Editouriau
dóu mes de setèmbre 2013
La Charto, pas ratificado
La fauto n’es i teinoucrato ingouvernable de l’Estat
Aqui mai, la rintrado pèr lis escoulan…
Aqui mai li vendémio pèr nous-autre…
Saupre se i'a encaro quicon à grapiha pèr nosto lengo e nosto culturo quand finis l'esta-siau de l'estiéu ?
Après agué bada lou raport dóu "Coumitat counsultatiéu pèr la proumoucioun di lengo regiounalo e de la pluralita lenguistico" que baio touto meno de recoumandacioun e de souvèt pèr la subre-vido di lengo regiounalo de Franço, fuguè l'escandihado avans lou souleias qu'anavo amadura aquelo bono grano.
La bluio capo souleianto l'avèn retroubado coume tóuti lis an à Roudés pèr sis "Estivada ", la vintenco edicioun. Chavano, vènt e plueio se soun pamens esquiha dins lou festenau 2013, parca sus un pendis encagnarda, dubert à touto auro. Urousamen sara lou darnié cop, lis "Estivada 2014" se debanaran coume à la debuto dins lou cèntre de la vilo vièio.
Patric Ros, lou direitour, faguè bravamen targo à-n-aquéli tempèri pèr n'en faire mai, d'aquéu festenau 2013, uno ressido.
Mai à l'oumbro de la fèsto, coume toujour, l'acioun militanto pèr sauva la lengo tèn lou le.
La couóurdinacioun "Anen O!, pèr la lengo" recampè, dins la salo de renioun dóu Counsèu municipau, tóuti li respounsable di gràndis assouciacioun, Felibrige, Istitut d'Estùdi Óucitan, Calandreta, FELCO, Oc-bi, pèr tourna parti en batèsto. Se faguè lou poun sus la manifestacioun menado à Paris davans lou sèti de l'UNESCO e se decidè, davans lou flaquige pèr pas dire lou mudige d'aquelo ourganisacioun internaciounalo, de tourna manifesta davans si porto, mai aqueste cop, lou jour ounte van teni soun assemblado generalo, pèr moustra e faire saupre, à tóuti li catau, que l'Estat francés es toujour rebroussié en raport di critère de l'UNESCO toucant la sauvo-gàrdi di lengo minouritàri. Aquelo nouvello manifestacioun se vai faire au mes de nouvèmbre d?aquest an.
Pèr l'an que vèn, se faguè saupre que tóuti lis aparaire di lengo regiounalo, manifestaran tourna- mai lou meme jour, coume s'èro fa lou cop passa.
La revendicacioun sara, de-segur, pariero, se li proumesso eleitouralo dóu presidènt soun toujour pas tengudo, es-à-dire, d'en proumié, la ratificacioun de la Charto éuroupenco di lengo regiounalo.
De tout biais la dato es arrestado, se fara lou 12 d'óutobre 2014.
La couóurdinacioun "Anen O!" decidè à l'unanimeta de prene part à-n-aquelo acioun revendicativo, segound de moudalita que se decidaran dins lis acamp que vènon. Saupre ounte manifesta ? Sara lou mai tihous e quau voudra beileja l'ourganisacioun materialo dóu vo di passo-carriero…
La discutido fuguè escourtado pèr la vengudo en fin de matinado de Moussu Jan-Pèire Bel, lou presidènt dóu Senat, que venié recampa tóuti li baile di gràndis assouciacioun de defènso de la lengo d'oc. De-bon, èron tóuti, aqui, en poustado pèr aculi lou segound persounage de la Republico. Éu, l'Óucitan venié en païs counquist, emai n'i'aguèsson pèr rementa qu'èro un bèl "Óucitan renegat qu'a pas rèn foutu pèr l'óucitan quand èro elegit loucau d'Arièjo". Mai, aquest an à fa l'esperfort de mounta de soun païs o pulèu de davala de Paris pèr escouta la bono paraulo dis aparaire de la lengo d'oc.
Freto fort e fai lusi, tóuti i'anèron de soun cop de brosso sus li groulo de Mounsegne lou Senatour, avans que d'entamena sis esplico.
La marco reverenciouso d'un pople coulounisa pèr soun mèstre se perd pas, mai sian aro en païs civilisa, forço bèn educa… èro rèn que de poulidesso pèr de dire e redire merci !
L'ome escoutè siavamen.
Lis ensignaire di Calandreta e de la FELCO faguèron mirando. Li proublèmo liga à l'ensignamen de nosto lengo soun noumbrous e sabèn tóuti que l'aveni de noste parla passo pèr l'escolo. S'es dich tout ço que recoumando lou raport dóu "Coumitat counsultatiéu pèr la proumoucioun di lengo regiounalo e de la pluralita lenguistico", mai aqui emé de cas councrèt moustra à bèl esprèssi au patroun dóu Senat.
Pièi, tóuti lis autre venguèron emé si revendicacioun que se dirien courpouratisto dins un Estat demoucrati respetous de soun pople, mai qu'aqui baion à ploura tant l'ajudo de nosto culturo es miserablo.
Mounsegne lou presidènt dóu Senat brouncavo pas gaire, coume se sabié tout acò, e se n'en soucitavo forço… poulitico óubligo !
Escapè pamens pas à la dicho estrambourdanto de Gibert Mercadier, presidènt dóu Coungrès permanènt de la lengo óucitano, que presentè pèr lou menut la situacioun desastrouso de nosto lengo emé tóuti lis empacho, restanco e lèco que drèisso l'Estat francés pèr assegura tranquilet l'óublit e la mort de noste parla.
Quand tout fuguè di, s'esperavo responso à tout. Fuguè uno poulido escapado pouliticiano, sabèn aro que i'a de forço de resistènci amenistrativo qu'entrepachon la voulounta poulitico e bèn segur que i'a uno questioun de mejan financié.
Lou Jan-Pèire Bel es pamens d'à founs pèr apoudera nosto istòri. Aro quand nous dis que preferis un proujèt de lèi à-n-uno proupousicioun de lèi, se n'en trufan dóu rout coume de l'entié… Voulèn qu'uno lèi siegue enfin voutado pèr la sauvo-gàrdi d'aquéu patrimòni que soun li lengo de Franço e que l'Estat francés, membre de la coumunauta éuroupenco, ratifiquèsse enfin la Charto éuroupenco di lengo regiounalo coume l'an fa lis àutris Estat membre.
La responso caussiguè pas la demando aquéu jour à Roudés, mai abéura que sian aro de bèlli resoun poudèn espera l'an que vèn…
Avisas-vous que pèr l'Estivado 2014, sara l'Óucitan de Courèzo que sara counvida…
Se l'aparèi teinoucrati ié laisso lesé de ratifica la Charto, lou presidènt Francés Hollande vendra faire la fèsto emé nous-autre à Roudés.
Bernard Giély |
