Editouriau dóu mes de setèmbre 2026

Coumunauta ensulàri

L’estatut d’autounoumìo
de la Corso toujour en camin

Pèr uno Corso autounomo au sen de la Republico…

Pèr acò, s’es prepausa pèr la Corso un : “ Estatut d’autounoumìo au sen de la Republico, que tèn comte de sis interès propre, liga à soun ensularita mediterrano e à sa coumunauta istourico, lenguistico, culturalo, aguènt desvouloupa un liame singulié à sa terro ”.

Aqueste cop, ié sian, lou proujèt de lèi coustituciounalo pèr l’autounoumìo de la Corso vèn d’èstre adóuta pèr l’Assemblado Naciounalo, mai la caminado es pas acabado…

Restacado à la Franço pèr lou tratat de Versaio de 1768, la Corso es estado quasimen toujour amenistrado dins li mémi coundicioun que lou restant dóu territòri naciounau. Es, aro, uno Regioun emé dous despartamen que vòu soun autounoumìo.

Mai d’ùni terme emplega counvenien pas, adounc lou Gouvèr a prepausa em’ un amendamen de reprene lou tèste d’un autre biais :
“ La Corso es doutado d’un estatut d’autounoumìo au sen de la Republico, que tèn comte de sis interès propre, liga à si carateristico d’isclo mediterrano, i relèu mountagnous e à sa coumunauta ensulàri, istourico, lenguistico, culturalo, aguènt desvouloupa un liame singulié à la terro corso ”.

Es de parpello d’agasso, “ à sa terro ” se preciso “ à la terro corso ”, emé l’emplé de “ la coumunauta ensulàri ” sarié pèr pas baia à la coumunauta uno interpretacioun identitàri vo etnicisto.

Basto ! L’Assemblado Naciounalo a vouta pèr acourda aquel estatut d’autounoumìo à la Corso dins la Coustitucioun emé lou comte di buletin di deputa s’es n’es trouba 271 pèr e 202 contro.

Aro lou tèste vai èstre discuti au Senat. Pièi, encaro aquéu tèste déura èstre valida pèr li 3/5 e di parlementàri en Coungrès. Sènso óublida l’amandamen de l’Assemblado Naciounalo que rènd óubligatòri la counsultacioun dis eleitour corse dins de coundicioun previsto pèr un decrèt en Counsèu d’Estat deliberado en Counsèu di menistre.

Camino que caminaras, saupre se sian dins la descentralisacioun de la Republico, chasco regioun déurié retrouba pariero autounoumìo segound lou principe d’egalita, adounc, em’ un pau de paciènci, mancaren pas de reclama l’autounoumìo de la Prouvènço, un estat independènt que s’èro ralia à la Franço coume un principau à-n-un autre principau.

Tant soulamen en Corso, lou FLNC, Front de Liberacioun Naciounalo Corso, vòu pas qu’aquel estatut d’autounoumìo, sarié uno mascarado que diguèron si militant dins uno counferènci de prèsso cladestino lou 5 d’avoust : veson aqui “ Li principe que favourison e van permetre d’amplifica aquelo coulounisacioun de pouplamen, es uno gravo fauto poulitico ”. Pèr éli, aquelo coulounisacioun de pouplamen galoupanto sarié degudo à l’arrivado d’aperaqui 5 000 estrangié, en grando majourita de Francés e an qu’un message d’adreissa à-n-aquélis envahissèire “ restez chez vous ”, senoun sarés pas en segureta sus noste territòri naciounau corse... E volon arresta la folo aumentacioun di residènci segoundàri. Basto! La Corso autounomo au sen de la Republico franceso passara pas, lou FLNC vòu uno Corso independènto.

E pamens dins l’estatut d’autounoumìo i’a la recouneissènço d’unà coumunauta lenguistico, voudrian bèn que n’en siegue parié pèr la coumunauta prouvençalo !

Bernat Giély

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com