Editouriau dóu mes de mars 2025

Li vilo e li vilage

Ciéuta mistralenco en bello espelido
pèr soun acamp à Gréus-Li-Ban...

Lou proumié coungrès “ Ciéuta mistralenco  : e après ?! ” dóu Felibrige s’es tengu lou 8 de febrié à Grèus-Li-Ban, bèn segur souto la beilié dóu valènt capoulié Paulin Reynard, mai em’ un presentatour de trìo pèr aquel acamp, lou mèstre de la televisioun nostro, lou majourau Frederi Soulié.
Tóuti li maire di coumuno labelisado vo sis ajoun èron aqui, tant coume li felibre referènt.

La toco d’aquéu rescontre èro d’abourda lis enjo essenciau pèr l’aveni de la culturo e de la lengo.
Se coumencè bèn segur pèr lou labèu Ciéuta mistralenco sis engajamen e soun evoulucioun.

Lou capoulié Paulin Reynard presentè lou travai coumpli pèr la grando avançado dóu noumbre de vilo e vilage atriva pèr aquelo acioun felibrenco e ramentè pamens que soun davancié avié proun bèn prepara lou biais de faire pèr n’i’en baia la man.
Jaque Mouttet, lou rèire capoulié, èro aqui e prenguè la paraulo pèr ramenta si souveni de l’ourganisacioun d’aquelo rampelado i coumuno pèr moustra soun estacamen à la dóutrino mistralenco, en mai d’acò presentè tambèn touto l’obro que s’es facho e countùnio de se faire dins sa coumuno de z-Ais, pèr la proumoucioun de la lengo prouvençalo bono-di sa participacioun afeciounado e courajouso. L’Oustau de Prouvènço n’es la meiouro marco.

Pièi, emé li baile dóu Counsèu di ciéuta mistralenco se parlè tambèn de mant ùni coumuno qu’obron pèr manteni la lengo e li tradicioun e de mai en mai meton sis afichage e li noum de si carriero en lengo prouvençalo…

De bon verai lou labèu “ Ciéuta mistralenco ” es uno reüssido felibrenco, uno moulounado de coumuno n’en fai la demando…

Sènso quita lou camin de la labelisacioun, à l’ordre dóu jour pourtavo l’ensignamen publi de la lengo e de la culturo prouvençalo dins l’encastre escoulàri e fuguè Dono Celino Marteau-Imbert, counseiero proche lou reitour de l’Acadèmi de z-Ais-Marsiho que n’en presentè l’estat atuau.
D’en proumié “ À l’escolo publico e dóu tèms de l’escolo ” emé l’iniciacioun à la lengo que pòu èstre renfourçado enjusqu’à 3 ouro pèr semano e n’en veni au bilenguisme.
Emai “ en foro dóu tèms d’escolo ” valènt-à-dire dins li pauso vo après la classo pèr uno aprocho culturalo e uno sensibilisacioun à la lengo que se pòu faire emé d’intervenènt esteriour. E d’apoundre qu’au licèu lou prouvençau se pòu chausi en segoundo lengo óubligatòri, 2 ouro pèr semano em’ un couëficiènt 6 au bacheleirat o bèn en tresenco lengo pèr un ensignamen oupciounau de 3 ouro pèr semano em’ un couëficiènt 4 au bacheleirat.
Au coulège es uno oupcioun pèr li classo de la 6enco à la 3enco d’uno à dos ouro pèr semano qu’es presso en comte pèr lou brevet.
Aquéu se pòu counsulta sus lou site d’internet : https : //www.ac-aix-marseille.fr/apprendre-le-provencal-122840
Em’ acò la counferenciero i’anè de respondre à la questioun : d’escoulan “ Quant n’i’a ? ”, e se veguè tout d’uno aficha à l’escran qu’en 2023 se troubavo :
— 5691 escoulan dins 66 escolo,
— 2028 coulegian dins 31 coulège
— 338 licean dins 16 licèu.
“ Mounte soun? ” l’afichage moustrè d’aperaqui un cinquantenau de vilo e vilage dins li quatre despartamen de la faculta d’Ais-Marsiho, li Bouco-dóu-Rose, la Vau-Cluso, lis Aup d’Auto Prouvènço e lis Àutis-Aup.

Lou capoulié ramentè pièi la participacioun dóu Felibrige i videò d’internet di Jobastres que permetien de baia à entèndre la lengo prouvençalo dins lou mounde entié, mai es uno autro videò escalustranto que se baiè à vèire à l’escran marcado “ Poulitico ” aquelo dóu presidènt de la Republico, Enmanuèl Macron, lou coupo-lengo, countènt de dire à l’Acadèmi franceso que “ la lengo franceso es estado lou crusòu de l’unita dóu païs e de bèn afourti qu’es estado la fabrico d’uno nacioun que senoun s’escapavon dins si lengo vernaculàri, si patoues, si diferènti lengo regiounalo, qu’èron d’estrumen de divisioun de la nacioun ”. Frederi Mistral que brandiguè aquel estrumen de divisioun l’aurié dounc leissa en eiretage au Felibrige…
Se croumpè un grand chut…

Falié pièi n’en veni à uno questioun tihouso dóu prougramo de la journado “ lou finançamen de la cuturo regiounalo ”. Lou counferencié èro un ome poulitico aparaire de longo dato de la lengo, la culturo e li tradicioun prouvençalo, Jan Mangion, maire de Sant-Estève dóu Gres, que baiè tóuti lis entre-signe necite pèr demanda uno suvencioun i couleitiveta loucalo emai à l’Estat. Segur li proupousicioun d’ajudo soun impourtanto, mai couneissèn trop la musico pèr saupre la moulounado de paparassarié que fau pèr davera l’óurmono d’aquélis amenistracioun.
Lou coungrès s’acabè emé la poulido saludado dóu conse de Grèus, Pau Audan, que ramentè l’acioun que menavo pèr la sauvo-gardo de la lengo e la culturo prouvençalo.
E pèr acaba lou capoulié Paulin Reynard anouncìe que l’an que vèn se tendrié tourna mai un Coungrès “ Ciéuta mistralenco : e après ? !  ”.

La sesiho acabado, la responso à la questioun que se pausavon li felibre Marsihés fuguè baiado : la vilo pòu èstre “ Ciéuta mistralenco ” e empega si panèu en grafio óucitano Marsilha ciutat mistralenca estènt que lou Felibrige acèto li dos grafìo, qu’es bèn marca dins sis estatut “ Chasque felibre a la liberta d’emplega lou parla d’o que i’agrado e de l’escriéure dins lou biais que ié counvèn lou mies”.
Lis escolo felibrenco marsiheso van èstre en rebelioun que volon pas d’escripcioun óucitano sus li panèu de sa vilo.
Pamens à la debuto èro esta demanda à Tricìo Dupuy de baia lou noum de tóuti li carriero de la vilo en prouvençau e bèn segur en grafìo mistralenco ço que faguè, lis afouga óucitanisto de Marsiho èron pas encaro intra en pisto… S’empegavo “ Castèu-Goumbert ”, aro sabèn plus, lou Roucas blanc vai belèu deveni lo Rocàs blanc, coume l’autouriso lou Felibrige.
Tant pis, coume lou diguè la cabiscolo, li sòci de la vièio escolo felibrenco, “..? Prouvènço !..” levaran sa pervenco pèr rebeca e refusa Marsilha. E saran pas soulet  !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com