Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de mai 2022

 

Pèr descentralisa

Coume se sono l’autounoumìo pouliticamen
emé poulidesso…

L’autounoumìo de la Corso es quàsi uno proumesso eleitouralo de l’Enmanuèl Macron que leissè dire à soun menistre de l’Interiour, lou Gerard Darmanin:
“Nousautre, sian lèst pèr ana enjusqu’à l’autounoumìo. Vaqui, lou mot es di. Après, la questioun es de saupre ço qu’es aquelo autounoumìo. Fau que n’en discutessian”.
Se coumprenié que la discutido èro entrepachado pèr la campagno eleitouralo.
Que de candidat siguèsson esta pèr ana enjusqu’au bout d’aquelo autounoumìo, acò n’apouncho pas un fus. Fau pas cerca de rougno pèr se grata. Lis un qu’avien qu’uno braio, an perdu l’orèmus, lis autre, d’escambarloun, an vira caloto pèr s’agenouia davans lou segnour vincèire e prene plaço à soun coustat. Coumprenèn ni tourro ni bourro ànaquelo filounarié, mai aro coume coumprene lou mot “autounoumìo”?
Aquéu voucable s’envèn dóu grè, “auto” que vau dire “se, o éumeme” e “nomos” la lèi, valèntàdire la lèi que se baian tout soulet. Mai es uno noucioun qu’aro s’escapo de la poulitico, quouro se parlo d’autounoumìo energetico intran dins li marcat de la prouducioun de gaz, d’eleitrecita, etc. pèr un païs que vau assegura la realisacioun de si pròpri besoun e vuei cabusso dins l’ordre ecounoumique moundialisa, que laisso la part bello is entrepresso multinaciounalo e loucaliso pas sis envestissèire.
Lou filousofe Micoulau Poirier l’esplico: “En terme souciau, istourique e mai largamen poulitique, l’autounoumìo pòu tambèn se revela uno couquiho vuejo poudènt prendre quento formo que siegue, comto tengu de l’infinido creativeta e plasticita umano”.

De tout biais, i’a deja plusiour regioun doutado de l’autoumoumìo en Franço: lis Isclo Valis e Futuna, la Poulinesìo franceso, SantPèireeMiqueloun, SantBartoumiéu e SantMartin. La NouvelloCaledounìo e li Terro australo an tambèn un “estatut particulié”.
Pèr retourna dins nosto isclo, la Corso, es uno vertadiero demoucracìo loucalo que se demando, “uno autounoumìo de plen dre e de plen eisercice”.
Bèn segur, tant lèu, la couleitiveta sara devengudo autounomo, mancara pas de bouta la couóuficialeta de la lengo corso que ié fuguè refusado à respèt de l’article 2 de la Coustitucioun, la souleto lengo de la Republico es lou francés.
Faudrié, debon, l’independènci, mai n’es parié la Coustitucioun l’empacho emé soun article proumié: “La Franço es uno Republico indivisiblo”.

Es ansin, e aro que l’Enmanuèl Macron es tourna elegi cabiscòu de la Republico, vai, coume l’avié anouncia, s’óucupa de la Corso, de soun autounoumìo pèr mena belèu à l’independènci, mai faudrié pas óublida lis àutri regioun qu’an lou meme soucit de se diregi souleto.
Dins aquelo draio, lou 8 d’abriéu, lou Counsèu regiounau de Bretagno a vouta pèr demanda à l’Estat la duberturo de negouciacioun en visto de soun autounoumìo legislativo, reglamentàri e fiscalo. La dono que presentè lou tèste manquè pas de dire “Sian counsciènt dóu caratère quauque pau sulfurous de la noucioun d’autounoumìo dins la gramatico poulitico franceso”.
Lou presidènt de la Regioun, éu, i’anè de counclure: “La chanço qu’óufrissèn à l’Estat, es de prene nòsti repounsableta e d’èstre coumtable davans nòsti ciéutadan”.
N’es parié pèr l’Alsaço que d’en proumié vòu sourti de la Regioun dóu GrandEst que i’a empega Mèste Francés Hollande.
Vuei, es lou mouvamen alsacian Unser land que revendico l’autounoumìo coume la Corso. Bèn segur aquelo questioun d’autounoumìo se crido que mai en Gouadeloupo e Martinico, ounte se preciso delongo que l’autounoumìo es pas l’independènci. Autounoumìo, independènci, acò tirassavo despièi de tèms, e adeja, au siècle passa, li Prouvençau èron de partènço, la filousofo Hannah Arendt manquè pas de lou dire dins soun libre “Du mensonge à la violence” : Li Galés e lis Escoussés, li Bretoun e li Prouvençau groupe etnique de quau l’assimilacioun, indispensable preliminàri à la fourmacioun d’un Estat naciounau, semblavo perfetamen establo e assegurado manifèston d’ùni tendènci separatisto oustilo i gouvernamen de Paris e de Loundro.”
Saupre, vuei, se li Prouvençau soun toujour dins aquelo draio, adeja en camin an perdu lou noum de sa prouvinço, pèr s’endeveni PACA, pièi Regioun Sud, acò pèr l’encauso d’amenistraire de mentalita proufessouralo. Coume lou dis un autre filousofe d’aro, Michèu Onfray, “La depersounalisacioun a plus besoun de grand mejan de masso coume à l’epoco classico dóu toutalitarisme”. Adounc de quente biais fau nouma li persouno que rèston en Regioun Sud? Es pas de causo à dire dins soun libre “La pensée postnazie”.
Saupre encaro se la Prouvènço es pas fin finalo uno patrìo morto pèr si nouvèu ciéutadan e baio pieta coume l’afourtissié dins sis “Écrits de Marseille”, la filousofo Simouno Weil: “Degun pòu avé l’espèr de ressucita aquéu païs d’oc. On l’a, pèr malur, trop bèn tuia”.
Dins tout, li Prouvençau soun plus à egalita emé li Corse, an perdu soun terraire mentre que l’isclo tèn toujour sa barragno de mar.
Basto! fau resta fisançous e ranima l’espèr d’uno Prouvènço restablido e autounomo emé sa lengo toujour vivo.
Sian bessai d’aquelo patrìo
Li cepoun emai li priéu
Corso de luen, o fraire
Coumunien tóutis ensèn!
La Coupo es pas vuejo…
En esperan la realisacioun de la proumesso menisterialo, toucant l’autounoumìo di regioun, fau tourna mai parti is urno lou 12 e 19 de jun, pèr, aqueste cop, emé d’eleicioun legislativo, e sara l’escasènço de ramplaça belèu quàuqui deputa trop bèn tanca d’assetoun dins sa grand cadiero de l’Assemblado Naciounalo. I’anaren pas pèr quatre camin, boutaren deforo tóuti li deputa qu’an vouta contro la Charto éuroupenco di lengo regiounalo, e escoutaren la cantinello de tóuti li nouvèu emé sa saco clafido de proumesso pèr sauva li lengo regiounalo e persegui la descentralisacioun pèr baia mai d’autounoumìo i regioun.
Se saup adeja que lou Mouvamen alsacian Unser Land sara presènt dins tóuti li circouscripcioun legislativo d’Alsaço. Parié en Bretagno emé l’UDB qu’a tambèn si candidat. En Corso sarié l’Unita di Naciounalisto. En Óucitanìo, es anouncia que i’aurié de candidat dóu POC, Partit óucitan, e dóu Partit de la Nacioun óucitano.
Encò nostre, sarié belèu “O, pèr Prouvènço” emai “Prouvènço Nacioun” que bandirien de pretendènt dins la batèsto legislativo. À l’ouro d’aro n’en sabèn pas mai, s’esquihan tout bèn just de l’eleicioun presidencialo à l’escoundudo dóu courounavirus e dins la pòu d’uno boumbo nucleàri que risco de nous toumba sus la tèsto.
Basto! Parié que lou faguè la Rèino Jano, escoutaren Frederi Mistral:
“Vai, vai laisso lou tèms amadura li nèspo! ”

 

 

Bernat Giély

 

 

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat