Editouriau
dóu mes de óutobre 2015
D’un vièi pople fièr e libre
Reviscoula nosto rebello lengo d’oc escarpido
Manifestacioun unitàri
Aqueste cop ié sian. Après un bon penequet de tres annado, beatamen bressa de bèlli proumesso, lis aparaire de nosto lengo soun enfin reviha… pèr manifesta tóuti coutrìo lou dissate 24 d’óutobre dins li carriero de Mount-Pelié.
En 2012, la manifestacioun de Toulouso recampè 30 000 persouno, la crido s’ausiguè e quàuqui couleitiveta territourialo prenguèron counsciènci de la nececita de metre en plaço de mesuro pèr sauva nosto lengo, mai vuei de que n’en rèsto ? Passo que t’ai vist !
En aut, lou gouvèr proumet mai de pitanço que de pan, nous fai lusi la Charto, pièi d’un lampeja d’uiau, demando au Counsèu d’Estat de nous paga d’un bèu nàni.
En bas, es trop tard pèr rena, li Counseié regiounau van chanja lou mes que vèn. Autambèn es l’ouro d’avisa tóuti aquéli pretendènt à la gouvernanço de nòsti Regioun que sus aquelo terro di troubadou se parlo toujour la lengo, la lengo d’oc, l’óucitan vo lou prouvençau, que sara en soun devé de manteni, un cop elegi.
Vaqui la toco d’aquelo manifestacioun engimbrado à bèl esprèssi avans lis eleicioun regiounalo.
Fau moustra tourna-mai que sian noumbrous à parla e vougué sauva la lengo de noste païs.
Senoun nòsti bèus elegit se van mai garça de nous-autre…
Óucitanìo
Mai pecaire, anan manifesta dins uno regioun qu’a pas encaro trouba soun noum. Pamens li quoutidian qu’an lou mounoupòli fan d’anóuncio, partènt de La Dépêche que vèn de se croumpa lou Midi-Libre e L’Indépendant… Se counsulto li legèire pèr chausi la bono apelacioun de la nouvello Regioun. Vaqui la listo di poussibleta, en bon francés bèn segur :
Midi-Méditerranée, Midi-Languedoc, Midi-Roussillon, Midi-d’Oc, Pays-d’Oc, Occitanie, Occitanie-Pyrénées, Occitanie-Pays Catalan, Pyrénées-Languedoc, Pyrénées-Méditerranée, Languedoc, Sud de France, Septimanie.
Aquelo meno de referendum se perseguis tambèn sus la telaragno d’internet, pèr aro se dis que la proupousicioun “ Occitanie ” sarié en tèsto.
Es deja aqui que lou bast maco, d’ùni militant óucitanisto, subre-tout aquéli que se trobon en deforo di frountiero d’aquelo nouvello regioun, pènson que sarié uno negacioun de l’Óucitanìo, grando coume la veson. Pamens degun à rèn di quand lou Lengadò s’es limita à la Regioun de Mount-Pelié e se baiavo lou Miejour à Toulouso. I’a un tèms que trempo, un tèms que destrempo.
Au contro pèr d’àutris óucitanisto, la primauta dins la chausido d’aquéu mot es la bello provo que l’Óucitanìo eisisto e l’emplé d’aquelo denouminacioun s’es vulgarisa.
Coume que siegue es pas lou pople que vai decida, mai si bèu representant, aquéli qu’an tant susa pèr se faire elegi… aro qu’an capita se van pas leissa cauciga pèr soun pople.
Prouvènço
En matèri de denouminacioun, es Prouvènço que pren un labèu de qualita emé Martino Vassal, la nouvello presidènto dóu Counsèu Despartamentau di Bouco-dóu-Rose.
Plus degun se poudra engana, sara marca “ Prouduch en Prouvènço ” sus tóuti li causo realisado en terro prouvençalo.
La galanto Dono es blasido d’amour pèr Prouvènço. “ Fort du prestige et du rayonnement dont jouit le mot “ Provence ” à travers le monde, ce nouveau nom affirmera avec force la richesse historique, l’attrait et le dynamisme de notre territoire… Attirer les investisseurs économiques, promouvoir tous nos talents et faire rayonner notre département doit être une ambition commune ”, que diguè.
Pas proun d’acò, a crea Les États Généraux de Provence, que dèvon permetre lou dialogue e l’escàmbi d’idèio emé tóuti. De grand debat recamparan li Counseié despartamentau e assouciaran tóuti li forço vivo dóu despartamen. Pèr acò, tant lèu s’es tengudo, lou mes passa, la proumiero reünioun descentralisado counsacrado à l’agriculturo en Prouvènço. Vendran pièi : — l’eisigènci soucialo, — l’equilibre e la preservacioun di territòri, pièi — la jouinesso. E Dono Vassal de rapela mai aqui que souvetavo valourisa e metre en avans lou labèu Prouvènço dins tóuti lis acioun de l’istitucioun despartamentalo.
Aquéu trelus de Prouvènço, aqui nous esbalausi !
Vaqui lou galoi tremoulamen di causo qu’escandihon en Prouvènço, coume dirié Batisto Bonnet.
E de redire coume Frederi Mistral que,
La Prouvènço nous fai gau.
Vivo, ardènto, pouderouso,
La Prouvènço benurouso
Enfin, que de tout biais Prouvènço fague flòri!
Bernat Giély
|
