Editouriau
dóu mes de mars
Pas de Charto...
Manifestaren pèr l’ounour de nosto lengo
Lou presidènt de la Republico,
Micoulau Zarkosy, nous es vengu dire à Marsiho que vau baia
de dre lenguistique en degun de pòu d’uno derivo coumunautaristo.
Se gardaren bèn de revira si paraulo dins la lengo patrimounialo
que parlan :
"Quand on aime la France, on ne propose pas de ratifier la charte des
langues régionales qui n'a pas pour but de faire vivre les langues régionales
dans lesquelles je crois, mais de reconnaitre des droits linguistiques à toutes
les minorités et de les placer sous le contrôle d'une Cour européenne
qui jugera sans tenir compte de notre histoire nationale et de notre tradition
républicaine. C’est le communautarisme qui est au bout du chemin
et pas la défense d’un magnifique patrimoine de langues e de cultures
qui font la richesse de notre pays. Je vais défendre ce patrimoine, je
vais m’opposer à toute dérive communautariste."
Lou brave ome a trouba un espaventau emé li lengo regiounalo.
Li lengo minouritàri de Franço se podon parla à la
chut chut e se podon recounèisse coume uno estrasso de patrimòni,
mai pas mai.
La Charto Éuroupenco di lengo regiounalo que la quàsi toutalita
di païs membre de l’Éuropo an ratifica es vergougnousamen
forobandido de noste païs souto escampo que vai durbi lou camin
au coumunautarisme.
Uno coumunauta, segur, es, coume la definisson li diciounàri,
un groupe souciau que si membre vivon ensèn, poussedisson de bèn
coumun, e an d’interès coumun, uno toco coumuno.
Lou sufisse -isme vèn counfourta l’apartenènci au
groupe.
Frederi Mistral qu’avié pèr “ idèio
de remetre en lumiero en counsciènci de sa glòri la Nacioun
Prouvençalo, e coumprenènt souto aquéu noum touto
la gènt de lengo d’O, coume i tèms ancian ” se
farié trata aro de coumunautaristo óucitan autouvalourisant
uno coumunauta de bramaire abastardi dins soun couiounige lengatié.
Dins tout, sian dins aquelo mescladisso coumunautàri…
li que parlon uno lengo regiounalo sian moustra dóu det pèr
pas designa li coumunauta estrangiero guinchado pèr li prepaus
dis anticoumunautaristo valerous.
Li sutileta de la poulitico nous escapon…
Basto, tant que leissan nosto lengo s’aussi coume un patrimòni,
es-à-dire coume un vièi disque abena de gramoufone poussiéu,
aqui, tranquilet, aquéu patrimòni sara defendu.
Se voulèn la recouneissènço óuficialo de
nosto lengo coume tóuti li lengo regiounalo e minouritàri
d’Éuropo, acò n’es trop…
Sian pamens en un tèms ounte la couësioun éuroupenco
es troumpetado, e l’Alemagno, de-longo, moustrado en eisèmple.
Eh, bèn, nòsti vesin Aleman an ratifica la Charto Éuroupenco
di lengo regiounalo e an pas vergougno d’apara si lengo minouritàri
sènso se soucita d’un coumunautarisme escoundu.
De tout biais fau pas se faire de bellesso, tóuti li candidat à la
presidènci podon afourti que soun pèr la ratificacioun
de la Charto, mai sabon bèn que sara jamai aplicado tant que la
Coustitucioun sara pas refourmado. Souleto uno proumesso coublado, ratificacioun
de la Charto e reformo de la Coustitucioun, pòu èstre seriouso
pèr mena à la recouneissènço di lengo regiounalo
de Franço em’ un estatut juridi d’aparamen verdatié.
Dins la campagno eleitouralo que se meno, assajaren d’espepidouna
li proumesso de tóuti aquéli pretendènt au trone.
Es tout vist que nous van dire coume à l’acoustumado, avèn
d’àutri priourita que lou patoues de vòsti lunchènqui
prouvinço.
Adounc sian mai au pica de la daio. Pèr tóuti aquéli
jacoubin aparisenqui eisistan pas sian que l’oumbro dóu
passat.
L’escasènço es urousamen aqui, avèn mai de
se moustra e de crida nosto revóuto contre l’assassinat
de noste lengage.
Dissate 31 de mars saren tóuti à manifesta dins li carriero
de Toulouso pèr crida coume Frederi Mistral :
Eh! bèn, nàni! despièi
Aubagno,
Jusqu'au Velai, fin-qu'au Medò.
La gardaren riboun-ribagno,
Nosto rebello lengo d'O!
Souleto li manifestacioun permeton vuei
de se faire entèndre, e nautre n’avèn mai que mai
besoun se voulèn de-bon sauva nosto lengo.
Toulouso es un pau luen, tant pis, es un devé de faire lou camin
lou 31 de mars se voulèn pousqué trasmetre noste parla à nòsti
drole.
Subre-tout es de pensa que saren pas soulet, li Basque, li Bretoun, li
Catalan, li Corse, lis Alsacian, enjusco sus li terro ounte se parlo
lou creole, tóuti manifestaren lou 31 de mars. Fau pas cerca d’escapatòri,
la lengo de Frederi Mistral es à Toulouso qu’anan l’apara
aqueste cop.
Erian 25.000, fai dous an, à Carcassouno, poudèn èstre
encaro mai noumbrous e faire brounzi nosto voues.
Lou recampamen se fai plaço de l’Éuropo à Toulouso,
ounte tre 10 ouro e miejo se durbiran lis estand, taulié, tèndo
d’acuei e pountin d’animacioun.
Lou passo-carriero partira d’aqui à 2 ouro de l’après-dina
pèr ana acaba davans lou Capitòli.
Ié saren.
anemoc.org
|
