| D’efèt lou Mouvamen Parlaren s’èro esmòugu à la
leituro dis estatut d’un nouvèu Counsèu de la lengo óucitano
que foro-bandissié li grafìo mistralenco. Estènt qu’èro
lou souvèt dóu delegat generau à la lengo franceso e i lengo
de Franço, Bernat Cerquiglini, de vèire espeli un parié Counsèu,
falié adouba un autre proujèt. Es ço que se prepausè à Brignolo.
De
mai, bagna pèr bagna, e pèr satisfaire encaro un souvèt
d’aquéu delegat que reünis tout lou mounde à
Paris, s’es prepausa la creacioun d’un “pole d’eisemplàrita”
en Prouvènço que sarié un grand cèntre de
numerisacioun enfourmatique e de realisacioun virtualo, capable coume
lou fai lou CIEL d’OC de recampa tóuti li libre e doucumen
escri dins nosto lengo pèr lis espandi sus la telaragno d’internet
e tambèn coume lou fai lou COL’OC de grava sus disque la
memòri sounoro de noste parla.
De-segur, rèn que l’anóuncio d’aquélis
Assiso prouvençalo faguè d’erso. D’ùni
cridèron à la vergougno, se poudié pas mounta à
Paris divisa, estalouira nòsti garrouio, farié lou jo
dóu gouvèr.
D’àutri diguèron osco, li qu’escafon nosto grafìo
soun de maufatan, li fau countrista.
Basto, la boulegadisso s’endevenié tempèsto.
Lou mouvamen Parlaren se prenguè de reguignado di dous bord.
Mai, fin finalo, li pousicioun s’esclargiguèron, après
la raisso, l’arc-de-sedo apareiguè à Brignolo.
La sesiho fuguè duberto pèr lou presidènt Marc
Audibert, que ramentè l’obro e l’acioun dóu
Mouvamen Parlaren. La majouralo Peireto Berengier, secretairis de l’AIDLCM
presentè pièi la situacioun dins lou mounde di lengo menaçado
de desparèisse e li souvèt dis istitucioun internaciounalo
pèr lis apara, ço que menavo i proupousicioun de presenta
à Paris “Lou Counsèu de la lengo d’Oc e lou
pole d’eisemplàrita ”.
Tricìo Dupuy, presidènto dóu Ciel d’Oc e Marc
Audibert presidènt tambèn dóu Col’Oc dounèron
à vèire e à entendre li realisacioun d’aquéli
cèntre pèr justifica la chausido d’un pole enfourmati
mouderne pèr espandi nosto lengo dins lou ciberespàci.
Pièi lou debat se durbiguè, Jan Glaude Bouvier noste mai
egregi lenguisto s’apliquè à redire qu’en Prouvènço
se parlavo la lengo d’Oc, emai lou prouvençau dins tóuti
si varieta n’en fuguèsse l’espressioun majo. Tout lou
mounde sena n’en counvèn, mai vau miés l’entendre
dire pèr la mai auto autourita en la matèri.
Se prenguè pièi lou biòu pèr li bano, falié
n’arriba à la grafìo.
Li militant dóu Mouvamen Parlaren, li sòci de l’Escolo
dóu Caràmi de Brignolo, quáuqui parèu de
majourau dóu Felibrige e li catau dóu CREO Prouvènço
poudien s’afrounta vo s’amiga.
Se i’avié mal-entendu, tout lou mounde n’en counvenguè,
èro degu au manco de coumunicacioun. Li prouvençau soun
pas esta enfourma di tratacioun que coumencèron à Besiés.
Aqui, es lou presidènt de l’IEO, que dins uno letro à
legi nous baiè la responso.
“L’IEO prenguè au mes d’abriéu la decisioun
d’amassa cinq partenàri pèr prepara lis assiso di
Lengo de Franço. Avèn counvida la Counfederacioun di Calandreta,
lou Felibrige, Oc-bi e la federacioun dis Ensignant de lengo e culturo
óucitano. Avèn vougu ansin moustra que la questioun de
grafi èro pas la que fasié la diferènci. Lou Capoulié
pourtè sa vesioun di proublèmo e i’avèn pas
demanda de renega la grafi mistralenco pèr parla emé nous
autre ”.
Lou proublèmo, es qu’en Prouvènço i’a
pas que de felibre e d’escolo felibrenco. Lis àutris assouciacioun
e mouvamen an que de se teisa. L’esplico es claro, an pas uno espandido
sus touto l’Oucitanìo. Lou mouvamen Parlaren fai partido
d’aquelo merço d’assouciacioun qu’an proun d’obro
en Prouvènço sènso se soucita d’ana regula
lou parla gascoun vo auvergnat.
Adounc ié fau resta bèn sage dins soun cantoun, aceta
la vesioun mistralenco d’apara la lengo d’oc dis Aup i Pirenèu,
mai pas agué dre à la paraulo de la man d’eila dóu
Rose estènt que soun relarg d’aparamen es la Prouvènço.
Cantouna que cantouna pèr defèndre la lengo rèn
que dins noste païs, fau pas s’estouna que se batejèsse
pièi aquelo d’aqui, lengo prouvençalo.
En deforo d’acò, i’avié la publicacioun dóu
Counsèu de la lengo óucitano que nous carcagnavo, emé
sa fraso assassino “La grafio es aquelo de l’I.E.O e aquéu
principe noun pòu èstre remes en questioun”.
Aqui li mèmbre dóu CREO - Prouvènço, presènt,
se desoudalisèron de soun poudé centrau pèr resta
dins la draio dóu raport Langevin qu’afourtis la liberta
de pousqué s’espremi dins sa lengo e dins sa grafìo.
Lou presidènt de l’IEO, éu, dins sa letro apound
“La grafìo es uno partido di proublèmo, pas mai.
Pèr tóuti aquéli resoun, dins lou proujèt
que metren en plaço, emé d’ùni partenàri
que creèron lou Counsèu de la lengo Oucitano, avèn
previst uno liesoun direito emé li qu’escrivon en mistralen
en prepausant que lou Capoulié dóu Felibrige siegue representa
dins aquéu proujèt emé voues counsultativo coume
sara presènt tambèn emé voues counsultativo lou
presidènt de l’IEO ”.
Tant soulamen lou capoulié Pèire Fabre, vougué
pas se leissa marca dins aquéu proujèt pas encaro bèn
clar. Es lou majourau Lucian Durand que legiguè sa letro de
galant refus.
Basto! pèr l’assemblado de Brignolo èro de bon vèire
que lou mal-entendu venié mai d’uno descouneissènço
de la situacioun en Prouvènço que d’uno voulounta
deliberado de nous pourta tort.
Adounc se decidè pèr clava aquéu proublèmo
de faire uno moucioun coumuno pèr faire saupre qu’en Prouvènço
sian tóuti d’acord, vaqui lou tèste di tres mai
gràndis
assouciacioun que, en mai de la revendicacioun pèr l’article
2, sara la paraulo di prouvençau à Paris :
“L’Assemblée réunie à Brignoles le 27
septembre 2003 demande à l’unanimité que l’instance
représentative de la langue d’oc prenne en compte l’ensemble
de l’héritage culturel de Provence dans le respect, entre
autre, de la diversité des parlers et des systèmes orthographiques
de la langue d’oc.
Mantenènço de Prouvènço dóu Felibrige.
CREO-Provença.
Mouvamen Parlaren.”
Quant à noste proujèt de Counsèu de la lengo d’oc,
tóuti li participant fuguèron d’avis de l’adouba
d’un biais prouvençau emai coume lou demandè un jouine
sestian d’un vintenau d’an, de ié baia uno dimensioun
mai counsequènto, parier à l’Istitut de la lengo
bretouno que se countènto pas d’establi li règlo
de la lengo mai n’asseguro tambèn la proumoucioun.
Lou pole d’eisemplàrita, éu, rèsto toujour
la proumiero grando realisacioun que se pòu presenta pèr
Prouvènço.
L’acamp de Brignolo se capitè trop courtet, autambèn
se decidè qu’un nouvel acamp se tendrié après
lis Assiso Naciounalo di lengo de Paris pèr councretisa nosto
voulounta d’oubra dins l’unioun e lou respèt de cadun
sus aquel item.
Un vintenau de participant is Assiso de la lengo nostro à Brignolo
van mounta, aro, representa Prouvènço à Paris,
ié fasènt fisanço, fàci au gouvèr
fau teni qu’un lengage.
Bernard
Giély |
