Editouriau dóu mes de mai 2026

Lou francés d’abord

E nautre en plen jour la gardaren
toujour la lengo dóu Miejour

Aro, se fau pas plagne di direitivo lenguistico de l’Estat francés que nous a fa la favour d’aprene e de parla, d’en proumié, la lengo franceso que fai mirando dins lou mounde entié, tant pis pèr l’escamoutage de la lengo d’oc de
famiho !

L’Óusservatòri de la lengo franceso de l’OIF, Ourganisme Internaciounau de la Francoufounìo, vèn de publica un raport sus “ La lengo franceso dins lou mounde ”.
Sus nosto planeto, s’atrobo 396 milioun de persouno qu’emplegon aquéu parla, e ansin lou francés es la quatrenco di lengo li mai impourtanto après lou mandarin, l’anglés e l’espagnòu, emai siguèsse encaro talouna pèr l’arabe. Em’ acò, vuei, lou francés es la lengo la mai apresso dins lou mounde, just darrié l’anglés.
Coumtant 51 milioun d’escoulan, sarié la souleto lengo presènto dins quasimen tóuti li sistèmo escoulàri dóu mounde entié, de-coutrìo emé l’anglés.

Se dis mai que lou francés es la segoundo lengo la mai “ vehiculàri ” au mounde, valènt-à-dire la lengo que barrulo lou mai en deforo di parlaire natiéu, toujour bèn segur après l’anglés. Pas proun d’acò, lou francés sarié la tresenco lengo de l’ecounoumìo moundialo, l’espàci francounfone engèndro 16,5 % dóu PIB moundiau e 20 % dóu coumerce internaciounau de marchandiso.
Enfin, à l’ouro d’aro qu’avèn plus li pèd au sòu, mai la tèsto dins l’Internet que beilejo e sounouriso la moulounado de parla tirassant encaro sus terro, aqui un autre raport vèn d’èstre dreissa pèr l’Óusservatòri de la diversita lenguistico e culturalo dins l’Internet. Se coustato que la proumiero lengo emplegado es l’anglés, emé l’espagnòu en segound, e lou mandarin en tresen.
Pièi, de-coutrìo, en quatrenco pousicioun l’arabe, lou francés, l’Indi, lou pourtugués e lou russe.

Dins tout acò, i’a bèn segur l’IA, l’inteligènci artificialo, que destrìo tout ço que fau dins li grand moudèle de lengage. Soun “ Large Language Model ” sarié multilengue.
Tant soulamen, si baso de dounado soun essencialamen en anglés estènt que la qualita di responso en francés es noutado de mens bono qualita.

Basto ! Dins tout, se dis que l’epicèntre de la francoufounìo es plus en Éuropo, mai en Africo, 65 % di gènt que parlon francés rèston en païs african e segound li previsioun facho pèr l’Ourganisacioun Internaciounalo de la Francoufounìo en l’an 2050, 590 milioun de persouno charraran en francés, mai 9 d’aquéli persouno sus 10 demouraran en Africo.

S’óublido de dire qu’acò es la resulto de la coulounisacioun de l’Estat francés o Bèlge en Africo au siècle XIXen. Coume es esta fa pèr interdire li lengo regiounalo dins l’eisagone, eilabas, parieramen, li gènt an plus agu dre de parla soun lengage terradouren e an degu barjaca lou francés coume l’avié impausa bèu proumié lou rèi Francés 1ié en 1539.
Saran descoulounisa avans l’arrivado de la lèi Deixonne qu’autourisara en 1951 l’ensignamen di lengo regiounalo e subre-tout l’acabado finalo en 1992 emé l’article 2 de la Coustitucioun qu’afourtis que la lengo de la Republico es lou francés.
Bon, à despart dóu Coungo, de la Costo d’Ivòri, dóu Gaboun, de la Guinèio, dóu Mali, de la Mauritanìo, dóu Niger, dóu Senegau, de la Soumalìo, dóu Tchad, de Madagascar o de l’isclo Mauriso, plus degun parlo di pople definitivamen coulounisa de Franço, que perdon sa lengo l’alsacian, lou basque, lou bretoun, lou catalan, lou corse, lou flamand, lou francique, l’óucitan o lou prouvençau, tout acò pèr óubeï à la lèi qu’embarragno aquéu paure mounde dins lou francés.
En Prouvènço sian dounc dins li 35 % di gènt que parlo la lengo franceso dins l’eisagone.
Segur lou francés se pòu parla d’en pertout, mai pèr nautre, toujour bilengue, es la lengo prouvençalo que passo d’en proumié, e la mantendren riboun-ribagno. Poudèn pas crèire l’UNESCO qu’a pas fa li comte, e crido “ Lou prouvençau, l’auvergnat, lou lemousin, lou gardiòu e l’óucitan lengadoucian soun classa coume gravamen menaça de desparicioun ”.
Coume dis noste prouvèrbi : - Fau un bon messourguié pèr trouba uno causo perdudo

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com