Editouriau dóu mes de óutobre 2026

I’a plus de castèu catare…

L’UNESCO escampo lou parla dóu pople…

L’UNESCO es toujour à faire la trìo di bèn culturau qu’an uno valour universalo eicepciounalo pèr l’umanita e demié aquéu patrimòni culturau s’atrobon subre-tout li mounumen, lis ensèmble architeiturau, li site arqueoulougique, qu’an crea lis ome. Aquest an, lou Coumitat dóu patrimòni de l’UNESCO s’es acampa à Busan en Republico de Courèio dóu Sud pèr sa 48enco sessioun fin de coumpleta sa listo patrimounialo e se decidè aqui de classa de castèu d’Óucitanìo, tant soulamen se n’es pas vougu garda l’apelacioun que se n’en fai dins lou païs, “ li castèu catare”.
S’agis :
- dóu castèu d’Aguilar ( Audo ), uno fourtaresso dis encencho councentrico,
- dóu castèu de Lastours ( Audo ), un ensèn de quatre castelet quiha sus un esperoun roucassous,
- dóu castèu de Pèiro-Pertuso ( Audo ), la mai vasto di fourtaresso taiado dins la roco,
- dóu castèu de Pue-Laurèns ( Audo ), un castèu à la cimo d’uno cresto cauquiero,
- dóu castèu de Queribus ( Audo ), ciéutadello dóu vertige sus soun roucas,
- dóu castèu di Terme ( Audo ), sentinello que baio uno visto imprenablo sus lis Àuti-Courbiero.
- de fourtificacioun de la Ciéuta medievalo de Carcassouno.
- emai adeja dins la tiero, lou castèu de Mount-Segur ( Ariège ) grand simbèu de la resistènci cataro.
Dison aro que lou terme “ li castèu catare” es uno apelacioun ineisato.
Aquéli ciéutadello soun estado bastido e rebastido pèr lou rèi de Franço au siècle XIIIen pèr apara soun reiaume, ansin l’UNESCO ié baio aro lou noum óuficiau de
“ fourtaresso reialo dóu Lengadò ”.

Bèn segur aquel escafamen de l’istòri cataro dóu païs a pas plasegu is assouciacioun óucitano estènt qu’acò valouriso lou poudé reiau au detrimen di vitimo de la Crousado. E lou conse de Beziés, Roubert Ménard, ié vèi uno nouvello umeliacioun dóu Miejour,
“ coume se li Catare èron decidadamen de trop, meme mort ”.

La questioun de lengage es toujour aqui dins aquéli ciéutadello.
Aqueste mes, dès annado après li manifestacioun d’Anen Òc, Carriero Óucitano countùnio d’afierma l’óucitan coumo lengo vivo, poupulàri e de soucieta.
Dins aquelo draio, apellon à-n-uno manifestacioun massivo à Mount-Segur li 17 e 18 d’óutobre.
Que la disèn castèu catare vo fourtaresso reialo, Mount-Segur es d’en premié un liò de refuge que simbouliso à l’ouro d’aro, la resistènci de touto li minourita contro l’empèri. À l’encontro d’uno museïficacioun creissènto, fau faire de Mount-Segur un espàci vivènt.
Ensèn, bastissèn un fare sus aqueste pic, qu’esclairo Óucitanìo touto e nous duerb au mounde.
Councert, counferènci e acioun.
Siguen noumbrous !
E la parlaren toujour la lengo dóu Miejour.

Tóuti lis enfourmacioun soun sus lou site : https://www.carrieras-occitanas.eu/

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com