Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de Mars

Dous milo cinq cènt lengo à l'artimo

Lou mes passa dins l'encastre de la «Journado internaciounalo de la lengo meiralo», l'UNESCO a presenta, à Paris, la nouvello edicioun de soun Atlas di lengo en dangié dins lou mounde.

Es bèn segur uno versioun eleitrounico d'aquel Atlas que prepauso de dounado de-longo atualisado sus aperaqui 2.500 lengo en dangié dins lou mounde. Aquel óutis numérique interatiéu se trobo sus lou site internet de l'UNESCO. Pèr lou counsulta fau counèisse uno di 6 lengo óuficialo de l'UNESCO, l'anglés, lou francés, l'espagnòu, lou russe, l'arabe vo lou chinés.
Em'acò se pòu faire touto meno de recerco sus li 2.500 lengo en dangié, classado segound cinq nivèu de vitalita diferènt : - vulnerablo. - en dangié. - seriousamen en dangié. - en situacioun critico. - amoussado despièi 1950.
Aqui s'avisan que sus mai de 6.000 lengo que se praticon dins lou mounde, mai de 200 se soun amoussado au cours di tres darniéri generacioun, 538 soun en situacioun critico, 502 seriousamen en dangié, 632 en dangié, e 607 soun vulnerablo.
Es triste de vèire que n'en soubro 199 qu'an pas mai de 10 entre-parlaire, e 178 qu'an soulamen entre 10 e 50 entre-parlaire.
Demié li lengo amoussado i'a gaire, se cito lou mannés de l'Isclo de Man, un parla despareigu en 1974, l'aäsas de Tanzanìo, amoussa en 1976, l'óubik de Turquìo, esten en 1992, emai is Estat Uni d'Americo, l'eïak d'Alaska que despareiguè en 2008 emé lou decès la darniero à lou parla, Marìo Smith Jones.

Coume lou diguè lou baile de l'UNESCO, Koïchiro Matsuura, «La desparicioun d'uno lengo aboutis à la desparicioun de noumbróusi formo de patrimòni culturau inmateriau, en particulié dóu precious eiretage que coustituïsson li tradicioun e lis espressioun ouralo - di pouèmo e legèndo enjusqu'i prouvèrbi e i cascareleto - de la coumunauta que la parlavo. La perdo di lengo se fai tambèn au detrimen dóu raport que l'umanita entretèn emé la biò-diversita, estènt que carrejo de noumbróusi couneissènço sus la naturo e l'univers.»
Es uno formo mouderno, e belèu pas tant pouëtico, de la crido de Frederi Mistral :
«Uno lengo, me sèmblo, es quaucarèn d'aguste e de meravilhous, car es lou recatadou d'aquelo lumiero auto qu'an apela lou Verbe. Avès ausi parla d'aquéli jas de mino ounte s'atrobo escricho pèr la longo dóu tèms l'istòri espetaclouso de la creacioun dóu mounde, ounte se vèi d'erbasso, d'aubre carbounela, de pèiro clauvissouso, d'animalas afrous, que soun li testimòni di revoulucioun dóu globe. Eh! bèn, Messiés e damo, uno lengo retrais à-n-un jas minerau: car, au founs d'uno lengo, se ié soun depausa tóuti lis escaufèstre, tóuti li sentimen, tóuti li pensamen de dès, de vint, de trento, de cènt generacioun…»

Es de-bon verai pèr tóuti li lengage, mai pecaire 2.500 lengo soun adeja à l'artimo.
Li lengo desparèisson dins tóuti li regioun dóu mounde, mai lou gros di desparicioun se vèi dins li païs li mai deseireta. En Africo souto-sahariano, à l'entour de 2.000 lengo soun parlado, es de devina que 10 % d'entre éli cabussaran tout de-long dóu siècle.
L'Atlas de l'UNESCO mostro tambèn que li païs coume l'Indo, lis Estat Uni, lou Brazil, l'Indounesìo e lou Meissique, qu'an la mai grando diversita lenguistico, soun aquéli que comton lou mai de lengo en dangié.
En Australìo, se n'en trobo, aqui mai, 108 en dangié, mai vo mens grand.
Pamens se capito d'endré benesi pèr li lengo, ansin, la Papouasìo-Nouvello-Guinèio emé mai de 800 lengo que ié soun parlado n'a pas gaire de menaçado, rèn que 88.
D'un autre las d'ùni lengo se reviscoulon em' uno vitalita qu'es pas de crèire, coume lou cournique de Cournouaio vo lou sisheë de Nouvello Caledounìo que s'endevènon de lengo vivènto.
De mai, dins mant un païs, i'a de poulitico lenguistico favourablo i lengo terradourenco que veson ansin lou noumbre de parlaire crèisse, es lou cas de l'aïmara centrau e dóu quetchua dóu Perou, dóu maouri en Nouvello-Zelando, dóu guarani au Paraguai emai de quàuqui lengo dóu Canada, dis Estat Uni e dóu Meissique.

E lou prouvençau dins tout acò ?
Bèn-segur sian repertouria dins li lengo de Franço metroupoulitano.
E sèmblo pas de-bon, mai 26 lengo soun en dangié dins l'eisagone : 13 seriousamen en dangié, 8 en dangié e 5 en situacioun vulnerablo.

Nous autre, sian davans lou trau, demié li 13 seriousamen en dangié.

L'enterro-mort dóu Gouvèr parisen es aqui qu'espèro.
Mai, coume de cop que i'a, chanjo de casqueto, se cresèn sauva. Quau vous a pas di que la Menistro Crestino Albanel a proumés que i'aurié aquest an uno lèi sus li lengo dicho regiounalo.
Coume sabèn ço que tirassa vòu dire, avèn coumprés adeja que la lèi sara pas presentado au proumié semèstre 2009, estènt que lou travai parlamentàri es forço carga.
De tout biais, lou Gouvèr es mut. Bono nouvello pamens, uno deputado de Giroundo, Martino Faure, es presidènto dóu group d'estùdi parlementàri sus li lengo regiounalo e parlo la lengo d'oc. Tant soulamen a pas mai d'enfourmacioun de la part dóu Gouvèr sus l'avançado dóu proujèt.

Faudra de-segur l'aprocho de la manifestacioun dóu mes d'óutobre pèr belèu boulega la Menistro de la Culturo.

 
Bernat Giély
 
 

LEM

Lou proujèt Langues d'Europe e de la Méditerranée (LEM) counsisto à crea un óutis que permetra au publi lou mai large poussible de vèire, d'un biais ufanous, la diversita lenguistico.

Li questioun di lengo tocon d'un biais bèn precis la gloubalita dóu viéure ensèn que foundo touto soucieta umano.
La lengo es ço que i'a de mai entimo dans la coustrucioun de l'identita, tant au nivèu de l'individu coume au nivèu dóu group.
Aquéli que parlon la memo lengo e qu'an li mèmi cresènço soun ressenti coume fasènt partido d'un nous; aquéli que parlon d'àutri lengo e qu'an de coustumo e de cresènço diferènto soun senti coume lis autre.
La pòu dóu diferènt nous aganto davans uno paraulo incoumprensiblo que nous empacho de coumunica.
L'óupinioun publico vèi trop souvènt aquesto diversita coume un handicap. Es urgènt d'enventa li mejan d'aguè uno meiouro couneissènço de ço que represènton aquéli richesso lenguistico.

Vèire la diversita lenguistico

Lou proujèt LEM pourgis uno descripcioun preciso e scientificamen countourroulado de chasque lengo tratado, de sa situacioun sociò-lenguistico, poulitico e d'usage.
- D'enfourmacioun sus lis aspèt li mai significatiéu de la creativita qu'aquelo lengo permet: espressioun escricho, mai tambèn espetacle vivènt, musico, art plastique, etc.
- De dounado sus la plaço d'aquelo lengo dins lou desveloupamen de la regioun o dóu païs councerni. Se descurbira coume, pèr eisèmple, que l'eisistènci d'uno lengo particuliero aumento l'ofro de tourisme culturau d'un païs o d'uno regioun.
- D'enfourmacioun e uno evaluacioun di teinoulougìo numerico pèr l'utilisacioun di lengo: óutis burèuti, recouneissènço de la paraulo, traducioun assistado pèr ourdinatour.
- De liame chausi emé d'ourganisme baiant de service public e coumerciau.
- Un guide sus li metodo d'ensignamen di lengo, de refleissioun e de rendu-comte d'esperiènci sus l'ensignamen bilengue precoce, la fourmacioun countinuio.
Lou desveloupamen de l'ensignamen di lengo, essenciau pèr lou desveloupamen ecounoumi de l'Éuropo, poudra ansin s'apiela sus un pouderous desir de lengo. Aqueste desir, pèr tóuti, coumenço pèr l'amour de sa lengo, que siegue parlado pèr lou mai grand noumbre vo qu'aguèsse l'estatut de lengo minouritàri vo regiounalo.

L'ourganisacioun dóu maiun LEM

Lou Coumitat scientific internaciounau sara presida pèr lou proufessour Tullio De Mauro, Universita de Roumo (La Sapienza), ancian menistre de l'Estrucioun publico.
La realisacioun dóu site es assegurado pèr uno assouciacioun, lou Forum des Langues de France, que travaio en councertacioun estrecho emé la Delegacioun generalo à la lengo franceso e i lengo de Franço (DGLFLF) e lou Musée National des Civilisations de l'Europe e de la Méditerranée (MuCEM) de Marsiho.
Enri Giordan, ancian direitour de recerco au CNRS, qu'a councéupu lou proujèt, n'en asseguro la direicioun.
De chourmo naciounalo soun en cours d'ourganisacioun.

Lou site : www.portal-lem.com

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com
 
 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat