Mesadié d'enfourmacioun prouvençalo
Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de óutobre

I’anaren tóuti

O pople dóu Miejour, escouto moun arengo,
Se vos recounquista l’empèri de ta leng
o

Fai aperaqui uno annado que la manifestacioun de Carcassouno s’apreparo e s’amaduro, mai la revendicacioun que se crido s’ausis toujour pas de Paris.
Adounc ié faudra ana, en troupo, pèr brama mai fort sus li bàrri de la ciéutadello pèr faire clanti nosto lengo e restanca li nouvèu Simoun de Mountfort dóu gouvèr franchimand.
De bon verai, nosto lengo escanado au noum d’uno egalita saupicado de laïcita pèr li gouvèr nivelaire d’à passa-tèms, es aro estoufado e escafado au noum de la lèi de la Republico pèr li gouvèr d’aro.

Poudèn ploura d’à geinoui davans nòsti prince-deputa, poudèn se rebala pèr sòu davans nòsti segnour-presidènt di Counsèu Regiounau, poudèn plega lis esquino davans nòsti baroun-presidènt di Counsèu Regiounau, poudèn encaro davala plus bas, i’a toujour de boto à cira pèr reçaupre li cop de pèd au quiéu que touto la valetaio de la Republico se countènto de nous manda.
Aquest mes es la digneta d’un pople que vòu garda sa lengo que fara lume sus li bàrri de Carcassouno.
Degun dèu manca aquéu rendés-vous istòuri dins aquelo ciéuta au passat carga de glòri, simbèu de la resistènci.

Pèr li Prouvençau, bèn-segur, i’a lou Rose à passa. Frountiero sacrado dis integristo de la grafìo. Emai lou parla prouvençau siegue d’escambarloun sus lou flume pèr s’espandi enjusqu’au Vistre, fai pas rèn… Quet pecat ! s’ensigno rèn que la grafìo óucitano dins lis escolo de la man d’eila dóu Rose.
La rampelado de Frederi Mistral, “La gardaren riboun ribagno, Nosto rebello lengo d’O” la volon plus entèndre, es soun dre, bastisson sa muraio. Urousamen, la maje part di Prouvençau soun de mistralen de la bono e sabon que dis Aup i Pirenèu, e la man dins la man, aparan la memo lengo.
La Prouvènço coutrìo emé lou Lengadò, l’Auvergno, la Gascougno, lou Lemousin, lou Perigord, lou Piemount, la Vau-d’Aran sara presènto à Carcassouno.

Bèn segur, se pòu critica la chausido d’aquelo vilo qu’es pas soulamen capitalo regiounalo, que sèmblo retrougrada nòsti revendicacioun dins de cantoun perdu.
Bèn segur, se pòu rena de vèire aficha lengo óucitano en liogo de lengo d’o qu’acountentarié tout lou mounde.

Mai ço que s’óublido, es que fau trouba de gènt de bòni voulounta pèr ourganisa pariero manifestacioun. Se capitavon à Carcassouno.
Adounc, vai pèr Carcassouno.

Quand saren capable de tourna reçaupre tóuti lis aparaire dóu Païs d’oc à Marsiho, coume en 1982, aqui poudren belèu se plagne.
Vuei, pecaire, avèn lou malan sus la fardo, la Prouvènço s’estrifo dins de garrouio esterlo d’ensignaire, vòu miés clina cadeno.

Adounc, i’anaren ! pèr sauva nosto lengo, counsciènt coume dison, qu’es ço que nous unis, qu’es pèr l’aveni de la lengo, pèr soun dre de viéure e de se desvouloupa que devèn èstre à Carcassouno lou 22 d’óutobre.
Fau que lou brut d’aquelo manifestacioun revihèsse aquéli qu’an pas bèn coumprés que nosto lengo vòu viéure.

Bernat Giély

Tóuti à Carcassouno lou 22 d’óutobre pèr defèndre la lengo d’Oc

Es impourtant d’agué lou soustèn de la prèsso, di radiò e de la televisioun e dis elegi: counseié regiounau, generau e li conse. Tambèn la presènci di persounalita couneigudo de l’espetacle, de l’esport, de la poulitico, de la literaturo… mai saren noumbrous, mai auren de pes sus lou Gouvèr.
Un acamp se debanè lou 10 de setèmbre ounte tóuti li mouvamen militant se soun recampa. Li desplaçamen soun previst siegue pèr càrri (un cinquantenau de càrri es previst) siegue pèr co-veiturage. Tout lou mounde dèu i’ana emé de bandiero pèr bèn marca d’ounte vènon.
Uno delegacioun de Bretoun vendra que lou Counsèu Culturau de Bretagno soustèn la manifestacioun e li representant di lengo minouritàri mountèron à Renno en mars 2002. De càrri partiran de Brest e de Quimper lou divèndre pèr un retour lou dimanche de matin. Li sounaire de bagad saran li bèn-vengu e saran tras qu’aprecia à nòsti coustat.
De delegacioun vendran di Valèio dóu Val d’Aran e di Valèio italiano.

La manifestacioun
Recampamen dins lou jardin Andriéu Chénier davans la Garo de Carcassouno avans 2 ouro dóu tantost.
Un endré pèr gara li veituro à gratis es previst.
Lis ourganisaire prendran la paraulo de 2 ouro à 2 ouro 30 avans lou despart dóu courtège, de la Garo à la Ciéuta medievalo en passant pèr lou Pont Vièi. L’arribado es previst devers 5 ouro.
Lis ourganisaire prendran mai la paraulo, e de jouine legiran un meme tèste dins lou dialèite de sa lengo. S’acabara emé lou "Se Cante". Un espetacle es previst dins la vesprado dóu dissate à quàuqui kiloumètre de la Ciéuta.
Esperan èstre 10.000 persouno à Carcassouno pèr l’aveni de noste parla, e leva la descriminacioun culturalo!!!

Entre-signe : 06 86 00 66 39.
Eliano Bremond 06 24 66 91 46 - Jeròni Guirand 06 14 31 57 02.
Jan Saubrement :
jrpi@clubinternet.fr

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat