Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de nouvèmbre 2014

 

Alarmo ensignamen

La lengo d’oc perd aro la poussibleta d’avé un avenidou.

La situacioun es gravissimo e voulèn alerta lou mounde qu’es pas toujour bèn enfourma di afaire de l’ensignamen. Devèn agacha claramen la situacioun : l’ensignamen de la lengo es en perdicioun au segoundàri, en fracas assoulu au licèu. Lis efeitiéu ié soun à la rouino.
En Lengadò li que soun councerni pèr quicon d’óucitan soun passa en un an de 468 à 307 ! Es-à-dire un centenat de licean pèr nivèu pèr 4 despartamen d’oc de la regioun. En Aquitàni pèr 5 despartamen n’en soun à 244.
Pèr Miejour-Pirenèu es un pau miés : pèr 8 de spartamen n’en soun à-n-un chic mai de 1300 emé 200 dins lou privat. Dins aquesto regioun benesido, coume dins lis àutri, vesèn dins lou public uno evapouracioun dis efeitiéu dóu coulège au licèu em’uno baisso de 10 à 1.
Curiousamen la baisso es bèn mens forto dins lou privat d’aquesto regioun que ié passon de 333 à 203.
Pèr Prouvènço la situacioun es proun marridasso tambèn au segoundàri coume lou moustrè lou darnié counsèu academique.
Acò pèr lou quantitatiéu, mai es pas miés pèr lou qualitatiéu.
Poudèn encaro parla d’ensignamen au segoundàri e particulieramen au licèu ? La grando majourita de ço que se ié fai, se debano dins lou tèms que ié disèn peri-escoulàri fa pèr de proufessour titulàri que n’en soun proun descoura. S’agis en majourita d’óupcioun facultativo emé tóuti li nivèu mescla.
Dins l’Óucitanìo, tout lou sistèmo educatiéu sort pas proun de jouine fourma e bilengue au nivèu bac. Ounte nous meno tout acò ?
La rouino dóu licèu es la capitado d’uno estrategìo que lancè la lèi Fillon en 2005. Fillon es un enemi declara di lengo regiounalo e soun idèio èro bèn de trenca la cadeno de soun ensignamen pèr l’arrouina coumpletamen.
Se lou segoundàri e d’en premié lou licèu s’estanco, i’aura pas de mounde pèr ana à la faculta e dóu cop pas mai de jouve fourma pèr faire de regènt dins lis escolo que se van arresta sènso que siegue necite de lis ataca direitamen. La lèi Fillon es de 2005. Meteguè de tèms pèr se lança e pourta frucho amaro, mai aro ié sian en plen, e n’en vesèn li counsequènci : rouino au licèu e lou superiour en grand peril.
I’a de mens en mens de faculta que fan de licènci d’oc e lis efeitiéu d’aquéli que demoron soun mai que meigrinèu em’uno proupourcioun proun bello de retirat : acò fai que lou pesquié de jouine es bèn redu.
Mesuran deja despièi 3-4 an coume es dificile de trouba de jouine en capacita de se fourma au mestié. Lou peril es majuscule : lèu-lèu nous troubaren sènso proufessour coumpetènt pèr lis escolo. Fau uno moubilisacioun determinado di mouvamen de defènso de la lengo emé d’óujeitiéu clar e gagnable. Pèr nousautre à Calandreta avèn decidi de cambia noste vejaire e nosto acioun sus lou segoundàri. La cambiamen de noum de la Counfederacioun qu’a quita d’èstre dis escolo laïco pèr veni Counfederacioun Calandreta, ensignamen laïc inmersiéu óucitan n’es lou simbole.
Es la preso en comte de l’emperatiéu d’ourganisa la seguido pedagougico e lenguistico dis escolo pèr fin que l’óuferto au segoundàri vèngue de mai en mai raro e proublematico. Faire de bon primàri sènso avé de seguido es faire de bèu fracas !
Adounc avèn decidi de nous boulega mai pèr lou segoundàri, coulège e licèu qu’es un emperatiéu.
Mai countunian tambèn de milita pèr un cambiamen de l’óuferto dins lou public qu’uno grando proupourcioun tambèn de calandroun i perseguiran de tout biais soun escoularita.

Tre 2005 avian mesura lou peril, milita pèr li counvencioun, e acò souvènt proun soulet.
Aro prepausan au mouvamen óucitan de se moubilisa pèr cambia li counvencioun emé li regioun pèr tau de ié defini vertadieramen « li moudalita de l’ensignamen » de la lengo d’oc, coume es previst dins lou tèste de la lèi, mai que s’es pas jamai escri. E ié devèn defini un estatut lengo regiounalo especifique dins l’ensignamen. (precisioun : aqueste terme de lengo regiounalo dèu èstre chausi pèr ço que courrespound à la lèi e à l’article 75-1 de la Coustitucioun). Un autre principe maje : sourti la lengo d’oc de la coumpeticioun emé lis àutri lengo e óupcioun. Es uno coumpeticioun toutalamen inegalo que rouino à tout cop l’ensignamen de nosto lengo. Un jouine n’en fai proun en prenènt un travai de mai, ié fau pas demanda en mai de faire un sacrifice educatiéu. L’Estatut Lengo Regiounalo a de defini un ensèn de moudalita ourganisado segound li principe seguènt :
- La lengo d’oc vèn pas à la plaçp d’uno lengo vo d’uno óupcioun. Es uno chausido qu’empacho rèn.
- Es toutèms dins l’ouràri escoulàri.
- I’a un cursus vertadié d’ensignamen.
- Es valoura em’ un couëficiènt 5. (aro es de 2, pèr li lengo morto es 3. Fau mai faire pèr li viéu).
Aquésti principe soun uno baso minimalo e duberto à de proupourcioun. L’estatut lengo regiounalo dèu avé tambèn de moudalita pèr primàri. Autro necessita dins li counvencioun : ié devèn metre l’ensignamen superiour qu’es fin qu’aro jamai presenta dins li publicacioun di CALR. Dins lou superiour devèn assouludamen gagna uno moudificacioun de ço que se fai dins l’encastre di ESPE pèr la fourmacioun di proufessour qu’es toutalamen insufisènt : emé li diferènti versioun de la masterisacioun, se trouban aro em’ uno reducioun au nivèu simbouli de la presènci de la lengo d’oc dins la fourmacioun di mèstre. Reducioun à-n-un nivèu qu’empacho l’eficacita. Prepausan de mesuro determinanto que devèn defèndre tóuti : Soustèn à la seguido pedagougico de l’inmersioun e dóu bilenguisme i coulège e licèu. Estatut de la Lengo Regiounalo dins lou publi defini pèr li Counvencioun. Cambiamen radicau dins la fourmacioun di proufessour dis escolo. De-bon, i’a lou fiò, nous fau tóuti boulega fort

Li Calandreta

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat