Pajo d'acuei
Presentacioun en francés
Catalogue dis edicioun
Editouriau dóu mes
  Mescladisso d'archiéu Mescladisso d'archiéu
diciounàri en ligno
Countat
 

Editouriau dóu mes de setèmbre 2014

 

Reformo territourialo…

Quatre regioun miejournalo pèr li païs  de lengo d’oc

 

Lou proujèt de redecoupage di regioun dóu presidènt Hollande es pas esta retengu, lou Limousin es aro restaca à l’Aquitàni e li Chti-Picard se retrobon emé la fusioun de la regioun Nord-Pas-de-Calais emé la Picardìo.
D’efèt, li deputa an valida la nouvello carto di regioun previsto dins l’encastre de la reformo territourialo. Aquelo carto rameno lou noumbre de regioun metroupoulitano de 22 à 13. Ansin lou proujèt de lèi es esta aprouva pèr 261 deputa. Tant soulamen n’i’a 205 qu’an vouta contre e 85 que se soun astengu… Es un comte d’abouticàri e n’en faudra espera un autre quand lou tèste sara manda en segoundo leituro au Senat ounte li bràvis senatour auran belèu à cor de faire evouluna li frountiero de la carto

Mai pèr aro n’en sian aqui, lou grand debat vai èstre l’apelacioun d’aquéli 13 regioun.
Nous dison adeja que la carto amenistrativo chanjara pas pèr 6 regioun que rèston pariero: “ l’Ile-de-France, la Bretagne, les Pays-de-la-Loire, le Centre, PACA et la Corse ”, valènt-à-dire que l’apelacioun countourroulado de nosto regioun demourara, s’intran pas dins li discucioun e pachejage pèr pousqué ié rebaia soun soul noum de “ Prouvènço ”. Desempièi tant d’annado que se refuso lou noum de PACA, avèn aqui l’óucasioun inesperado de retrouba nosto identita. Faudra sarra l’anguielo.
La chausido d’uno nouvello denoumincioun rèsto tihouso pèr li 7 àutri regioun qu’an alarga si raro.
Lou Limousin qu’a rejoun l’Aquitàni vo l’Auvergno estacado à Rose-Aup van belèu desparèisse dins la nouvello apelacioun…
Emai Miejour-Pirenèu fusiouna emé Lengadò-Roussihoun saupre se prendran lou noum de Setimanìo vo d’Óucitanìo ?
En esperant, l’article 2 de la reformo dis que lou noum prouvisòri di nouvèlli couleitiveta sara “ coustituï de la justapousicioun, dins l’ordre alfabeti, di noum di regioun regroupado ”.
Adounc auren uno estirassado de noum pèr designa uno souleto regioun dins la bello draio de “ Prouvènço-Aup-Costo d’Azur ”:
“ Aquitàni, Limousin, Peitau, Charento ”, à coustat de “ Auvergno-Rose-Aup ” e de “Lengadò-Roussihoun-Miejour-Pirenèu ”.

Au bèu bout, l’autre proublèmo que se pauso, es la designacioun dóu sèti de la regioun nouvello.
Pèr la couleitiveta “Lengadò-Roussihoun-Miejour-Pirenèu ”, Toulouso e Mount-Pelié se van estrifa. La Dépêche du Midi es deja ana luen pèr dire qu’aquéu coumbat reviho li vièii rivalita cataro.
Ato segur ! coume toujour se vai espera un “ raport d’espèrt ” e sarié previst un cap-liò prouvisòri determina en 2015 pèr decrèt après counsultacioun di counseié generau e l’ourganisacioun d’un debat emé li representant di couleitiveta territourialo e de la soucieta civilo.
Acò es proun pounchu… cercon de rougno pèr se grata, la capitalo de la regioun es pas encaro designado…
Es egau, lou milo-fueio territouriau es enfin rousiga, la Franço que comto 101 despartemen, 36 700 coumuno, 22 regioun e 2 600 groupamen intercomunau, vai perdre 9 couleitiveta dins aquel empielamen.
Basto! anan pas se plagne, quand la lengo d’oc e lou francou-prouvençau se retrobon dins li quatre regioun miejournalo.
Mèfi pamens i’a li senatour que van dire soun mot, coume pèr la ratificacioun de la Charto éuroupenco di lengo regiounalo, lis esperan toujour… pecaire n’an de travai !

 

Bernat Giély

 

Site nostre :
prouvenco-aro.com
cieldoc.com
Nosto adrèisso eleitrounico :
lou.journau@prouvenco-aro.com

 

 
Mescladisso d'archiéu Mescladisso d'archiéu
 
Se voulès vous abouna escriéure à :
 
"Prouvènço d'aro", "Flora pargue", Bast.D, 64, traverso Paul, 13008 Marsiho.
 
Se voulès d'en proumié counèisse "Prouvènço d'aro", li tres darnié numerò vous saran manda à gratis, basto pèr acò de nous baia voste noum e vosto adrèisso :
Nosto adrèisso eleitrounico : lou. journau@prouvenco-aro.com
Prouvènço d'aro, 18 carriero de Beyrouth, 13009 Marseille.
 
Pajo d'acuei Presentacioun en francés Catalogue dis edicioun Editouriau dóu mes Mescladisso d'archieu diciounàri en ligno Countat