Editouriau
dóu mes de mars 2013
Escolo en refoundacioun
Pas de lengo regiounalo à l’Educacioun Naciounalo
Li lengo regiounalo soun foro-bandido de la Grando Reformo de l'Educacioun Naciounalo vougudo pèr lou Gouvèr.
Se tout lou mounde vèi que de manifestacioun d'ensignaire pèr carriero contro li quatre jour e miejo de travai, fau pamens pas óublida li regiounalisto nafra de pas trouba un pichot mot pèr l'ensignamen di lengo regiounalo dins l'ufanouso reourganisacioun de l'ensignamen en Franço.
E zóu mai, nous fau rena… Bello proumiero, la FELCO ( Federacioun di ensignant de lengo e culturo d'oc de l'educacioun naciounalo) a moubilisa soun mounde e tóuti lis aparaire de la lengo an segui.
Li deputat e senatour dóu païs, pèr resta devènt, ié soun ana de sa questioun estereoutipado pèr “ atira l'atencioun de M. lou Menistre de l'educacioun naciounalo sus l'absènci de mencioun esplecito sus la plaço di lengo regiounalo dins lou proujèt de lèi sus la refoundacioun de l'escolo…”, d'ùni souvèton espremi si sentimen sus la questioun, d'àutri s'estounon d'aquel óublit… basto ! tóuti saran atentiéu sus aquéu poun…”
Es uno sutilo dialeitico qu'a rèn de vèire emé nòsti dialèite !
Questioun sènso responso vo responso evasivo e prudènto.
Avèn pamens lou nouvèu deputat bretoun, Pau Molac, que s’es aganta lou Menistre de l'Educacion, Vincèns Peillon.
Em' acò sabèn tout, desempièi lou 30 de janvié 2013 :
M. Pau Molac.
“ Ma questioun s'adrèisso à M. lou menistre de l'educacioun naciounalo e i'assoucìe tóuti li deputat d'aquel emicicle que i'an adeja escriéu à prepaus di lengo regiounalo.
Lou proujèt de lèi sus la refoundacioun de l'escolo fai ges de mencioun de soun ensignamen. Coume de noumbrous coulègo e de noumbróusis assouciacioun, siéu sousprés e inquiet d'aquéu manco de presso en comte.
L'ensignamen di lengo regiounalo councernis en Franço aperaqui 300.000 escoulan, que mai de 70.000 seguisson lou moudèle de l'ensignamen bilengue en francés e lengo regiounalo. Avès recentamen declara que lou sujèt fasié counsènsus e escapavo à la poulemico. Li soundage mostron en efèt que li Francés ié soun de mai en mai estaca, emé de percentage que despasson dins d'ùni regioun li 80, vèire li 90 de soustèn.
Pèr autant, la simplo voulounta de faire aplica auprès de certans ispeitour o reitour li circulàri que regisson l'ensignamen di lengo regiounalo relèvo pèr fes de la passejado dóu coumbatènt. Li responso de vòsti counseié i questioun escricho sus aquel item soun eisatamen li memo que souto li gouvèr precedènt. Rapelle qu'en Franço, countrarimen à quàsi tóuti li païs d'Éuropo, ges de lèi baio d'estatut i lengo regiounalo : soun dounc à la mercés de tout recours au tribunau amenistratiéu e dins la mai grando insegureta juridico.
Moussu lou menistre, n'apelle dounc à vosto clar-vesènço. Touto absènci dins voste proujèt de lèi sara utilisado pèr fragilisa l'ensignamen di lengo regiounalo e empacha tout desvouloupamen d'aquelo d'aqui. L'eleicioun d'uno nouvello majourita e la voulounta dóu Presidènt de la Republico de faire ratifica la charto éuroupenco di lengo regiounalo vo minouritàri déurié encita lou menistèri à prene touto la mesuro de l'ensignamen di lengo regiounalo e pas trata aquelo questioun à la lóugiero.
Coume coumtas segurisa juridicamen l'ensignamen di lengo regiounalo au sèn de l'escolo de la Republico dins laqualo an touto sa plaço ? ”
M. Vincèns Peillon, menistre de l'educacioun naciounalo :
“ Moussu lou deputat, avès resoun de dire que li lengo regiounalo an touto sa plaço. Soun d'aiours recouneigudo à l'article 75-1 de nosto coustitucioun, ço qu'es pas rèn. Es ço qu'esplico que, sus aquéu sujèt, i'a uno countinuëta dins l'acioun dóu Gouvèr de la Republico entre la lèi Jospin de 1989, que recounèis la necessita d'ensigna aquéli lengo regiounalo d'aqui, ounte soun demandado e praticado, e la lèi Fillon de 2005.
Un tau counsènsus es necite au desvouloupamen d'aquéli lengo. Voudriéu d'aiours vous faire part d'un percentage que permetra sènso dóute d'apasima vòstis inquietudo. D'efèt, demié li 300.000 elève qu'avès cita - 272.000 pèr èstre eisat -, i'a agu entre 2009-2010 e 2011-2012, siegue en dous an, 24 % de mai d'elève que se soun engaja dins la pratico di lengo regiounalo. Sarié dounc curious de voulé faire vuei d'aquéu sujèt un sujèt de dificulta entre nous.
Mis óurientacioun soun de tres ordre.
Proumieramen, siéu lèst - l'ai deja di - à ço que li counvencioun entre l'Estat e li regioun, que permeton de trata aquéli sujèt, siegon espandido.
Segoundamen, es, tout à fa, impourtant que la charto di lengo regiounalo siegue ratificado, sachènt que i'aura de counsequènci, belèu legislativo, à prene en comte.
Tresencamen, es assouludamen necessàri - ié siéu dubert ansin que l'ai declara au Senat - que lou debat ague plenamen liò quouro se durbira au mes de mars aquéu sus la lèi d'óurientacioun. Se poudèn avança dins lou sèns de la pratico di lengo regiounalo, pourtado pèr l'ensèn de la nacioun e recouneigudo pèr nosto coustitucioun, alor avancen! ”
Bon, avèn tout coumprés, lou menistre finocho a pas di :
“ es verai, ai óublida li lengo regiounalo dins moun projèt de refoundacioun de l'escolo ”.
Que noun ! baio uno benedicioun pèr li lengo regiounalo, uno ourmouno gaire flourido, ounte esquihon si pico, es pas 300.000 escoulan es rèn que 270.000, acò jogo en sa favour. E pièi de quicha sus la pratico, de “ lengo demandado e praticado ”, acò jogo mai à minourisa.
Fin coume uno arno, nous pourgis si tres glourióusis óurientacioun, rèn que d'escapatòri…
D'uno vòu baia lou travai i Regioun, saup bèn que li Regioun an plus de sòu… mai es que de plan sus la coumeto.
De dous, nous vèn tourna servi la charto éuroupenco coume se n'avié de besoun pèr sa refoundacioun de l'escolo franceso ! Nous pren pèr d'ase, mai nous proumés la luno…
De tres, remando tout acò à-n-un nouvèu debat au mes de mars sus la lèi d'óurientacioun, ansin belèu si tres óurientacioun n'en faran qu'uno pèr li pàuri pesco-luno que sian ! Lou pèis es nega !
Abéura d'aquéli bèlli resoun, lou tèste s'acabo pèr “ Aplaudimen sus li ban di groupe SRC e ecoulougisto ”, urousamen que n'i'a que soun countènt !
Pratican pas la memo lengo !
Bernard Giély |
