Editouriau dóu mes de set�mbre

La rintrado escoulàri…

L'ensignamen de nostro lengo dins lis escolo publico…

Li vacanço fuguèron caudo… Pamens se poudié pas espera la rintrado escoulàri sènso se boulega pèr assegura l’ensignamen de nosto lengo dins lis escolo.

Aro, lou nouvèu presidènt, Francés Hollande, emé lou poudé assoulu de soun partit, pòu faire la pasto duro vo molo. Quouro èro candidat voulié ranfourça l’Educacioun naciounalo e tambèn ajuda pèr la recouneissènço di lengo regiounalo. Ié sian… fau passa au travai prati de l’escoulan. I’a un tèms que trempo e un tèms que destrempo.

Urousamen, au bèu de l’estiéu, la FELCO (Federacioun dis Ensignaire de Lengo e Culturo d’Oc) e OCBI (l’assouciacioun di parènt d’elève bilengue) an pas espera la plueio, soun mounta à Paris, au Menistèri de l’Educacioun naciounalo ramenta la situacioun de nosto lengo e li besoun necite pèr soun espandimen dins lis escolo publico.

Avans que ié diguèsson coume à l’acoustumado, que se vai crea uno coumessioun e un óusservatòri pèr estudia loungamen soun cas, alestiguèron un doursié di mai coumplèt em’ un estat di lioc ounèste e de proupousicioun seriouso pèr la definicioun e la messo en obro d’uno poulitico voulountaristo de valourisacioun e de trasmessioun de la lengo pèr lou sistèmo educatiéu.

An coumença pèr ramenta un fube de causo que crèmon au lume pèr nous-autre, mai que lampejo pas dins lou bèu mounde de Paris.

La lengo d’oc es vuei ensignado de la meirenalo à l’universita dins la maje part di trento despartamen de soun païs, emai en regioun parisenco, au Licèu de Noisy-Le-Grand emai à l’universita de la Sourbouno.

Aquel ensignamen s’es mes en plaço dins l’Educacioun naciounalo en seguido de la lèi Deixonne de 1951. A beneficia d’un mouloun de circulàri e decrèt tant pèr l’ensignamen que pèr la creacioun d’un cors d’ensignaire fourma à bèl esprèssi emé lou CAPES d’óucitan-Lengo d’oc en 1991 e lou CRPE especiau, en 2002.

Dins l’Acadèmi d’Ais-Marsiho, uno esperiènci óuriginalo a fa mirando, aquelo di “ Cèntre d’ensignamen ranfourça ” que soun devengu pièi “ Cèntre d’ensignamen countinu ”, fai d’acò vint an dins li Bouco-dóu-Rose. Dous d’aquéli cèntre soun passa au bilenguisme, bono-di la circulàri dóu 21 de jun 1982 qu’istaurè la poussibleta d’un ensignamen bilengue dins lis escolo e l’autro circulàri dóu 5 de setèmbre 2001 que permet, à mejan coustant, uno trasmessioun eficaço de la lengo d’oc assourtido d’atous cougnitiéu counsequènt.

D’en pertout e dins tóuti li formo d’ensignamen, de la sensibilisacioun au bilenguisme, l’aprendissage de la lengo beneficìo d’un engajamen fort dis ensignaire dins uno pedagougìo de proujèt que porto frucho e permet à de milié d’escoulan d’escambia pèr lou biais de rassemblamen, de courrepoundènci… e de prene la pleno mesuro de la valour de sa lengo coume un óutis de desvouloupamen inteleituau, lenguistic e culturau.

Empacho pas qu’aquel ensignamen es en dangié, menaça pèr l’insufisènci di mejan que ié soun acourda e pèr l’absènci d’uno poulitico voulountaristo.

L’entrouducioun dins la Coustitucioun de l’article 75-1, pèr dire que “ Li lengo regiounalo apartènon au patrimòni de la Franço ” a pas crea d’óubligacioun pèr l’Estat.

Ansin, es de marrit vèire que la situacioun sus lou terren arrèsto pas de se desgrada.

En 2004, lou noumbre de poste dubert au CAPES d’óucitan-Lengo d’oc es toumba à 4, contro 14 en 2003, e 20 en 2002, e s’es mantengu à-n-aquéu bas nivèu.
De mai, entre 2004 e 2008, 19 ensignaire emé lou certificat soun esta recruta, entre que 40 ancians ensignaire de la lengo partien à la retirado.
Pas proun d’acò, la reformo de la fourmacioun dis ensignaire a coumplica l’afaire… barraduro de cours, recrutamen de vacatàri, desgradacioun di coundicioun de travai… em’ un net reculamen de l’ensignamen de la lengo dins lis endré ounte soun aprendissage èro lou mai fragile coume dins lis acadèmi de Limoge, de Clarmount-d’Auvergno vo de Grenoble.

Dins l’ensignamen primàri es gaire miés, dins d’acadèmi i’a pas soulamen de counvencioun coume es previst pèr la lèi dóu 23 d’abriéu 2005, lou desvouloupamen de l’ensignamen es quàsi impoussible.

Lou doursié de la FELCO esplico en mai d’acò lis inegalita de tratamen entre l’ensignamen de nosto lengo e lou dis àutri matèri, l’ensignamen de nosto lengo e lou dis àutri lengo regiounalo e l’ensignamen de nosto lengo entre lis acadèmi memo de noste païs.

D’aqui li mesuro d’urgènci que van prepausa pèr la rintrado.

— anulacioun di supressioun de posto, noutamen de counseié pedagougic e d’animatour.
— doutacioun budgetàri coumplementàri pèr li reitourat qu’an en cargo l’ensignamen de nosto lengo.
— listo coumplementàri de certificat (1 poste).
— respèt di counvencioun dins li regioun ounte soun estado signado.
— retour sus la desparicioun de l’óupcioun facultativo dins d’uno serìo dóu bacheleirat e restablimen de soun couëficiènt au nivèu di lengo anciano.
— meso en plaço d’un plan d’urgènci pèr lis acadèmi de Clarmount d’Auvergno, Grenoble e Limoge.

Emé de proupousicioun bèn councrèto pèr lis esprovo, li recrutamen, l’emplantacioun de site bilengue dins un segound tèms, sènso óublida l’impourtanço de l’ensignamen di lengo regiounalo dins lou service public.

Ansin li baile de la FELCO e OCBI, Felipe Martel, Marìo-Jano Verny, Bruno Duranton, Óulivié Lamarque e Marino Ralu, soun esta reçaupu lou 16 de juliet pèr lou Counseié dóu Menistre de l’Educacioun naciounalo, Jan-Marìo Panazol, pèr espausa, de voues, lou countengut de soun doursié.

La delegacioun a nouta que soun entreparlaire avié bèn prepara aquelo reünioun e que pourtavo uno atencioun particuliero sus li chifro fournido.
I’an, noutamen, fa saupre soun souvèt de l’anóuncio d’uno nouvello óurientacioun menisterialo en favour di lengo regiounalo.

Basto ! tout es esta di sus lou sujèt à-n-aquéu Counseié atentiéu carga aro de bèn rapourta li proupousicioun facho à soun Menistre, Vincèns Peillon, qu’es tambèn counvida pèr la FELCO a veni vesita un site bilengue.

Troubara tambèn un pichot souveni dins lou doursié. I’avié mai de 30.000 persouno pèr carriero à Toulouso, lou 31 de mars passa, pèr sauva nosto lengo e, en tèsto de la manifestacioun, Jan-Pèire Bel, lou presidènt dóu Senat que representavo Francés Hollande…
Aqui s’es bèn espiga, saupre se vai grana.

Bernat Giély

Pèr legi lou doursié:
www.felco-creo.org

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com