre de l'Agriculturo, Michèu Barnier
que s'en óucupo aro.
Quau vous a pas di que lou vin de Prouvènço fasié la
uno à Brussello. La Coumessioun éuroupenco vai reglamenta
la fabricacioun dóu vin rousa.
À
l’enverso de la Charto éuroupenco que volon li Prouvençau,
aqui li proudusèire de vin prouvençau n'en volon pas.
E aquéu reboussié de Gourvernamen, aqui èro d’acord,
estènt que lou 27 de janvié lou delegat francés
a vouta aquelo dispousicioun, adounc fai aro quàuqui countoursioun
e prepauso quàuqui coumpensacioun pèr s’asata à la
reglamentacioun éuroupenco.
Sauvaren lou rousat de Prouvènço ! Acò es l'item.
La Coumessioun éuroupenco vai autourisa la fabricacioun dóu
vin rousa pèr uno mescladisso de vin rouge e de vin blanc.
Acò sarié plus de rousat que dis lou direitour dóu
counsèu interproufessiounau di vin de Prouvènço,
François Millo, "lou rousat de coupage a la coulour dóu
rousat mai es pas jamai de rousat". La coumessàrio éuroupenco à l'Agriculturo,
Marianne Fischer Boel, elo, pèr defèndre aquéu proujèt
de coupage dis : — Vèse pas perqué li proudutour éuroupen
beneficiarien pas di mèmi poussibleta que si councurrènt
estrangié.
Aquéli metodo soun adeja aplicado en Australìo, en Africo
dóu Sud emai en Espagno, adounc pèr durbi lou marcat à l'espourtacioun,
sènso entravo éunoulougico, fau i'ana… La Chino se
garço pas mau de la vinificacioun dóu rousat… fau
n'i'en vèndre.
Fau
saupre que lou vin rousa que se bèu à l'ouro d'aro
es fa subre-tout emé de rasin negre. Ço que baio la coulour
es la pèu dóu rasin.
I'a dos metodo de vinificacioun dóu rousat, la saunado e lou pressurage
dirèit.
La
saunado coumenço pèr la maceracioun dóu rasin
dins uno cuvo. Après quàuquis ouro de cuvesoun pèr
baia la coulour e lou frutat, lou jus es retira, pèr ana fermenta
dins uno autro cuvo. Es aqui que lou vigneiroun sauno la cuvo pèr
n'entira lou jus.
Lou pressurage dirèit es la teinico la mai emplegado pèr
faire lou vin rousa. Lou rasin vendemia es versa dins lou pressadou néumatic
e la maceracioun duro que lou tèms dóu ramplissage. L'entirage
se fai pièi segound un cicle ounte se vai aumenta plan-planet
lou nivèu de pressioun emé de fàsi de rebechage
quouro la cuvo vai vira e revira pèr esbrena lou marc. Es aqui
que se fai lou fraciounamen di jus de pressurage. Segound sa coulour
vo soun agressiveta tanico podon èstre vinifica separamen emé de
tratamen particulié coume lou coulage pèr rèndre
lou vin mai clar.
D’aquéu biais se fan li vin rousa d’apelacioun countourroulado
de Prouvènço.
La revòuto di vigneiroun vèn aro de la decisioun de Brussello
d’autourisa la mescladisso de vin rouge e de vin blanc pèr
faire de rousat.
Lou menistre francés de l’Agriculturo, Michèu Barnier,
assajo d’apasima tout lou mounde. A fa repourta enjusqu’au
16 de jun l’adóucioun d’aquelo decisioun éuroupenco.
D’aqui entre aqui, lis espèrt di 27 païs de l’Unioun Éuroupenco
preparon uno reformo mai largo de l’etiquetage e dis apelacioun
di vin. Pèr regla lou proublèmo di proudusèire de
vin rousa francés, an adeja decida que li vigneiroun en Franço
poudrien utilisa l’etiquetage “rousat tradiciounau” sus
si boutiho pèr li metre en valour à respèt di rousat
pèr coupage.
La Franço es lou proumié proudusèire moundiau de
vin rousa, davans l’Itàli e l’Espagno. Emé 1
milioun d’eitoulitre proudu, la Prouvènço represènto à-n-elo
souleto 8 % de la prouducioun moundialo de vin rousa. La chifro d’afaire
dis apelacioun countourroulado Costo de Prouvènço, Coustau
d’Ais-en-Prouvènço e Coustau varés a aumenta
de 20 % despièi 2000.
De-segur, li vigneiroun de Prouvènço soun en proumiero
ligno.
Mai dins tout, la guerro pèr la vinificacioun dóu vin rousa
es perdudo d’avanço.
I’a un rousat de grand lùssi en Franço que s’es
toujour fach en mesclant de vin rouge e de vin blanc, es aquéu
de Champagno.
Pièi, es jamai esta enebi de proudurre de vin de taulo pèr
coupage.
Adounc
tout se jogo sus lis apelacioun countourroulado, lou Menistre de l’Agriculturo l’a bèn coumprés pèr
se sourti d’aquel afaire tihous en prepausant l’etiquetage
de “vin tradiciounau”.
Es un afaire de ma grand la borgno, lou rousat tradiciounau
de Prouvènço
sarié adounc founda sus la tradicioun, d’un usage ancian.
Tant soulamen, enjusqu’à la fin dóu siècle
passa, èro pas la bevèndo preferido dóu païs.
Lou vin que s’es toujour begu es lou rouge, aquéu d’aqui
pòu èstre counsacra pèr la tradicioun, mai lou rousat
a coumença de coula à flot emé la davalado di vancancié sus
la Costo d’Azur emé li nouvèu mode alimentàri.
Es pas que siegue marrit, tant soulamen sa vinificacioun es
pas tant naturalo qu’aquelo dóu vin rouge, e se disié un
vin bastard.
Se dis pamens que lou terme de vin rousa sarié esta emplega pèr
lou proumié cop en 1682 dins lou vignoble d’Argenteuil pèr
designa lou vin clar en lengo franceso.
En prouvençau, cercant de-bado, aquéu voucable de rousat
vo de vin rousa dins lou "Tresor dóu Felibrige".
Frederi Mistral bevié pamens de vin, de rouge e de clareto, tastavo lou
vin de Barbentano, lou vin de Crau, lou vin de Chusclan, lou vin de Ferigoulet,
lou vin de Frountignan, lou vin dóu Genestet, lou vin de Jurançoun,
lou vin de Lenglado, lou vin dóu Lengadò, lou bon vin d’alicant,
lou pichot vin d’At, lou vin argentau de Cassis, lou vin daura
de la Nerto, lou noble vin de Bachelèri, lou vin de la Costo dóu
Rose, lou fin moust de l’Ermitage, lou vin caud de la Costo-Roustido…
Dins tout, lou vin de Tavèu a degu escapa au leissicoulogue.
Basto, en esperant l’aplicacioun de la Charto éuroupenco
di lengo regiounalo, poudren enrichi noste voucabulàri em’aquéli
mencioun dis etiqueto pegado sus li boutiho de vin prouvençau:
"rousat tradiciounau" e "rousat pèr coupage",
coume avèn lou "parla tradiciounau" e lou
"parla de coupage".
Tout acò bastardejo… |
