Editouriau dóu mes de mars 2026

Voutacioun

Li Counseié municipau, tè !
se counseion que de sa tèsto

Ié sian, aqueste mes, lou dimenche 15 mars e lou dimenche 22 de mars 2026 fau elegi li
baile di coumuno, adounc :

Nàutri, li bon Prouvençau
Au sufrage universau
Voutaren pèr l’òli
E faren l’aiòli

Escoutaren mai Frederi Mistral dins sis Isclo d’Or…

Dins la Poulitico
Turno despoutico,
I’a que de capoun
E de cop de poung.

Segur es marrit de prene partit, mai en bon aparaire de la lengo prouvençalo avèn aqueste cop quàsi un centenau de coumuno que nous agradarié que gardèsson soun Maire e soun Counsèu municipau.

Es aquéli vilo e viloto qu’an bèn vougu èstre batejado Ciéuta Mistralenco, ciéuta qu’obron pèr la culturo di Païs d’Oc.

Tènon sa lengo, tènon la clau.

Pèr lou restant, uno chourmo d’assouciacioun óucitano vèn de manda un questiounàri i
candidat à-n-aquelo eleicioun coumunalo, lis avisan que l’óucitan es en dangié de mort
coume lou dis l’UNESCO mai que li soundage mostron bèn que d’en pertout li
poupulacioun soun toujour estacado i lengo regiounalo, adounc aro se demando i futur
elegit uno preso de pousicioun claro, vaqui l’interrougat, nous mancara de tèms pèr
publica li responso, mai cadun dins sa coumuno pòu reclama l’avejaire de si candidat sus
aquel item.

Bernat Giély

1 - Uno lengo virado vers l’aveni Quénti mesuro coumtas de prene pèr ajuda au desvouloupamen de l’ofro d’ensignamen de l’óucitan dins lou proumié degrad, autant bèn dins l’ensignamen publi coume dins l’ensignamen assouciatiéu, en liame emé l’Educacioun naciounalo e l’ensèmble dis atour councerni ? Vous engajas d’assegura la representacioun de la Vilo e de la Metroupòli dins li group de travai despartamentau e lou Counsèu academique dis lengo regiounalo ?

2 - Uno plaço istituciounalo pèr la lengo Es que comtas de metre en plaço un service dedica à la culturo d’oc em’ un elegit o uno elegido desplegadamen en cargo, un cargat o uno cargado de messioun emai uno referènto o un referènt dins li service councerni pèr la lengo e la culturo (educacioun, culturo, coumunicacioun/ signaletico, trasport…) ?

3 - Un soustèn à l’eistènci e au desvouloupamen di teissut assouciatiéu loucau Es que coumtas aumenta significativamen lis ajudo lougistico e financiero necessàri is atour e ouperatour liga à la lengo e à la culturo óucitano, mai que mai dins li doumaine de l’esport, de la culturo, de l’ensignamen, de la radiò, etc. ?

4 - Uno lengo vivo dins l’espàci publi Quénti mesuro coumtas de prene pèr assegura la presènci ouralo e escricho de l’óucitan dins li trasport, la coumunicacioun de la Vilo e de la Metropòli ( magazine, site internet…), la signaletico (noum de carriero, intrado d’agloumeracioun, óufice de tourisme, ouperacioun d’embessounage…) ?

5 - Uno prougramacioun culturalo dedicado Es que coumtas aumenta significativamen l’ofro culturalo ( teatralo, musicalo, cinematougrafico, literàri…) e espourtivo ( tambournet ) ligado à la lengo e à la culturo óucitano sus la Vilo e la Metroupòli ? Es que coumtas iscriéure dins lou caièr di cargo dis estruturo culturalo e li liò de difusioun suvenciouna l’óubligacioun d’uno prougramacioun en matèri de culturo óucitano ?

6 - D’agènt fourma Es que coumtas engaja d’acioun de fourmacioun à la lengo e à la culturo óucitano auprès di persounau en countat emé lou publi ( pichoto enfanço, biblioutèco, óufice de tourisme…) en demandant au Cèntre naciounau de la founcioun public territourialo (CNFPT) la meso en plaço d’aquesto fourmacioun ?

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com